“Bo’one ngul minlem, mamien me dañeya si ndôn”

Yésus ba be minlômane be nto bebé ya kôlô e vôme be nga di Pâque. Éyoñ a maneya ve be benya mebendé, Yésus a beta jô na: “Me maneya kobô mia mejô mete, amu mi za kolé ôbak.” Amu jé abendé te é ne mfi? A jô be na: “Bôt be aye titane mia menda me Zambe: ya, awolo de aye bo éyoñ bôt be aye wôé mia, be aye simesane na be abo Zambe ésaé.”​—Jean 16:1, 2.

Jam ete da yiane ndeñele minlôman. Ja’a Yésus a nga kate be mvuse na émo ja ye vini be, a nji kate be bôsa na ba ye wôé be. Amu jé? A jô na: “Me nji kate mia mejô amu bia be mia bi nga to.” (Jean 16:4) Éyoñe ji, a bo de ôsusua na a ke. Jam ete é ne volô be na be bo te kolé ôbak mvuse ya valé.

Yésus a ke ôsu a jô na: “Ma ke be môt a nga lôme ma; a teke môt éziñe ya be mia a sili me na: wo ke vé?” Nné ane ngô’é éte é nga kui be nga kômbô yeme vôm a ye ke. (Jean 13:36; 14:5; 16:5, Mfefé Nkôñelan) Ve éyoñe ji, mbôle minlem mia kumetane be asu jam a te jô é fombô’ô mewosan ma yange be, ajô te ba wô’ô mintaé nlem. Éyoñe ji, minleme mi tyele be yôp amu jame Yésus a te kate be a lat a étibela’a, ba beme asimesane dap nju’u wo yange be. Ajô te, be nji kui na be beta sili duma da yange nye a atinane ya été asu benya Bekristen. Nde Yésus a jô be na: “Ve amu me maneya kobô mia mejô ma, ôlun ô ne mia minlem ne lut!”​—Jean 16:6.

Yésus a timin a jô’ô na: “A ne mia mvaé ane me akôlô; amu nge me abo te kôlô, mvolô minlem a ye zu be mia; ve nge me ake, me aye lôme mia nye.” (Jean 16:7) Beyé’é be Yésus be ne bi mbamba nsisim fo’o ve nge Yésus a wu a bulane fe yôp, nnye ate a ne lôm aval ane mvolô asu bôte bé e vôm ase be né si va.

Mbamba nsisim “a ye kpwé bôte ya si nyô mfa’a ya mam abé, a mfa’a ya zôsô, a ntyi’ane mejô.” (Jean 16:8) Ôwé, bôte ba bene liti mbunan e be Mona Zambe ba ye teléban éngengeñ. Nkeane Yésus a ye ke yôp wo ye bo ndeme ya zôsôô wé, ô liti fe amu jé Satan, “njôô ya si nyô” a yiane nyoñe mekua.​—Jean 16:11.

A ke ôsu a jô na: “Me ngenane mejô abui me akômbô jô mia, ve éyoñe ji mi se ngule ya jibi wô’ô me.” E mbamba nsisim a ye lôme be beyé’é bé a ye volô be na be yeme “mam mese me ne zôsô,” ajô te ba ye fo’o bo ngule ya tôñe benya mejô bete binyiñe biap.​—Jean 16:12, 13.

Minlôman mi ne fe’e ne vema a jam Yésus a kate be na: “Ôbe aboñ vi aye lôt mi te yene ma.” Môt ase a sili nyu mbok atinane ya mejô mete. Yésus a yemelane na ba kômbô sili nye minsili a lat a jam ete, nde ñhe a jô be na: “Me a bele fo’o ane me ajô mia na, Mi aye yi a yôn, bôte ya si nyô be aye vak: mia mi aye wô’ ôlun, ve ôlun mi aye wôk vi aye veñesane mevak.” (Jean 16:16, 20) Éyoñe be wôéya Yésus e ngô’é ya môs ôvok, betebe ôsu ya miñyebe be nga vak, ve beyé’é be nga wô’ô mintaé. Ve da ôlune wop wo kôñelane mevak éyoñe Yésus a wômôya! A meva’a map ma ke ôsu éyoñ a kute be mbamba nsisim nyul.

Yésus a ve’e été minlômane mié mi tele a ji minga a tele éyoñe a kô’ôlô mie a jô’ô na: “Éyoñe minga a kô’ôlô mmie, a tabe éyôé, amu éyoñe jé ya mintaé é soya. Ve ane mon a bialé, teke fe beta simesane mintaé, amu meva’a ya na ngumba môt ô bialéya e si ndôn.” Yésus a ve minlômane mié ngule nyul a jô’ô na: “Mfa’a wônan, mi bili fo’o ôlun éyoñe ji. Ve ma ye beta zu yene mia. A nleme wônan wo ye fôn a mevak, a meva’a menan mete, teke môt a ye vaa mia me.”​—Jean 16:21, 22, Mfefé Nkôñelan.

A za’a kui éyoñ ete, minlômane mi ngenane teke tame ye’elan a jôé Yésus. Nde a kate be éyoñe ji na: “Môs ôte mi aye ja’é mam a jôé dam.” Amu jé ba yiane bo nalé? Sa ke amu Ésa a nji kômbô yalane be. Yésus a viane liti na: “Amu Tate émien a nye’e mia, amu mi nga nye’e ma. A buni na me nga so be Tate.”​—Jean 16:26, 27.

Mbamba mejô Yésus a jô minlômane ma yiane be ve ngule ya jô na: “Nne bia buni valé na, ô nga so be Zambe.” Ndi nlem éte ja ye ji’a tebe meve’ele. Amu nalé, Yésus a liti be jam da zu kui be ana’ana, a jô’ô na: “Ke awolo da zu, e soya fe so, mia ye mane tyamelan, môt ase a kele mfa’a wé, mi li’i ma étam.” Nde a ve be ndi nleme na: “Me nga mane kate mia mame ma na, mi tabe mvo’é ne mieññ amu ma. Mia ye fo’o bi bitibila’a; ve da, bo’one ngul minlem, mamien me dañeya si ndôn.” (Jean 16:30-33, Mfefé Nkôñelan) Momo, Yésus a nji li’i be étam. A ve be ndi nleme na be’ fe be ne dañ émo, aval ane nye, a zene ya ésaé ba bo Zambe a mbunan ôse akusa bo Satan a émo jé ba jeñe na be kpwé be si.