Jé é ne nkañesane môse Sabbat?

E môse Sabbat ôfe, Yésus a ke synagogue, éko éziñ e Galilée. Vôm ate, a yene môte wo ya mbo nnôm ô maneya kôt. (Luc 6:6) Bescribe a Bepharisien ba tu’a fombô Yésus. Amu jé? Ba kulan nsôñane wop éyoñ ba sili nye na: “Ye e ne nkañesane ya saé môt e môse Sabbat?”​—Matthieu 12:10, Mfefé Nkôñelan.

Betebe ôsu ya miñyebe Bejuif ba buni na be ne saé môt e môse Sabbat fo’o ve nge ényiñe jé é tele mbia été. Éve’an é ne na, môse Sabbat be vo’o kañese na be bi môte mvu’i nge saé nye aveñ, bité bi vo’o bo na môt a wu. Da yené na, bescribe a Bepharisien be nji sili Yésus minsili amu ba wô’ô nkôkone môte wu engôngol. Ba jeñe ve fane ya ve Yésus mekua.

Ve Yésus a yeme mbia mfasane wop. A yeme fe na, be nga beté ôdo’é ajô da bebe ntyiane ya bo bisaé môse Sabbat. (Nkôlan 20:8-10) Sa ke éyoñ ôsu le ba ve nye mekua amu a bo mbamba be mam. Éyoñe ji, Yésus a diine zen asu beta nsañeta’ane éyoñ a jô môt a ne ñyemelane wo na: “Za’a tebe va.”​—Marc 3:3.

Yésus a kôñelan, a fombô bescribe a Bepharisien a jô be na: “Za ya be mia, nge a bili ve ntômba wua, wô ve ku ébé été e môse Sabbat, a ye bo teke nyoñe wô a dutu wô ébé?” (Matthieu 12:11, Mfefé Nkôñelan) Ntômba ô ne jôm é ne ve môt abui moné, ajô te be vo’o li’i wô ébé été akekui tyé éfok; ô ne wu a be ne jañele moné. A nde fe, Mintilane mia jô na: “Zôsôa môt a mvaman ényiñe ya éyeme jé.”​—Minkana 12:10.

Yésus a ve éve’ane ja kôme yian éyoñ a jô na: “Ke môt a dañ ntômba beta ndañan! Nde a ne mvaé nge môt a bo ésaé éngôngo môse [Sabbat, MN].” (Matthieu 12:12) Nde ñhe, Yésus a ye ke tyam atiñe Sabbat nge a saé môt. Betebe ôsu ya ñyebe be vo’o sôan ôsimesan ôte, amu wo liti fulu nkoon éngôngol. Be ve ku bivô.

Yésus a bebe be a ôlun ôse amu mbia ôsimesane wop. Nde a jô môt ate na: “Same’ wo.” (Matthieu 12:13) Éyoñ môt ate a same ñyemelane wo wé, wô ve bo mvo’é. A ne jame ya mevak asu môt ate, ve aval avé bôte ba jeñe Yésus ntañete ba ba yene jam ete?

Be li’i bo mevak amu be saéya môt ate wo, Bepharisien ba viane kui atan a ke émo’o ajô Yésus ‘ba be bôte ya ngame Hérode, a ji’a bôndé fe’e ane be aye wôé nye.’ (Marc 3:6) Da yené na, ngame politik nyi é bili fe nsamba bôte wo so ñyebe Besaducéen. Nya ajôô ke a ne na, Besaducéen a Bepharisien be ne teke wô’an, ve éyoñe ji be nto nlatan asu na be wosane Yésus.