Miñye’elan mi tii a ntyaman aluk a bongô

Ataté Galilée, Yésus ba beyé’é bé ba tyi’ilan Ôsôé Jourdain a nyoñe njoñ wo ke sud na be ke Pérée. Éyoñe Yésus a nga tate be Pérée éyoñe ya mvus, a nga kate Bepharisien ôsimesane Zambe a lat a ntyaman aluk. (Luc 16:18) Éyoñe ji ba beta kobô ajô te na be ve’ele Yésus.

Moïse a nga tili na fam é ne ngule ya tyam aluk a minga nge a yene be nye “jam éziñ a ve nye bijô.” (Deutéronome 24:1) Asimesane bôte be bili a lat a beamu ba yiane tindi môte na a tyam alu’u da selan. Bôte béziñ ba buni na, ja’a bone be mam be ne bo na be tyam aluk. Nde Bepharisien ba sili na: “Ye é ne nkañesane na môt a suu minga wé amu aval étom ése?”​—Matthieu 19:3, Mfefé Nkôñelan.

A li’i yemete ôsimesan ôte, a atyeñ ése, Yésus a beta ba’alan nsôñane Zambe a mbe a bili éyoñ a nga telé aluk a jô’ô na: “Ye mi nji yeme na Nté biôm, atata’a, a nga té be fam a minga? A a nga jô na: Amu nalé, fam ja ye li’i ésaa a nyia a a ye lat a minga wé a ba ye bo bebaane nsône wua. Avale ya na be bo te beta bo bebaé ve nsône wua. Ajô te jôme Zambe a lateya, môt a nji yiane kandé je.” (Matthieu 19:4-6, Mfefé Nkôñelan) Éyoñe Zambe a nga té alu’ e zañ Adam ba Eve, ôsimesane wé ô nji be na e tyambane môs éziñ.

Bepharisien ba liti na be nji kañese ajô te, nde ba sili nye na: “Amu jé Moïse a nga tiñeti na, môt a ye ve nga kalate ya suu nye?” (Matthieu 19:7) Yésus a jô be na: “Moïse a nga jibi mia mi suu benyo beya, amu minlem mienan mi ne ayet: ve e nji bo nalé aso atata’a.” (Matthieu 19:8) “Atata’a” a nji bo melu me Moïse, ve éyoñe Zambe a nga kôm aluk afup y’Eden.

Nde Yésus a ve beta ñye’elan a jô’ô na: “Me ajô mia na, Môt a ye suu nga, te yen a za ji’an, (nkobô grec pornéïa) a lu’u mfe, a boya mejian.” (Matthieu 19:9) Aval ane Mintilane mia liti, a ne fo’o ve éyoñ môt a bo mejian nje alu’u é ne ntyamban.

Nalé a bo na beyé’é be sili nye na: “Nge nalé nye a né e zañe fam a minga wôna mfi ô nji bo na môt a luk.” (Matthieu 19:10, Mfefé Nkôñelan) Da liti fo’o valé na, môt a kômbô luk a nji yiane vuane na a ne élate ja tabe nnôm éto!

Mfa’a ya jam da fombô éto nkoé, Yésus a liti na bôte béziñ be nga bialé miak, amu nalé be vo’o ke luk. Ba bevo’o ki, bôte mbe be nga bo be miak, amu nalé be vo’o ke binoñ a binga. Ve da, befe ba tyi’i na ba nyume bebien mvaé ya ke binôn. Ba bo de amu ba kômbô ve éyoñe jap ése asu mam ma fombô Éjôé Zambe. Yésus a ve be melep a jô’ô na: “Môt a ne ngule ya nyoñ ajô di (e tabe nkoé), a nyoñe’e de.”​—Matthieu 19:12.

Nde bôte ba taté na ba zu bone bap be Yésus. Ve da, beyé’é ba bame be, amu be nji yi na be ndeñele Yésus. Éyoñe Yésus a yene nalé, nde a wô’ô ôlun a jô be na: “Me’eta’an ayôme bongô e zu be ma; te kamane de: amu [Éjôé] Zambe é ne jôme ya aka’a bôte di. Me ajô fo’o mia na, bôte bese môt a bo te nyoñe ayoñe Zambe ane ôyôme mongô, a se ngule ya [nyiin été].”​—Marc 10:14, 15; Luc 18:15.

Ngo’o aka’a mbamba ñye’elan te! Nge bia kômbô tabe Éjôé Zambe si, bia yiane sili biabebiene si a bo avôle ya nyoñe miñye’elan ane bone be bongô. Éyoñe ji, asu na a liti be nye’an, Yésus a nyoñe bongô mo mé été a botane fe be. A liti fe avale nye’an ete asu bôte bese ba “nyoñ Éjôé Zambe ane mone mongô.”​—Luc 18:17, Mfefé Nkôñelan.