Bôte bôé be maneya wu be ne beta nyiñ!

Awu da bo angôndô ya mintaé nlem. Jôme te nje Bible a loone de na nsiñ. (1 Becorinthien 15:26) Nlô ajô 27, bi nga yene na Yéhôva é vaa awu. Nde é bo ba be maneya wu aya? Nlô ajô wu, bia zu kobô ajô mbamba jame mfe Yéhôva a ka’ale bia: é wômôlô bemilliard be bôt na be bu’uban ényiñ nnôm éto. Ye jam ete da ye fo’o bobane nga? Yéhôva é wômôlô be na be nyiñe vé, ye yôp, ye si?

1. Jé Yéhôva é bo asu bôte bangan be maneya wu?

Yéhôva a ne ôjeja’a ya wômôlô bôte be maneya wu. Zôsôa môte Job a mbe a too ndi na Yéhôva a ye ke vuane nye soñ. A nga jô Zambe na : “Wo ye loon, a ma ye yalane wo [soñ été].”​—Lañe’e Job 14:​13-​15, nwt.

2. Aval avé bia yeme na bewu be ne wômô?

Éyoñ Yésus a mbe si va, Yéhôva a nga ve nye ngule ya wômôlô mimbim. A nga wômôlô mona minga a to mimbu 12, a mone nkuse minga éziñ. (Marc 5:​41, 42; Luc 7:​12-​15) Mvuse ya valé, éyoñe mvôé jé Lazare é nga wu, Yésus a nga wômôlô nye akusa bo a mbe a boya melu menyin soñ. A nga bo na, éyoñe Yésus a maneya ye’elane Zambe, a nga yôtane na: “A Lazare, kui’ atan.” “Ane môt a nga to mbim a nga kui atan” vevee! (Jean 11:​43, 44) Tame ve’ele simesan abime mvaé bibu’a ya nda bôte Lazare a bemvôé bé be nga wô’ô môs ôte!

3. Ndi nlem fé bi bili asu bôte bangan be maneya wu?

Kalate Zambe a jô na: “Bôt ba ye wômô mesoñ.” (Mam Minlôman 24:15) Bôte Yésus a nga wômôlô melu mvus be nji ke yôp. (Jean 3:​13) A nga wômôlô be na be nyiñe si va, a be nga wô’ô jam ete mvaé. Aval ete da da, Yésus é wômôlô bizu’u bi bôte na bi bu’uban ényiñ nnôm éto si va. A nga jô na bôte bese Zambe a simesan ba ye wômô, to’o ba abui bôt e maneya vuan.​—Jean 5:​28, 29.

TUKA’A FAK

4. Yésus a nga liti na a ne ngule ya wômôlô bewu

Tame yene jame Yésus a nga bo asu mvôé jé Lazare. Lañe’e Jean 11:​14, 38-​44, mvuse ya valé, yala’ane minsili mi:

• Jé ja liti na Lazare a mbe fo’o ñwuan?​—Fombô’ô éfuse 39.

• Nge Lazare a nga ke yôp éyoñ a nga wu, ye wo simesane na Yésus a nga ye nye beta vaa wôé na a zu nyiñe si va nga?

Futi’i VIDÉO.

VIDÉO: Yésus a wômôlô Lazare (1:16)

5. Abui bôte da ye wômô!

Lañe’e Besam 37:​29, mvuse ya valé, yala’ane nsili wu:

• Nne bizu’u bi bôt bii wômô bii nyiñe vé?

Yésus a ye ke wômôlô ve bôte be nga bo Yéhôva ésaé. Lañe’e Mam Minlôman 24:​15, mvuse ya valé, yala’ane nsili wu:

• Bôte bevé wo yi na be wômô?

Tame fase jame di: Aval ane ésaa a vele mone wé ôyo, Yésus fe a ne ngule ya wômôlô bôte nalé tyi’ibi

6. Ñwômane miñwuan wo ve ngule nyul a ndi nlem

Nkañete ngone Jaïrus ô nga ve abui bôt e mbe minlem ntya’an ngule nyul. Lañe’e nkañete ôte e Luc 8:​40-​42, 49-​56.

Ôsusua na Yésus a wômôlô ngone Jaïrus, a nga jô Jaïrus na: “Te ko woñ, ve buni.” (Fombô’ô éfuse 50.) Aval avé ndi nleme ya ñwômane miñwuan é ne volô wo . . .

• Éyoñ ébu’a ya nda bôte jôé éziñ nge ke mvôé jôé ja te wu?

• Éyoñ ényiñe jôé é tele mbia été?

Futi’i VIDÉO, mvuse ya valé, yala’ane nsili wu.

VIDÉO: Aval avé ndi nleme ya ñwômane miñwuan ja ve bia ayo’o nlem? (3:​21)

• Aval avé ndi nleme ya ñwômane miñwuan é nga volô bebiaé be Phelicity nlem?

ÔBALEBAS

Bible a ka’ale na bizu’u bi bôt bi maneya wu bii beta wômô. Yéhôva a yi na bôte bete be beta nyiñ, ajô te a nga ve Yésus ngule ya wômôlô be.

Ô ne yalan aya?

• Aval avé bia yeme na Yéhôva ba Yésus be ne ôjeja’a ya wômôlô bewu?

• Bôte bé wômô bé nyiñe vé, ye yôp, ye si va? Amu jé wo yalan nalé?

• Amu jé ô too ndi na bôte bôé bese be maneya wu bé beta wômô?

MAM MEFE ME NE VOLÔ WO

Yene’e bone be mam be ne volô wo éyoñ wo te bi awu.

“Mvolane wo yian asu bôte be bili awu” (Vee ôyo! No. 3 , mbu 2018)

Ye Kalate Zambe a ne fo’o volô môt a te bi awu?

Éyoñe môt bia nye’e a wu (5:06)

Jé é ne volô bongô na be jibi awu môte ba nye’e?

Ntañ (2:07)

Ye bôte bese bé wômô bé ke nyiñe yôp? Beza ba ye ke wômô?

“Qu’est-ce que la résurrection?” (Ô ne koone nye anjeñe mefoé dangan)