Akôlô ya Sanhédrin, ba ke nye be Pilate

Alu da man éyoñ Pierre a kat Yésus éyoñe lale. Bôte ya Sanhédrin be maneya bo ntyi’an ajô wop, a môt ase a keya mfa’a wôé. Tyé kpwaa ya môse nkul éwônga, été été ba beta mane sulane na, be boone bo ve ane ba tyi’ ajô ba te taté alu, ane metiñe ma liti. Ba bo na Yésus a zu vôme be né.

Ba beta sili nye na: “Nge ô ne Krist, kate’e bia.” Yésus a yalane na: “Nge me akate mia, mi aye buni: nge me asili mia, mi aye yalan.” Ve jame da, a ayo’o ése, Yésus a kate be na a ne môte be nga jô nye kalate Daniel 7:13. A jô be na: “Ataté éyoñe ji, Mone môt a ye tabe si mbo nnôme ya ngule Zambe.”​—Luc 22:67-69; Matthieu 26:63.

Ba ke ôsu a yemete na: “Nde ô ne ñhe Mone Zambe nga?” Yésus nye na: “[Miabebien] mia jô nalé [na] me ne nye.” E mise map, bifia bite bia yiane na be bo’olô Yésus ajô na, a biasé Zambe a na, a yian awu. Ane ba sili na: “Amu jé bia beta yi bengaa?” (Luc 22:70, 71, Mfefé Nkôñelan; Marc 14:64) Nde ba tiñeti Yésus a ke nye be Ngovina ya Rome, Ponce Pilate.

Éko éziñ Judas Iscariot a yen ane ba ke Yésus e be Pilate. Éyoñe Judas a yemelane na ba te tyi’i Yésus ajô na a yian awu, a jôban abui a mintaé mi ne nye nlem. Ve da, a li’i fo’o kôñelane nlem a zene ya meye’elan, a ke bulane beprêtre minsañe mi moné 30. Nde a kate bemie beprêtre na: “Me nga bo abé amu me nga koñe metyi me môt a ne te bijô.” Nde ba yalane nye bôsa na: “Bi ne za ajô mfa’ ôte? Ajô dôé le!”​—Matthieu 27:4.

Ane Judas a wua minsañe mi moné 30 e temple, éyoñe te a beta kô’ôlane nsem ôfe amu a jeñe na a wôé émien. Nté a jeñe na a tyelé émiene yôp, nde ntyaé a te tiñeti wô nkol wo bu’i. Nde a ke ku meko’o yôp a nyôl é mane nye bôlé.​—Mam Minlôman 1:17, 18.

Ba ke Yésus beta abeñe nda Ponce Pilate éyoñe ndibe tyé ô ngenan. Ve, Bejuif ba te soo nye ba bene nyiine nda été amu ba simesane na, nge ba fulan a Begentil bete ba ye bo mvin. Jam ete da ye bo na, be kate di bidi ya môse Nisan 15, môs ôsu ya Abô’ô ya Fembé é ne te mvusu, môs ôte ô ne fe ngabe jia ya abô’ô Pâque.

Pilate a kui nseñ a sili be na: “Ajô avé mia bo’olô môte nyô?” Be na: “Nge môte nyô a nji ye bo mbo abé, ve bi nga ye bo te zu ve wo nye.” Pilate a yiane simesane na ba kômbô du’u nye, nde a jô na: “Miabebien nyoñane nye, mi ke tyi’i ajô dé a metiñe menan.” Bejuif ba liti nkômbane wop ya wôé nye éyoñe ba yalane na: “Mfa’a wongan, bi nji bi ngul éziñ ya tyi’i ajô ya wôé môt.”​—Jean 18:29-31, Mfefé Nkôñelan.

Nya ajôô a ne na, nge ba wôé Yésus môse Pâque, jam ete e ne bo na bôte be wô’ô ôlun. Ve, nge be ne ngule ya tindi Beromain na be wôé Yésus (e jame Beromain be ne ngule ya bo) amu ajô ba bôté nye da nambe éjôé jap, nalé é bo na, Bejuif be bo teke be’e ayeme ya awu Yésus.

Betebe ôsu ya ñyebe be nji jô Pilate na, ba te tyi’i Yésus ajô amu a te biasé Zambe. Éyoñe ji ba bo’olô nye mam mefe; ba jô na: “Bi nga koone môte nyô [1] a sô’ôlô’ô bôte y’ayoñe dangane na be bene njôan, [2] a kama’ane na be bo teke ya’ane César toya, a [3] jô’ô fe émiene na a ne Krist, njô bôt.”​—Luc 23:2, Mfefé Nkôñelan.

Mbôle Pilate a ne valé asu éjôé ya Rome, a bili beamu ya tyelé nleme yôp éyoñ a wô’ô na Yésus a jô na a ne njôô. Nde Pilate a bulane nda été, a loene Yésus, a sili nye na: “Ye wo ô ne njôô Bejuif?” A ne v’ane a sili na, ‘Ye ô nga tyam atiñe ya Rome a jô bôte na, wo ô ne njôô sa ke César?’ Éko éziñ, asu na a yem abim avé Pilate a wô’ô be kobô’ô ajô dé, Yésus a jô na: “Ye na womien wo jô ajô te, ye na bôte befe be nga kate wo de ajô dam?”​—Jean 18:33, 34, Mfefé Nkôñelan.

Asu na a liti na a nji yem ajô éziñ, ve a kômbô yeme nya ajôô, Pilate a jô na: “Ye me ne mone Bejuif?” Nde a beta jô na: “Bôte ya ayoñe dôé a bemie beprêtre be ate zu ke me wo: ô nga bo jé?”​—Jean 18:35.

Yésus a nji ve’ele sa’ale kobô ajô da dañe mfi: éjôé jé. A zu ve éyalane ja zu bo na, Ngovina Pilate a bo fe’e ne vema.