Yésus a ye’elan amu nlem ô tyele nye yôp abui

Yésus a ndôme mane ye’elan a minlômane mié mia wulu ba’aba’a a nye. Nde, ‘éyoñe be nga mane yia jia, ane be nga kôlô valé a ke e Nkôle Beolivier.’ (Marc 14:26, Mfefé Nkôñelan) Ba ke mfa’a ya est, vôme Yésus a jaéya zu a ke, e Gethsémané.

Éyoñe be kuiya mbamba vôm ate, vôme bilé beolive bi ne mbéan vôm ase, Yésus a li’i minlôman mié mwome mvus. A yiane be li’i éko éziñ éyoñe be kuiya anyiin afube, amu a jô be na: “Taba’ane si valé, nté ma ke ôbe nté na me ye’elan.” Yésus a ke a minlômane milal Pierre, Jacques, a Jean, ôyap afub été. Nlem wo taté na wo kumetane nye, nde a kate bôte bete belale na: “Nsisime wom wo wô’ô ôlun étua abui a kui awu; lika’ane va a momba’ane fufulu a ma.”​—Matthieu 26:36-38, Mfefé Nkôñelan.

Yésus a ke ôbe nté a be, éyoñe te a ‘kute meboñe si a taté na a ye’elan.’ Jé a sili Zambe meye’elan été éyoñ a ntele mbia été ji? A jô na: “Abba, a Tat, ô ne ngule ya bo mam mese, bo’o na kob nyuna é sa’ale ma ôyap. Ve sa ke ane ma kômbô, ve ane womien wo kômbô.” (Marc 14:35, 36) Nalé a tinan aya? Ye a nga kômbô bili atek mfa’a ya bo ésaé Nkôté? Momo!

Nté a mbe yôp, Yésus a nga yen aval avé bôte Beromain be mbe be tibili’i a wôé ba too be ju’uk ôsusua na ba wu. Éyoñ a nto môta binam ji, a wô’ôtane fe mintaé a woñ ane môt ase; nde a nji kômbô wu aval ete. Ve jame da dañe taé nye nlem e ne, éyoñ a simesane na, mbia awu a yange nye ane mbo mam abé, da ye ve éyôlé Ésa mvit. Bone mewolô ba zu tôñe valé, ba zu tyelé nye élé yôp, amu ba jô na a te biasé Zambe.

Éyoñ a lôteya abui éyoñe meye’elan été, Yésus a bulane ke koone minlômane milal, a koone na mi lom ôyo. Nde a jô Pierre na: “Aya, ye mi se ngule ya mombô awolo da a ma? Momba’an, a ye’elan Zambe, ndemben meve’ele me aye bo te zu be mia.” Yésus a yeme na, nlem ô tyele fe minlômane mié yôp, a ngô’é é nto abui. Nde a beta jô na: “Nsisim wo ame’ete, ve minsône mi ne atek.”​—Matthieu 26:40, 41.

Éyoñ ete Yésus a beta ke éyoñe baa, a sili Zambe na a va nye ‘kob éte.’ Éyoñ a beta so, a zu koone na minlôman milal mi betaya ku ôyo melom, a to ke na ba te yiane ye’elan asu na be bo teke ku meve’ele. Éyoñe Yésus a kobô be, be ne “te yem ajô be aye yalane nye.” (Marc 14:40) Yésus a beta ke éyoñe lale, a kute meboñe si a ye’elan.

Aval awu a zu tôbane de ane mbia môt, da tyelé fo’o Yésus nleme yôp abui amu éyôlé Ésa wé é ne vebane mvit. Ve, Yéhôva a wô’ô meye’elan me Mone wé, ane a lôm ange asu ya na, a zu ve nye ngule nyul. Ve da, Yésus a nji telé mfa’a ya ye’elan Ésa wé, ve a viane beta “bo mbane ya ye’elane Zambe.” A ko fo’o woñ nya nya abuii. A be’e fo’o beta mbe’e bitul! Ényiñe jé ébiene ya nnôm éto a ji ya bone be bôt ba buni nye bi ne nye mo été. Amu nalé, “édudu’u ja kui nye nyô beta metoé, ane metyi ve toé si.”​—Luc 22:44.

Éyoñ Yésus a bulane zu koone minlômane mié éyoñe lale, a beta fo’o koone na be lom ôyo. Nde a jô be na: “Kelan ôsu a ke ôyo a woka’an! Mi lôô éyoñ é ntoo bebé nje mona môt a yiane keeban e mo bebo abé. Kôla’ane si! Nkean! Mi lôô môt a koñe ma a soya.”​—Matthieu 26:45, 46, Mfefé Nkôñelan.