Ba tyi’i Yésus ajô a ba ke wôé nye

Akusa bo na Yésus a tôbane ngul étibela a ébiasé, ngul ése Pilate a ve na a suu nye é nji bo na bemie beprêtre a bôte ba su’u be be tyendé. Be nji yi na jôm éziñ e kamane be na be wôé Yésus. Ba ke ôsu a yôtane na: “Bômôlô’ô nye [élé]! Bômôlô’ô nye [élé]!” Ane Pilate a nga yalane be na: “Miabebien nyoñane nye mi ke bômôlô nye [élé]. Amu mfa’a wom me nji yene nye ajô éziñ.”​—Jean 19:6, Mfefé Nkôñelan.

Bejuif be nji kui na be bo Pilate na a ve Yésus mekua ma yian awu amu mam me pôlitik. Mfa’a ya ñyebe ki? Ba beta bulane mekua be nga ve nye na a biasé Zambe éyoñ be nga ke nye nda mejô (Sanhédrin). Ba jô na: “Biabebien bi bili atiñ, a njôane ya atiñe te, a yiane awu, amu a nga bo émiene mone Zambe.” (Jean 19:7, Mfefé Nkôñelan) Nyina a ne mfefé soman asu Pilate.

A bulane nda jé na a jeñe fane ya suu môte nyô nnye a tôbaneya ngul étibela’ a nnye ate minga Pilate a nga yeme biyeyem. (Matthieu 27:19) Ajô avé Bejuif ba beta bo’olô di, na mone mimbôk a ne “Mona Zambe”? Pilate a yeme na Yésus a ne môte ya Galilée. (Luc 23:5-7) Nde a sili Yésus na: “Wo so so vé?” (Jean 19:9, Mfefé Nkôñelan) Ye Pilate a yiane sili émiene nge Yésus a nga taté nyiñe ôsusua, a na, éko éziñ a nga yiane so yôp?

Pilate a nga wô’ô Yésus émien a jô’ô na a ne njô, bôt, ve Éjôé jé é nji bo ji ya si nyô. Teke kômbô timine jam a nga jô mvus, Yésus a ku évôl. Amu a bene yalan, jam ete da balé mebune me Pilate, nde a jô Yésus a ôlun ôse na: “Wo ku ma évôl a? Ye ô nji yeme na me bili ngule ya suu wo, me bili fe ngule ya bo na be bômôlô wo [élé]?”​—Jean 19:10, Mfefé Nkôñelan.

Yésus a jô tyi’ibi na: “Ô nji ke ye bi mone ngul éziñ e be ma, nge é nji bo mveane ya yôp. Ajô te, e môt a nga kee me wo, e nye a be’e nseme wo beta dañ anen.” (Jean 19:11, Mfefé Nkôñelan) Yésus a nji fo’o simesane ngumba môt. Ve, a liti na Caïphe, bôte ba su’u nye, a Judas Iscariot be be’e mekua ma dañe ma me Pilate.

Amu a semé mbamba ntaban a mejô me Yésus, a na beta woñ ya na Yésus a nga yiane so yôp a bi nye, Pilate a beta jeñe fane ya suu nye. Ve da, Bejuif ba beta bo Pilate na a bi woñ ôfe. Ba ve nye abendé na: “Nge wo suu nye, wôna ô nji bo mvôé [César]. E môt ase a telé émien njô bôt a wosane [César].”​—Jean 19:12, Mfefé Nkôñelan.

Ngovina a beta zu Yésus nseñ, a too éto betyi’i mejô, a jô bôte na: “Mi lôô njôô wônan!” To’o nalé, Bejuif ba ye ke bulane mvus. Ba bete metyiñe yôp, a jô na: “A yiane wu! A yiane wu! Élé yôp!” Nde Pilate a sili be na: “Ye ma ye bômôlô njô bôte wônan élé yôp?” Bejuif ba wô’ô éjôé Beromain ôlun den a nto ayap éyoñ; amu nalé, bemie beprêtre ba kobô ébiasé, a yôtane na: “Bi nji bi njôô bôte mfe, fo’o ve César.”​—Jean 19:14, 15, MN.

Amu a nga ko Bejuif woñ, Pilate a kalane be Yésus na be ke wôé nye. Bezimbi ba vaa Yésus évele ngômesane nyul a jalé nye ngômesane jé. Mbôle ba ke Yésus, émien a yiane jibi mbe’e ya élé mintaé jé.

Bi ne mame tyé ya Nkul éwônga, Nisan 14. Yésus a nga ji’a kôlô si e tyé ya môse Beletô a nga ju’u fe mintaé, mina mi bete mi mivo’o yôp. Mbôl a juane na a be’e adite élé, ngule Yésus ja man. Nde bezimbi be nga bi môt a mbe a lôtôk, Simon môte ya Cyrène, Africa, na a be’e akôn a kee de vôme ba wôé mimbôk. Abui bôte da tôñe be, abim éziñ é bili mintaé nlem a ba yône jame da boban.

Yésus a jô binga ba yône na: “A bengone ya Jérusalem, te yônane ma, ve yônane miabebien a bone benan. Amu mi lôô: melu ma zu e mme ba ye jô na: ébotan é bo’o be minkôkôm mi binga, ébotan é bo’o be binga be nji biaé bon a be nji nyaa bon! Éyoñe te ba ye jô beta minkôle na: [ku’ane] bia yôp! A bone minkôle na: buta’ane bia yôp! Amu nge ba bo nyumi élé avale di, aya a ye kui be nkôt élé?”​—Luc 23:28-31, Mfefé Nkôñelan.

Yésus a kobô ayoñ Bejuif. É ne ane nkôt élé ô ngenan ô bili bone mendim, amu Yésus a ngenan a abui Bejuif da buni nye. Éyoñe balé bete bese ba ye mane ke, a ye li’i fo’o ve ayoñ é ne ñwuane nsisim, fo’o ve ane élé é maneya kôte mendim. Abui minyône da ye bo éyoñe nkane bita ya Rome wo ye zu jalé ntyi’an ajô Yéhôva a lat a ayoñ ete.