Yésus a sôbe minlômane mié mebo

Pierre ba Jean, be kuiya Jérusalem asu na be ke kômesane abô’ô Pâque avale Yésus a nga lôme be. Mvuse ya valé, Yésus fe a minlômane mié awôm ba tôñe be. Ngô’é é nto, a nlô jôp a dime nté ba sise Nkôle Beolivier. Yésus a kandane fo’o yene tison a môs a too nkôle yôp.

Yésus a beyé’é bé ba nyiine Jérusalem a ke nda ba zu ke di Pâque. Ba ke nda yôp. Ba koone na mame mese me nto nkôman asu abô’ô ba zu bo beebe. Yésus a yangeya éyoñ éte ayap avale bifia bi bia liti: “Me nga dañe kômbô di Pâque nyô bia be mia, te na ma tôbane njuk.”​—Luc 22:15, Mfefé Nkôñelan.

Valé a nga ke abui mimbu, metum ma jô na, éyoñe ba di Pâque, bôte be ke ba kalane bilaé bi woon e mo mo. Éyoñe ji, Yésus a nyoñeya élaé woone jia, a ye’elan a va’a akéva, a jô be na: “Nyoñan élaé ji, mi nyu je bese: amu me ajô mia na, Me aye beta nyu mendime ya bibuma, ve éyoñ [Éjôé] Zambe je aye zu.” (Luc 22:17, 18) Teke fo’o biso na awu dé é nto bebé.

Nté ba di, évemba jam éziñ ja kui. Yésus a kôlô si, a kôme ngômesane jé, a nyoñe fe tawôlô. Éyoñe te a futi mendin e fandé a bili mo. Mie ndaa nnye a wô’ô nyoñe njuk na, mebo me bôte a te bañete me bo mfuban, éko éziñe a bela’ane mbo ésaé wé. (Luc 7:44) Ve awolo di, mie ndaa éziñ a nji bo valé, nde Yésus émien a nyoñe ntyi’ane ya bo de. Nlôman ôse ya valé ô mbe ngule ya bi mbamba ôsimesan ya bo jame te, ve môt éziñ a nji de bo. Ye mbôle nsisim mesengan éziñ ô nga’ane be minlem? Aval ése é né, ba wô’ô ôson éyoñe ba yen ane Yésus a sôbe be mebo.

Éyoñe Yésus a kui be Pierre, a ngan a jô’ô na: “Teke fo’o mone bebé na wo ye sôbe ma mebo!” Yésus a yalane nye na: “Nge me nji sôbe wo mebo, wôna ô nji bi ngab e be ma.” Pierre nye na: “A Nti, saa ve mebo etam, ve nalé fe mo a nlô bise.” Éyalane Yésus a ve nye ja bo na a kam abui; a jô na: “E môt a maneya woban, a yiane fo’o sôbe ve mebo, étam, amu a ne mfuban nyôl ése. Mfa’a wônan, mi ne mfuban, ve sake mia bese.”​—Jean 13:8-10, Mfefé Nkôñelan.

Yésus a sôbe mebo minlômane 12 mise, ja’a mebo me Judas Iscariot. Éyoñ a betaya jaé ngômesan jé, a zu tabe tebele, nde a sili be na: “Ye mia tu’a wô’ô jame ma mane bo mia di? Mia loone me na: Ñye’ele, a Nti, mia bele, amu me ne fo’o bie. Nge ma sôbe mia mebo, ma Nti a Ñye’ele, mia fe mia yiane sôbane mebo wua a nyô mbok. Amu ma te ve mia éve’ela’a na avale ma te bo mia, mia fe mi bo nalé. Bebela, bebela fo’o ma kate mia nyô na, mbo ésaé a nji dañe masa wé, nalé fe nke nlôman te dañ môt a nga lôme nye. Nge mia tu’a yeme nalé, mi ne ébotan nge mia bo mam mete.”​—Jean 13:12-17, Mfefé Nkôñelan.

Ngo’o mbamba ñye’elan, mfa’a ya saane bôte bevok! Beyé’é be Yésus be nji yiane jeñe bito ya ôsu, be simesa’ane na be ne mfi abui a dañe bôte bevok, a na ba yiane saane be. Ve ba yiane viane vu mbamba éve’ela Yésus a liti be, sake na be sôbe bôte bevok mebo, ve ba yiane bi nkômbane ya saane bôte bevok a éjôte nyul a teke sale abe.