Abui bôt da yene Yésus ôsusua Pentecôte

Mvuse ñwômane wé, Yésus a bañete minlômane mié 11 nkôle ya Galilée. Beyé’é befe bebé 500 be ne fe valé, bevo’o ya été be ngenan be bili biyebe minlem. (Matthieu 28:17; 1 Becorinthien 15:6) Ve jame Yésus a kate be éyoñe ji, da volô be na, be tu’a yeme na, a wômôya fo’o.

Yésus a liti be na, Zambe a veya nye ngul ése e yôp a si. A jô be na: “Kelan, mi bo meyoñe mese beyé’é, a baptizô be jôé Ésa, a Mon, a mbamba nsisim: a ye’ele be be ba’ale mejô mese me nga jô mia.” (Matthieu 28:18-20) Yaa, Yésus a wômôya fo’o, a nkômbane wé ô ngenane ve na, be kañete mbamba foé.

Beyé’é be Yésus bese, befam, binga a bongô, be bili ésaé ya bo bôte beyé’é. Besiñe bap ba ye jeñe na be telé ésaé nkañete jap, ve Yésus a bôé be nleme si a jô’ô na: “Me maneya nyoñ ngul ése yôp a si.” Jé bifia bite bia tinan asu beyé’é bé? A jô be na: “Me aye tabe be mia melu mese, akekui asu’ulane ya si nyô.” Yésus a nji jô valé na ba bese ba ye bo ésaé nkañete ba ye bi ngule ya bo mesimba. Ve, bese ba ye bi mvolane ya mbamba nsisim.

Beyé’é be Yésus ba yene nye abui biyoñ tañe “melu mewôm menyin” mvuse ñwômane wé. Ja’a be nji ji’a yeme nye, “a nga liti be nyôle jé ébien, a mendem abui.” A nga kobô fe be ‘ajô Éjôé Zambe.’​—Mam Minlôman 1:3; 1 Becorinthien 15:7.

Nté minlôman mi nga’ane Galilée, Yésus a jô be na be bulane Jérusalem. Éyoñ a keya koene be wôé, nde a jô be na: “Mi te kôlô Jérusalem, ve yange atiñe Tate a nga tiñeti, nde mi nga wô’ a ma: amu Jean a nga baptizô bôt a mendim; ve mia mi aye baptizôban a mbamba nsisime te melu abui ôsu.”​—Mam Minlôman 1:4, 5.

Yésus a minlômane mié, be nga beta yenan mvuse ya valé. Ane a nga ke mie “bebé Béthanie,” asiliki Nkôle Beolivier, mfa’a jôp da tôô. (Luc 24:50) Akusa bo mam mese Yésus a nga timine be a lat a nkeane wé, be nga’ane be buni’i na, Éjôé jé ja ye tebe si va.​—Luc 22:16, 18, 30; Jean 14:2, 3.

Minlôman mia sili Yésus na: “A Nti, ye éyoñ é kpwaneya na ô beta telé éjôé ya ayoñ Israël?” Nye ve jô be na: “E nji bo ajô denane na, mi yeme biyoñ a zia melu Ésa wom a nga telé a ngule njôane jé.” Nde a beta ngôné ésaé ba yiane bo a jô’ô na: “Ve mia ye nyoñe ngu éyoñe [mbamba] nsisim a ye zu be mia. Mvus éte, mia ye bo bengaa bam, ataté Jérusalem, Judée ase a Samarie, akekui meku’u mese ya si nyô.”​—Mam Minlôman 1:6-8, Mfefé Nkôñelan.

Minlômane mi ne Nkôle Beolivier éyoñe Yésus a taté na a bete yôp. Été été, Yésus a mane jañe minkut été. Mvuse ñwômane wé, Yésus a nga nyoñe nyul minsôn. Ve awolo di, Yésus a ke yôp a to nsisim. (1 Becorinthien 15:44, 50; 1 Pierre 3:18) Nté minlôman mia yen ane a ke, ‘bôte bebaé be be’e bifumulu mengômesan’ be tele be fefel. Ane beéngele ba te nyoñe nyule bôt, ba sili mie na: “A bôte ya Galilée, mi atebe a lôbô mfa’a ya yôp amu jé? Yésus nyô a te ke yôp été a li’i mia, nalé fe a ye beta so avale mi ate yene nye a kele’ yôp été.”​—Mam Minlôman 1:10, 11.

Éyoñe Yésus a kele’e yôp, fo’o ve beyé’é bé étam, mbe be nga yen ane a bete yôp, zô’é é nji be. “Avale da fe,” éyoñ a ye beta so, fo’o ve bezôsôô beyé’é bé, mbe ba ye yemelane na, Éjôé jé é tebeya.

Minlôman mia bulane Jérusalem. Melu ma tôé valé, mia tôkan a beyé’é bevok, “Marie nyia Yésus, a bobenyañe bé,” be ne nsamba ôte. (Mam Minlôman 1:14) Bese be ne mbane meye’elan. Jame da ba sili Yéhôva meye’elan é ne na, be top ñyé’é a ye fole Judas Iscariote, asu na be beta bo 12, avale be mbe atata’a. (Matthieu 19:28) Ñyé’é ate, a yiane bo ngaa ya ésaé Yésus a nga bo, a ñwômane wé. Ba bo asimba asu na be yeme za Zambe a ye top, éyoñe ja su’ulane le Kalate Zambe a kobô ajô mboan ôte. (Besam 109:8; Minkana 16:33) Matthias nnye be nga su’ulane top, a mbe a yiane be ñyé’é wua ya beyé’é 70 Yésus a nga lôme nkañete, a “be nga lañe nye nsamba minlôman awôm a wua.”​—Mam Minlôman 1:26.

Melu awôm, mvus éyoñe Yésus a keya yôp, abô’ô Pentecôte ya mbu 33 É.J. é nga kui. Beyé’é bebé 120 ba te tôkane nda éziñ ya Jérusalem, étune ya yôp. Étun ja bem, beta éduñ aval ane évuñulu j’avuñ ngu é mane jaé nda ne lut. Ayem e funa’ane nduan e bete bôte bese minlô yôp. Nde beyé’é ba taté na ba kobô minkobô mife. Teke bisô, beyé’é be Yésus be nga bi fo’o mbamba nsisim, aval a nga ka’ale be!​—Jean 14:26.