Meluman a lat ajô ya yem za a dañe nyô mbok

Ngô’é a nga kandane lôt a minlômane mié, Yésus a nga ve be mbamba ñye’elan a lat a fulu éjote nyul éyoñ a nga sôbe be mebo. Amu jé jam ete é ne mfi? Amu mbia mefulu be nga liti. Be maneya ve bebiene ngumba be Zambe, ve be ngenane be jeñe na be yem za ya be be a dañe nyô mbok. (Marc 9:33, 34; 10:35-37) Mbia fulu ate a beta yené ngô’é nyu.

Minlômane mia taté na mia beta wôman “ézezañe jap ajô: Za ya be be a nga yiane yenébane Nyô a dañ.” (Luc 22:24, Mfefé Nkôñelan) Ngo’o abime mintaé Yésus a yiane wô’ô nleme wé été éyoñ a yen avale ba beta luman! Jé a bo éyoñ éte?

A lôte na a komekane minlômane mié amu mbia mboan a mbia fulu te, Yésus a kobô a be a évôvoé ése a jô’ô na: “Bejô bôte ya meyoñ be koo me minlô yôp a ba ba jôô me ba lobane na bezambe. E nji bo nalé be mia. . . . Amu za a dañ, ye nyô a too tawôlô, ye nyô a ne mbo ésaé?” Éyoñe te a beta dutu asimesan dap e jam a jaéya zu a kate be, a jô’ô na: “Ve ma, me ne zañe jenan ane mbo ésaé.”​—Luc 22:25-27, Mfefé Nkôñelan.

Akusa bo na be nga bialé a metyi ya abé, minlômane mi nga wulu ba’aba’a a Yésus éyoñe ya minjuk. Nde a jô be na: “Ma telé Éjôé asu denan aval Ésaa wom a nga telé éjôé asu dam.” (Luc 22:29, Mfefé Nkôñelan) Bôte bete be ne bôte ba wulu ba’aba’a a Yésus. A ve be ndi nlem na, a zene ya élat é ne zañe minlôman a émien, ba ye tabe a nye Éjôé Zambe a ba ye nyoñe ngap a je.

Akusa bo minlômane mi bili mbamba ndi nlem éte, mi ngenane mi bili metyi ya abé a menyule minsôn. Yésus a kate be na: “Satan a nga kômbô mia asu ya se’ese mia ane avute fôn,” nde da mane mialan éyoñe ba se’ese de. (Luc 22:31, Mfefé Nkôñelan) Ve a bemene fe be na: “Mia bese mi aye kolé ôbak alu di ajô dam: amu e ne ntilane na, Me aye bibi mba’ale, a mintômba ya mbam mi aye tyamelan.”​—Matthieu 26:31; Zacharie 13:7.

Pierre a sôô a too mebun a émien a jô’ô na: “Nge bôte bese be aye kolé ôbak amu ajô dôé, ve ma me aye kolé ôbak.” (Matthieu 26:33) Yésus a jô Pierre na, ôsusua na nnôme kup a loñe biyoñe bibaé alu ete, Pierre a ye kate nye. Ve jame da, Yésus a kô’ôlane na: “Me nga ye’elan ajô dôé na mbunane wôé ô bo te tek, a wo éyoñ ô bulaneya be ma, yemete’e bobenyoñ.” (Luc 22:32, Mfefé Nkôñelan) Ve Pierre a beta jô a ngul ése na: “To’ane bia wo bi awu nsamba wua, ve ma me aye kate wo.” (Matthieu 26:35) Beyé’é bese ba jô fe avale da.

Yésus a jô beyé’é bé na: “Me ngenan bia be mia ôyôme mon nté; mia ye jeñe ma; aval me nga kobô Beyude na, e vôm ma ke, mi se ngul ya zu, avale te fe ma kobô mia éyoñe ji.” Nde a beta jô na: “Ma ve mia mfefé atiñe na, nye’esa’ané, aval ane me nga nye’e mia, nalé fe mia mia nye’esa’ané. E jame di nde bôte bese ba ye yeme na mi ne fo’o beyé’é bam, nge mia nye’esan e zañe jenan, wua a nyu mbok.”​—Jean 13:33-35, Mfefé Nkôñelan.

Éyoñ a wô’ô na Yésus a ye beta dañe tabe a be, Pierre a sili nye na: “A Nti, wo ke ke vé?” Yésus nye na: “E vôm ma ke, ô se ngul ya tôñe me wé éyoñe ji, ve melu ôsu, wo ye zu wo tôñe ma e mvus.” Pierre a nji wô’ô jôm, nde a jô na: “A Nti, amu jé me se ngul ya tôñe wo éyoñe ji? Ma ye ju ényiñe jam e butane wo.”​—Jean 13:36, 37, Mfefé Nkôñelan.

Éyoñe ji Yésus a kobô ajô ya éyoñ a nga lôme minlômane mié na be ke bo ésaé nkañete e Galilée teke’e moné nge ékpwaé bidi. (Matthieu 10:5, 9, 10) A sili na: “Ye mi nga jeñembane jôm éziñ?” Ba yalane na: “Teke jôm!” Ve jé ba yiane bo ataté éyoñe ji? Yésus a ve be melebe ma: “V’éyoñe jina ñhe nyô a bili mfek a nyoñe wô, avale da nyô a bili ékpwaé, a nyô a nji bi nkpwaté mekôn, a ku’ane ngômesane jé a kuse wua. Amu ma jô mia de na: E jam e ne ntilan da yiane tôébane be ma na: A nga lañeban e bebo mbia be mam été. A e jam da fombô ma e nga ke asu’u dé.”​—Luc 22:35-37, Mfefé Nkôñelan.

Yésus a kobô ajô ya éyoñe ja ye tôé ji ba ye wôé nye élé yôp ézezañe bizilingane bibaé. Beyé’é bé ba ye tôbane ngul étibela’a éyoñ éte. Mbôle ba simesane na be nto nkômesan, ba jô na: “A Tat, tame yen, minkpwaté mekône mibaé mi ne va.” Nye na: “Mili mi ayian.” (Luc 22:38) Mvuse ya valé, Yésus a ye ve be beta ñye’elan éyoñe nlômane wua wo ye belane nkpwaté mekône wé.