Amu jé ntyamane bejuif be nji buni ô nto bebé

Yésus a jeñeya a mezene mese na a volô bôte na, be kôm élate jap a Zambe. A beta bi éyoñe ya bo de, éyoñ a maneya laan a ékôane bôt é ne nseñ nda mone Pharisien.

Bôte béziñ ba kate nye ébubua ja te boban. Jam ete da fombô “bôte ya Galilée, Pilate [Ponce Pilate, ngovina ya Rome] a nga fulane metyi map a metyi betit be nga tyi’i Zambe.” (Luc 13:1) Jé ba kômbô jô?

Éko éziñ ba kobô ajô jam é nga boban éyoñe Pilate a nga ke nyoñe moné e nkobe ya Temple asu na, a lôñ aqueduc a ye so mendim e Jérusalem. Éko éziñ, e bôte ba jôé e Temple mbe be nga ve Pilate moné ate. Abui Bejuif e nga wô’ô jam ete abé a Begaliléen béziñ be nga wu. Ba ba kañete ajô te be ne simesane na, Begaliléen bete be nga bi fonos ya mbia be mam be nga bo. Ve Yésus a nji bi ôsimesan ôte.

Nde a sili na: “Ye mi asi’a ko na bôte ya Galilée bete be nga dañe bôte bese ya Galilée abé, amu be nga yene mam mete?” Éyalane jé é ne momo. A belan éve’an éte mfa’a ya jô Bejuif na be tabe ntyel a jô’ô na: “Ve nge mi abo te kôñelane minlem, mia bese mi aye jañ aval ete.” (Luc 13:2, 3) Ane Yésus a kobô ajô ébubua éfe é ndôme yiane boban, a é tii a beta nlôñan aqueduc (beta tunnel); nde a sili’i na:

“Bôt awôm a mwom, nda meko’o ya Siloé é nga ku be yôp a wôé be, ye mi asi’a ko na be nga dañe bôte bese be nga to Jérusalem abé?” (Luc 13:4) Jama bôt a yiane simesane na, bôte bete be nga wu amu mam abé map bebien. Yésus a beta liti na nalé a nji bo été. A yeme na “éyoñ a ndôba’ane” bia kui, a mbie bi ne bo na aval ébubua ete é boban. (Ecclésiaste 9:11) Amu nalé, bôte ba yiane nyoñe ñye’elane ya jam ete. Yésus a jô na: “Nge mi abo te kôñelane minlem, mia bese mi aye jañ aval ete.” (Luc 13:5) Ve amu jé a dañe yemete ñye’elan ôte éyoñe ji?

A ne amu a keya a ésaé jé ôsu abui. Amu nalé a ve éve’an a jô’ô na: “Môt éziñ a nga bé élé ya figuier afupe dé; ane a nga ke jeñe bibuma été, te yen. Ane a nga jô môt a nga ba’ale afupe na, jeñe’ bibuma élé ya figuier ji, te yen: baké’é je; je adipe si amu jé? Ane a nga yalan a jô nye na, A Tat, tame beta jô’é je mbu wu, me aye fa’a je tine si, a kute je mbuane si: nge je aye wum bibuma, mvo’é; nge momo, wôna wo aye ba’é je.”​—Luc 13:6-9.

Yésus a nyoñeya mimbu milal a jeñe’e na, a bé mbunan e nleme Bejuif été. Ve, ésaé jé ja te wume bibuma fo’o ve be mone nsamba bôt a su’ulane bo beyé’é bé. Éyoñe ji, e mbu nyini ya ésaé jé, a beta ve ngule na a bo ésaé éte. A ne v’ane a futi mbuane si na é bo atek mbôma’ane élé Bejuif a zene ya ésaé nkañete a ñye’elane e Judée a Pérée. Jam ete da ve bibuma bivé? Fo’o ve mone tañe Bejuif mbe ba yalan avale da yian. Ve bi ne jô na, bebé ayoñ ese da bene kôñelane minlem, a be tele fo’o été bôte ba ye jañ.

Ba beta liti fulu éte éyoñe môse Sabbat éziñ wo kui. Yésus a ye’ele e nda Zambe été. Nde a yene minga a bili njuk amu a bili mbia nsisime nyul, a wo bo na a wulu nyi’an te ngule ya nyokan, valé a nga ke mimbu 18. Yésus a liti na a wô’ô nye éngôngol éyoñ a jô nye na: “A minga, ôkone viôé ô maneya.” (Luc 13:12) Yésus a beté nye mo a éyoñ éte ébien a nyokan a taté fe na a ve Zambe duma.

Jam ete da bo na évete ya nda Zambe é wô’ô mbia ôlun, nye na: “Bôte be ayiane bi bisaé melu mesaman: melu mete zaka saban, sa môse [Sabbat].” (Luc 13:14) Évet éte é nji sôane na Yésus a bili ngule ya saé bôt; ve a komekane bôte ba zu jeñe na be saéban môse Sabbat! Yésus a yalan a fe’ ése a jô’ô na: “Mia bôt mi ne medu’an, mia bese môte wua nge a ne nnôm ényaka nge éjakas nda été, ke a ye ti je, a ke je vôme ya nyu mendim môse [Sabbat]? Nde minga nyô, a ne mvoñe bôt Abraham, Satan a nga ve nye ôkon mimbu awôm a mwom, ke me ayiane saé nye môse [Sabbat]?”​—Luc 13:15, 16.

Bôte ba wosane Yésus ba wô’ô ôson, ve jama bôt a wô’ô mevak éyoñ ba yen abui mesimba Yésus a bo. Nde Yésus a beta ba’alane nkulan ajô wo fombô Éjôé a mbe a tatéya kobô je a bete éfunga e Mañ ya Galilée.​—Matthieu 13:31-33; Luc 13:18-21.