Ntene nlô ajô ya Bible ô tii a Éjôé Zambe. Yéhôva é belan Éjôé éte asu na a tôé nsôñane wé a lat a si. Jé é ne Éjôé Zambe? A aval avé bia yeme na é nga jôé éyoñe ji? Mam mevé Éjôé éte é boya? A mam mevé jé bo melu ma zu? Nlô ajô wu a minlô mejô mibaé mia tôé mii yalane minsili mite.

1. Jé é ne Éjôé Zambe, a za a ne Njôô ya été?

Éjôé Zambe é ne ngum aval éjôé Yéhôva a nga telé. Yésus nnye Yéhôva a nga telé Njôô ya Éjôé éte. Yésus é jôé a too yôp été. (Matthieu 4:​17; Jean 18:36) Bible a jô na Yésus “a ye jôô . . . nnôm éto.” (Luc 1:​32, 33) Mbôle Yésus nnye a ne Njôô ya Éjôé Zambe, a ye jôé bôte ya si ése meku’u menyin.

2. Yésus é jôé ba beza?

Yésus a ye ke jôé étam. Bôte ba ye so “minkobô mise, . . . a meyoñe mese, . . . a ba [ye] jôô si.” (Nlitan 5:​9, 10) Abime bôt avé dé jôé a Yésus? Aso ntete mimbu ôsu, bemillion be bôte be kuiya na ba bo beyé’é bé. Ve bôte 144 000 étam mbe bé ke yôp asu na be ke jôé a Yésus. (Lañe’e Nlitan 14:​1-4.) Bekristen bevo’o bese ki bé li’i si va a tabe Éjôé éte si.​—Besam 37:29.

3. Amu jé Éjôé Zambe ja dañe bijôé ya émo ji?

To’o éyoñe bejôô ya émo ji ba kômbô bo mbamba be mam, be ne teke bi ngule ya bo mam mese ba sôñ. Bejôô be wô’ô fole be, be wô’ô jeñe ve na be vuñulu ayôñe ya tô’ô jap. Ve Yésus ki, Njôô ya Éjôé Zambe, a ye jôé nnôm éto. Zambe a nga telé Éjôé ‘ja ye bo te jañ.’ (Daniel 2:​44) Yésus a ye jôé si ése teke bo ôbangam. Yésus a nye’e bia abui, a ne mbamba nlem a zôsôô. É ye’ele bôt bese aval avé be ne nye’e bôte bevok, a aval avé be ne bo mbamba nlem a zôsôô.​—Lañe’e Ésaïe 11:9.

4. Éjôé Zambe ja ye jôé si ése

Yésus Krist a ne ngul adañe bejôô bese be nyiñeya si va. Lañe’e Matthieu 28:​18, mvuse ya valé, yala’ane nsili wu:

• Éjôé Yésus ja dañe bijôé ya émo ji mimfa’a mivé?

Bijôé ya émo ji bi wô’ô tyendé. Nde fe, njôô ase a jôé abôta si dé. Ye nne fe Éjôé Zambe é ne nalé? Lañe’e Daniel 7:​14, mvuse ya valé, yala’ane minsili mi:

• Amu jé é ne mvo’é na Éjôé Zambe “é bo te jañ”?

• Amu jé é ne mfi na Éjôé Zambe é jôé si ése?

5. Éjôé Zambe ja yiane fole bijôé bi ne si nyi

Amu jé Éjôé Zambe ja yiane fo’o fole bijôé bi ne si nyi? Futi’i VIDÉO, mvuse ya valé, yala’ane nsili wu.

VIDÉO: Éjôé Zambe é ne jé?​—Éfas (1:​41)

• Minju’u mivé bijôé ya émo ji bi nga soo mie?

Lañe’e Écclésiaste 8:​9, mvuse ya valé, yala’ane minsili mi:

• Ye wo simesane na Éjôé Zambe ja yiane fole bijôé ya émo ji? Amu jé?

6. Éjôé Zambe é bili bejôô ba yeme tebe été jangan

Yésus a ne Njôô a yian, amu émien a nga nyiñe si va, ajô te a ne yeme tebe été jangan. (Behébreu 4:​15) Yéhôva a nga tobe bôte 144 000 na be ke jôé a Yésus. Be ne befam a binga ba so “menda me bôte mese, a minkobô mise, a meyoñe mese.”​—Nlitan 5:9.

• Yésus a bôte ba ye jôé a nye be nga taté nyiñe si va, ye jam ete da ve wo ngule nyul? Amu jé?

7. Metiñe ya Éjôé Zambe ma dañe metiñe ya bijôé ya émo ji

Bijôé bi wô’ô telé metiñ asu na be volô bôte bese be ne éjôé jabe si. Éjôé Zambe fe é bili metiñ, a bôte ba kômbô tabe éjôé éte si ba yiane tôñ me. Lañe’e 1 Becorinthien 6:​9-​11, mvuse ya valé, yala’ane minsili mi:

• Wo simesane na émo ja ye funane jé nge bôte bese ba tôñe metiñe me Zambe?a

• Ye wo simesane na Yéhôva a yiane telé metiñ asu bôte ba ye nyiñ Éjôé jé si? Amu jé?

• Jé ja liti na bôte ba semé ki metiñe mete be ne su’ulane kôñelane minlem a tôñe me?​—Fombô’ éfus 11.

ÔBALEBAS

Éjôé Zambe é ne ngum aval éjôé é tele yôp été, ja ye jôé si ése.

Ô ne yalan aya?

• Beza be ne bejôô ya Éjôé Zambe?

• Mimfa’a mivé Éjôé Zambe ja dañe bijôé ya émo ji?

• Jé Yéhôva a yi na bôte ba ye tabe Éjôé jé si be bo?

MAM MEFE ME NE VOLÔ WO

Yene’e mame Yésus a nga jô a lat a vôm Éjôé Zambe é ne.

“Le royaume de Dieu est-il dans votre cœur?” (Ô ne koone nye anjeñe mefoé dangan)

Amu jé Bengaa be Yéhôva ba tobe na ba kabetan Éjôé Zambe, sake bijôé ya émo ji?

Bia kabetan Éjôé Zambe (1:43)

Yene’ aval avé Bible a kobô ajô bôte 144 000 Yéhôva a nga tobe na be ke jôé a Yésus.

“Qui va au ciel?” (Ô ne koone nye anjeñe mefoé dangan)

Jé é nga liti minga éziñ a mbe mimbô’ô na Zambe étam nnye a ne soo zôsôô émo ji?

“J’ai découvert la solution à l’injustice” (Vee ôyo! ya Ngon awôm a jia, mbu 2011)

Yésus a nga jô beyé’é bé na be “nji bo bôte ya si nyô.” (Jean 15:19) Nalé a tinane na ba yiane ki nyoñe ngabe a mame me pôlitik, nge ke bita bia boban émo ji. Ve nya ajôô a ne na, e nji bo tyi’ibi éyoñ ése na bi bo de. Bôte be ne kpwe’ele bia amu bia bene nyoñe ngabe a mame mete. Aval avé bi ne tebe ne bip a wulu ba’aba’a a Yéhôva Zambe?

1. Aval avé benya Bekristen ba yene bijôé ya si nyi?

Bekristen ba semé bijôé ya émo ji. Ba tôñ abendé Yésus di: “Va’ane César biôm bi César.” Nalé a tinane na, bia tôñe metiñe ya si bi too aval ane ñya’ane toya. (Marc 12:17) Kalate Zambe a jô na bijôé ya émo ji bi tele amu Yéhôva a kañese na bi jôé. (Beromain 13:1) Nalé a tinane na, bijôé bite bi bili ki abim éjôé Zambe a bili. Bia yeme na Zambe wongan é belan Éjôé jé asu na a vaa minju’u mise môt a binam a tôbane mie si va.

2. Aval avé bi ne liti na bia nyoñe ke ngab a mame ya émo ji?

Aval ane Yésus, bia nyoñe ke ngab a mam me pôlitik. Môs éziñ, éyoñe bôte be nga yen ane Yésus a bo asimba, be nga jeñe na be telé nye njôô wop, ve a nji kañese. (Jean 6:​15) Amu jé a nga ben? Émien a nga yalane na: ‘Éjôé jam é nji bo éjôé ya si nyô.’ (Jean 18:36) Mbôle bi ne beyé’é be Yésus, bia liti na bia nyoñe ki ngab a mame me pôlitik a bita bia boban émo ji. Éve’an é ne na, bi ne teke ke bo bita. (Lañe’e Michée 4:3.) Bia semé mendeme ya ayoñ aval ane nlinga, ve bia kañe ki me. (1 Jean 5:​21) Nde fe na, bia su’u ki nge wosan ngame pôlitik éziñ nge ke môt éziñ. Éyoñe bia bo nalé, bia liti na bia su’u Éjôé Zambe a ngule jangan ése.

TUKA’A FAK

3. Benya Bekristen ba nyoñe ki ngab a mame me pôlitik

Yésus ba beyé’é bé be nga liti bia mbamba éve’ela ya tôñ. Lañe’e Beromain 13:​1, 5-7 a 1 Pierre 2:​13, 14. Mvuse ya valé, futi’i VIDÉO, a yala’ane minsili mi:

VIDÉO: Bekristene be ne teke nyoñe ngabe mame me pôlitik (Ngap 1) (4:​28)

• Amu jé bia yiane semé bôte be bili éjôé émo ji?

• Aval avé bi ne liti na bia bo be mewôk?

Éyoñe bita bia bôlé, meyoñ méziñ me wô’ô jô na ma nyoñe ki ngap été, ve biyoñe biziñ be wô’ô su’u minkane bita mia wosan. Aval avé bi ne kôme liti na bia nyoñe ke ngab a mame me pôtilik nge ke bita? Lañe’e Jean 17:16. Mvuse ya valé, futi’i VIDÉO, a yala’ane nsili wu:

VIDÉO: Bekristene be ne teke nyoñe ngabe mame me pôlitik (Ngap 2) (3:​11)

• Jé ja tinane na e bo te nyoñe ngab a mame me pôlitik?

Jé ô ne bo nge bijôé bia sili wo na ô bo jam da tyam atiñe Zambe? Lañe’e Mam minlôman 5:​28, 29. Mvuse ya valé, futi’i VIDÉO, a yala’ane minsili mi:

VIDÉO: Bekristene be ne teke nyoñe ngabe mame me pôlitik (Ngap 3) (1:​18)

• Éyoñ atiñ môt a binam da lu’ane ki a atiñe Zambe, atiñe za bia yiane tôñ?

• Tame simesane biyoñ bife Kristen é ne tyi’i na ja bo ki bijôé mewôk?

4. Liti’i mimboon a asimesane dôé na wo sa’ale mam me pôlitik

Lañe’e 1 Jean 5:​21. Mvuse ya valé, futi’i VIDÉO a yala’ane minsili mi:

VIDÉO: Benya Bekristene ba yiane bo ayo’o nleme na be ke ôsu a kandan a émo (2:​49)

• Amu jé Ayenge a nga tyi’i na a nyoñe ke ngab a mam me pôlitik nge ke wumulu mebôk a mendeme ya ayoñ aval ane nlinga?

• Ye wo simesane na a nga nyoñe mbamba ntyi’an?

Mam mevé mefe me ne telé mbunane wongane meve’ele été? Futi’i VIDÉO, mvuse ya valé, yala’ane minsili mi:

VIDÉO: Miñye’elan bia nyoñe Nkume mmombô a bete: Te nyoñe ngap a mam ya émo é ne mengame mengam ji (5:​16)

• Aval avé bi ne bo teke su’u ngam éziñ éyoñ mesi mebaé ma lé ébuma nge ke mam mefe?

• Aval avé bi ne bo te nyoñe ngab a mame me pôlitik a too ke na mintyi’an bôte ba bo pôlitik ba nyoñ mi wô’ô nambe binyiñe biangan?

• Aval avé mefoé bia wôk a mewoso mangan me ne bo na bi yen ayaé ya bo te nyoñe ngab a mam me pôlitik?

ÔBALEBAS

Bekristen ba yiane ve ngul ése na be bo teke nyoñe ngab a mam me pôlitik a zen éziñ, nge ôsimesane wop, mam ba jô, nge ke mimboone miap.

Ô ne yalan aya?

• Jé bia yiane ve bijôé ya émo ji?

• Amu jé bia nyoñe ke ngab a mame me pôlitik ya émo ji?

• Mam mevé me ne telé mbunane wongan meve’ele été?

MAM MEFE ME NE VOLÔ WO

Aval avé bi ne sa’ale mame me pôlitik?

Yéhôva a nji li’i bia étam (3:14)

Jé menda me bôt me ne bo asu na me kômesan éyoñe mbunane wop wé tebe meve’ele été a lat a mame me pôlitik?

Ba’ale’ été ndeba’a étame jôé été ése ô ne tebe (4:25)

Amu jé bi vo’o jô na éyoñ môt a ke kaman ayoñ dé, a bili beta mvom?

“Zambe a ne ngule ya bo mam mese” (5:19)

Yene’ aval avé môt a ne sa’ale mame me pôlitik éyoñ a kômbô nyoñe mintyi’ane miziñ a lat a asu ésaé dé.

“Chacun portera sa propre charge” (Nkume mmombô a bete ya Ngone lale é too melu 15, mbu 2006)