Za a ne ésa wop: ye Abraham, ye Diable?

Yésus a ke ôsu a ye’ele benya mejôô, valé a nga’ane Jérusalem asu Abô’ô Tabernacle (nge na Bibem). Bejuif béziñ be ne valé be ndôme nye jô na: “Bi ne mvoñe bôt Abraham, bi nji bo belo be môt.” Yésus a yalane na: “Me ayeme na mi ne mvoñe bôt Abraham; akôsa bo nalé mi akômbô wôé ma, amu mejô mam me ne te yene vôme ya tabe mia minlem été. Me akobô mam me nga yene be Tate: mia fe mi abo mam mi nga wô’ô be éso wônan.”​—Jean 8:33, 37, 38.

Jam Yésus a jô e ne tyi’ibi ya wôk: Be nji bi Ésa wua. Amu be nji kôme wô’ô jôme Yésus a jô, Bejuif ba beta yemete ôsimesane wop be jô’ô na: “Abraham a ne ésa wongan.” (Jean 8:39; Ésaïe 41:8) Be ne fo’o mvoñe bôte jé. Ajô te, ba buni na be ne bi avale mbunane da ane Abraham, nnye ate a mbe mvôé Yéhôva.

Ve jame da, Yésus a ve éyalane ja ve be ôlune nlem a jô’ô na: “Nge mi ne bone be Abraham, wôna mi aye bo mam me Abraham.” É ne été na, mon a yiane vu ésa. Yésus a ke ôsu a jô na: “Ve éyoñe ji mi akômbô wôé ma, môt a maneya kobô mia benya mejôô, me nga wô’ô me be Zambe: Abraham a nji bo nalé.” Éyoñ éte Yésus a liti nsela’ane nyu: “Mi abo mam me éso wônan.”​—Jean 8:39-41.

Bejuif be ngenane teke wô’ô za nnye Yésus a jô nye. Ba yemete na be ne benya be bonô be jô’ô na: “Bi nji bialé mejian; bi ne Ésa wua, ve Zambe.” Ye Zambe a ne fo’o Ésa wop nga? Yésus a jô na: “Nge Zambe a ne Éso wônan, ve mi anye’e ma: amu me nga so be Zambe, a me soya; me nji zu amu mamien, ve amu a nga lôme ma.” Yésus a sili nsili a émien a ve fe éyalane y’été a jô’ô na: “Mi abene wô’ ane me akobô [amu] jé? Ve amu mi nji bo ngule ya wô’ô mejô mam.”​—Jean 8:41-43.

Yésus a te jeñe na a liti be mam me ne kui be amu ba bene nye. Ve éyoñe ji a kobô bôsa na: “Ésaa wônan, a ne Satan, a mia jeñe na mi bo mbia minkômbane mi ésaa wônan.” Ésa wop a ne aya? Yésus a liti de ne ngeññ éyoñ a jô na: “Satan a ne ñwôé bôt a so atata’a, a nji [tabe] e bebela été.” Yésus a beta jô na: “E môt a so be Zambe, a wô’ô mejô me Zambe; ajô te ñhe mi nji wôk amu mi nji so be Zambe.”​—Jean 8:44, 47, Mfefé Nkôñelan.

Ntyi’an ajô ôte wo bete Bejuif bômô, nde ba yalane nye na: “Ke bi akobô zôsô na ô ne môte ya Samarie, ô [bili] fe mbia nsisim.” Éyoñe ba loone Yésus na “môte ya Samarie” ba liti na ba biasé nye. Ve Yésus a nji nyoñ ngap a meta map, nde a yalane na: “Me nji [bi] mbia nsisim; me akañ Ésa wom, ve mia mi abiasé ma.” A bo ngaka’a ja liti na ajô ete e ne nya mfii a jô’ô na: “Nge môt a ba’ale mejô mam, a ye yen awu.” A nji jô valé na minlôman a beyé’é ba ye ke wu. Ve a kômbô jô na, ba ye jañe nnôm éto: “awu baa,” di e ne teke ndi nleme ya wômô miñwuan.​—Jean 8:48-51; Nlitan 21:8.

Ve Bejuif ba viane wô’ô bifia bi Yésus aval afe, nde ba jô na: “Éyoñe jina ñhe bi yemeya fo’o na ô bili mbia nsisim. Abraham a wuya, bekulu mejô fe, ve wô wo jô na, nge môt a ba’ale mejô mam, teke na a ye ve’ele tye’e jam éziñe ya awu akekui nnôm éto. Ye wo dañ ésaa wongan Abraham, nye a nga wu? . . . Wo kômbô tele telé womien été évé?”​—Jean 8:52, 53, Mfefé Nkôñelan.

Da yené fo’o na Yésus a kômbô liti na a ne Messie. Ve a li’i ve be éyalan éyoñe jia na a kate be za a né, a viane jô be na: “Nge me awumu mamien, duma dam e ne momo: môt a wumu ma a ne Zambe wônan; mi nji yeme nye: ve ma me ayeme nye; nge me ajô na, Me ayeme nye, me za bo minsos ane mia.”​—Jean 8:54, 55.

Ane Yésus a kobô ajô ya émvame jap, môt a mbe zôsô a jô’ô na: “Éso wônan Abraham a nga kômbô yene môse wom; ane a nga yene wô, a vak.” Ôwé, amu a mbe a to ndi a ngaka’a Zambe, Abraham a nga vak, te yen a za’a yene Messie, amu nzuane wé. Ane bôte be nji fas, Bejuif ba yalane na: “Ô za bo’o mimbu mewôm metan, ye ô nga yen Abraham?” Yésus a jô be na: “Me abele fo’o ane me ajô mia na, Te yen Abraham a za bialé’é, me to.” A kobô ajô y’ényiñe jé ôsusua na a zu si va, ane ngul ététéa é mbe é nyiñik e yôb été.​—Jean 8:56-58.

Bejuif ba wô’ô ôlun amu Yésus a jô be na a nga too ôsusua na Abraham a nyiñ, nde ba kômbô lume nye mekok, nye ve viane sôlane be.