Ésulane bidi e nda be Simon, e Béthanie

Éyoñ a kôlôya Jéricho, Yésus a ke Béthanie. Asu na a bo dulu te, a yiane bete njoñ ô n’abé ô to fe bekiliméta 20. Lazare a bekale bé bebaé ba nyiñe Béthanie. Mone nlam ate a tele kiliméta élal a Jérusalem, asiliki nkô ya Nkôle Beolivier mfa’a jôp da tôô.

Abui Bejuif é nto Jérusalem asu abô’ô Pâque. Ba te ji’a zu na be zu “fubu bebien” nge da te kui na môt a te nambe nbim, nge jôm éziñ é ne bo nye na a bo teke bo mfuban. (Jean 11:55; Nlañane Bôt 9:6-10) Abui ya ba ba te ji’a so e too temple valé. Ba sili bebien nge Yésus a ye fo’o so asu abô’ô Pâque!​—Jean 11:56.

Bôt be nji bi aval asimesane da a lat a Yésus. Betebe ôsu béziñ ya ñyebe ba kômbô nye bi na be wôé nye. Nya ajôô a ne na, ba te ve abendé na, nge môt éziñ a yeme vôme Yésus a né, a ji’a kula’ane de na ‘be zu bi nye.’ (Jean 11:57) Betebe ôsu bete be jeñeya fe na ba bi Yésus éyoñ a nga wômôlô Lazare. (Jean 11:49-53) Bi ne wô’ô amu jé bôte béziñ ba buni na Yésus a ye so.

Yésus a suane Béthanie Môse nkul éwônga, valé “Pâque é li’iya melu mesaman.” (Jean 12:1) Môse wo tôé valé (môse 8 Nisan), ñwô ô ne môse Sabbat, a wo taté éyoñe jôp da dim. Nde, dulu éte da mane nye ôsusua na môse Sabbat wo kui. A nji be ngule ya bo dulu éte môse Sabbat (ataté éyoñe jôp da dim e Môse nkul éwônga, akekui éyoñe jôp da dim e Môs éwônga) amu Atiñe Bejuif da tyili avale dulu éte. Yésus a yiane ke nda Lazare aval a wô’ô zu a bo.

Simon, môt a nyiñe fe e Béthanie, a loone Yésus a beyé’é bé, ja’a Lazare asu ésulane bidi mame ngô’é ya Môs éwônga. Ba loone Simon na “nzezam,” éko éziñ amu a mbe môte wua ya bôte Yésus a nga yiane saé. Marthe a belane beyeñ aval a wô’ô zu a bo a ayôñ ése. Marie a liti na a kôme belane Yésus aval é ne na mboon wé wo zu bo na beyé’é be kobô.

Marie a yoé mone nde’e a bili “mbon ôlobinda [albatre], étune kili.” (Jean 12:3, Mfefé Nkôñelan) Mbon ôte ô ne mbia dia, a tañe jé (bedenier 300) é ne kui tañe ba ya’ane môt asu ngumba mbu! Marie a sôé Yésus mbon ôte nlô, a wo’o wô nye mebo, a fimine fe nye mebo a ésile jé. Ane nda ja mane jaé a ényum ôlobinda.

Beyé’é ba wô’ô jam ete mbia ôlun a sili na: “Abim éndaman ôlobinda di da boban amu jé?” (Marc 14:4, Mfefé Nkôñelan) Judas Iscariote nye ve na: “Amu jé be nji kuane mbon ôlobinda wu tañe bedenié mintete mila a ve bingôngole bi bôt?” (Jean 12:5, Mfefé Nkôñelan) Sa ke amu na a dañe mvamane bingôngole bi bôte nde Judas a kobô. Nya ajôô a ne na, a wô’ô wube moné, amu nye a ba’ale nkob moné beyé’é.

Yésus a kamane Marie a jô’ô na: “Mi andeñele minga ate amu jé? Amu a te bo me jam e ne mvaé. Amu mia be minzôzoé mi to melu mese; ve bia be mia bi aye tabe melu mese. Amu a te sôé me mbone wu nyôle jam, ajô te a te kôme ma me ke jambane soñ. Me ajô fo’o mia na, vôm ase mbamba foé nyô a ye katebane si se, jam minga nyô a te bo di be aye kate de bôt a simesane nye.”​—Matthieu 26:10-13.

Nalé a nga ke ngumba môs nté Yésus a ne Béthanie, a abui bôt e nga yeme na a ne valé. Abui Bejuif da ke nda be Simon na be ke yene sa ke ve Yésus étam, Lazare fe, nyô “a nga wômôlô e miñwuan.” (Jean 12:9, Mfefé Nkôñelan) Éyoñe ji, bivete beprêtre ba bo éso’o na, be wôé Yésus a Lazare bese bebaane. Betebe ôsu ya ñyebe bete ba simesane, na a ne amu Lazare a te wômô miñwuan nde abui bôte da buni Yésus. Avale mbia nsisime be bili di!