Mam mebaé me ne mfi: Meye’elan a fulu éjote nyul

Yésus a tameya kan nkana asu beyé’é bé ô liti’i mfi ya bo mban meye’elan. (Luc 11:5-13) Éko éziñ éyoñe ji, a ne Samarie nge Galilée, a beta fe yemete be mfi ya bo mban meye’elan. A bo de a zene ya nkana ôfe a jô’ô na:

“Ntyi’i mejô éziñ a nga too e tison teke ko Zambe woñ, teke semé môt éziñ. E nkuse minga éziñ ô mbe e tison éte ô bo’o ô za’a jô nye na: tyi’i ma ajô e zañe bia e nsiñe wom. Ayab éyoñ, a nji kañese. Ve a nga su’ulane jô émiene na: me kusa bo te ko Zambe woñ nge semé môt éziñ, ve da na amu e nkuse minga wu wo ndeñele ma, ma ye tyi’i nye ajô, a za su’ulane zu bôé ma nlô.”​—Luc 18:2-5, Mfefé Nkôñelan.

Yésus a ve ñye’elan asu nkana ôte a jô’ô na: “Vô’ôla’an ane ékotekot ntyi’i mejô a jô. Ye Zambe a ye bo te kame bôte bé a nga top, be abo ve ye’elane nye môs ba alu, nnye fe a dañ njiban mfa’a wop?” (Luc 18:6, 7) Jé Yésus a kômbô liti a lat a Ésa wé?

Yésus a nji jô valé na, a zen éziñ Yéhôva Zambe a funan njô bôt a ne ékotekot. A viane liti nsela’ane: To’o ntyi’i mejô a ne môta binam a su’ulane yalan nkuse minga amu a ye’elane nye teke jô’é, Zambe nye’ fe a ye bo avale da. Mbôl a ne zôsô, a to fe mbamba nlem, a ye yalane bebo bisaé bé ba bo mbane meye’elan. Bi ne yeme jam ete a mejô Yésus a beta jô ma: “Ma jô mia de na: [Zambe] A ye ji’a tyi’i be mejô.”​—Luc 18:8, Mfefé Nkôñelan.

Bingôngole bi bôt a minzôzoé bi wô’ô ji’a ku éyoñe ba tyi’i mejô, ve mam me wô’ô ji’a wulu tyi’ibi asu ba be ne minkukum a ngul. Ve Zambe a nji bo mame nalé. Éyoñ éyoñe ja ye kpwaan, a ye bo na bebo mam abé be bi fonos ya abé dap, a bebo bisaé bé be bi ényiñe ya nnôm éto.

Za a bili mbunane ane nkuse minga te? Abime bôt avé da buni na Zambe a ye “ji’a tyi’i be mejô”? Yésus a ndôme liti mfi ya bo mban meye’elan. Éyoñe ji, asu na a liti mfi ya buni na meye’elan me ne bi beta ngul, a sili na: “Ve éyoñe Mona môt a ye so, ye a ye fo’o koone mbunan e si nyô?” (Luc 18:8, Mfefé Nkôñelan) Yésus a liti na éyoñ a ye so, sa ke abui bôte nde da ye bi avale mbunan ete.

Abui ya bôte ba vô’ôlô nye da buni na be bili mbunan a na be ne zôsô, ajô te ba biasé bôte bevok. Yésus a kane be nkana wu:

“Bôte bebaé be nga bete nda Zambe na be ye’elan: wua a mbe Pharisien, nyô mbo’o nyoñe toya. Pharisien, tetele, a nga ye’elan avale di e nlem été: A Zambe, ma ve wo akéva amu me nji bo ane bôte bevo’o bese e mbe ba wôlé éza biôm, ékotekot, mejian, nge ane nyoñe toya nyô; ma tyi bidi biyoñ bibaé sondô ase, ma ve ngab awômô ya biôme bise ma bi.”​—Luc 18:10-12, Mfefé Nkôñelan.

Ba yeme Bepharisien ane bôte be wô’ô liti na ba dañe zôsô e mise me bôt. Ba bo nalé amu ba kômbô bo miñyené. Be bili fulu ya tyi bidi môse Mondé a môse Beletô, éyoñe bôte ba te so abui asu makit, amu bôte ba ye yene be. A fe na, ba ya’ane ngab awômô ya biôme mevale meva, ja’a bilok. (Luc 11:42) Bone bengon ôsu valé, be nga liti na ba biasé jama bôt be jô’ô na: “Ke fo’o ve zezé babôtô a ne te yeme metiñe nyô [aval ane Bepharisien ba simesan] mbe be ne biyo’é.”​—Jean 7:49, Mfefé Nkôñelan.

Yésus a ke ôsu a nkana wé a jô’ô na: “Nyoñe toya a nga tele ôyap, teke ayo’o ebiene ya fombô yôp, ve a kutuk tôé a jô’ô na: A Zambe, koo ma éngôngo, ma mbo abé.” Ôwé, nyoñe taxe a yemelan bikobe bié. Nde Yésus a suu nkobô a jô’ô na: “Ma jô mia de na: a nga siliki e nda jé a mbili mekabe, ve saa ñhe môte mbok. Amu nyô ase a bete émiene yôp, a ye silibane si, a nyô a sili émiene si, a ye betebane yôp.”​—Luc 18:13, 14, Mfefé Nkôñelan.

Nde, Yésus a liti mfi ya bo éjote nyul. Melebe mete me ne mfi asu beyé’é bé, mbe bete be nga yaé vôme Bepharisien ba dañe telé minkôñ ôsu. A melebe mete me ne mfi asu beyé’é be Yésus bese.