Ba tyelé Njôô a ne te mekua élé

Ba ke Yésus vôm éziñ bebé a Jérusalem na be ke tyelé nye élé yôp a bewôé bôt bebaé. Ba loene vôm ate na Golgotha, nge na Vôme ya ékôkoé nlô, a vôm ate a kôme yené ja’a ô “tele ôyap.”​—Marc 15:40.

Ba mane va bôte belal ba te tyi’i na ba yian awu biyé. Mvuse ya valé, ba ve be meyok me bili myrrhe (nge na banga) a fiel. A yiane bo binga ya Jérusalem mbe be nga yame meyo’o mete asu na me sé’é mintaé, a Beromain be nji kamane na be ve bôt ba tyelé élé yôp meyo’o mete. Éyoñ a tye’e me, Yésus a bene me nyu. Amu jé? A nji yi na a jañele mfasan éziñ nge bo teke beta yeme jam a bo a lat a meve’ele a bili éyoñe ji. A kômbô ba’ale mbamba mfasane wé a ñwulane ba’aba’a wé akekui awu.

Ba bôône Yésus élé. (Marc 15:25) A bezimbi ba taté na ba bômôlô nye mesen e mo a mebo, a tupe nye nyul a nalé ate a bo mbia mintaé. Éyoñe ba telé élé tetele, mintaé mia tu’a beta nemban aval é ne na adite nyule Yésus ja sale nye meveñ. Ja’a nalé, Yésus a nji komekane bezimbi bete. A viane ye’elan asu dap a jô’ô na: “A Tate jamé’é be; amu be nji yeme jam be abo.”​—Luc 23:34.

Beromain be wô’ô tili étyimbi e jam môt ba tyelé élé a te bo a ba’a nye nje nlô yôp. Éyoñe ji, Pilate a tili jam ete étyimbi é jô’ô na: “Yésus ya Nazareth Njô Bejuif.” Bifia bite bi ne ntilane nkobô Hébreu, Latin, a Grec, a môt ase a ne ngule ya lañe ntilan ôte. E jame Pilate a bo da liti abim avé a wô’ô jam ete mintaé nlem a lat a aval Bejuif ba te yemete na be wôé Yésus. Bemie beprêtre ba wô’ô jam ete abé, nde ba jô nye na: “Te tili na, Njô Bejuif; ve tili na, Émien a nga jô na, Me ne Njô Bejuif.” Ve mbôl a nji kômbô bo be ôlo, Pilate a jô be na: “Ajô me tiliya, me maneya tili de.”​—Jean 19:19-22.

Mbôle ba wô’ô ôlun, bemie beprêtre ba bôté nye mejô fo’o v’ane be nga bo éyoñe be mbe Sanhédrin. A nji fo’o bo jame ya kam éyoñe bôt be ne valé ba fô’ô minlô a ébiasé ése be ta Yésus, be jô’ô nye na: “Hééé! A wo wo tyame nda Zambe, ô mane fe beta lôñe je ve melu melal étam, suse ñhe si, e vôm ô tyele [élé] valé, ô nyii womien.” Avale da fe bemie beprêtre ba beté jam afe na: “Ke Krist ate, Njôô ya Israël, a tame ñhe suse si éyoñ ji e vôm a tyele [élé], bi yene de a buni.” (Marc 15:29-32, Mfefé Nkôñelan) To’o bewôé bôte bebaé be tyele nye wua mbo nnôm, nyi mbo’o mbo ngal, be’ fe ba komekane nye, a to ke na nye étam a ne fo’o te mekua.

Bezimbi benyin ya Rome ba kpwe’ele fe Yésus. Éko éziñ ba te nyu sañ meyok, mbôle be nga sok, ba jeñe fe na be ve Yésus nnye ate a vo’o same wo na a nyoñe jôm éziñ. Beromain bete ba jô a lat a ntilan ô ne étyimbi é ba’a Yésus nlô yôp na: “Nge ô ne Njôô Bejuif, nyi’i womien.” (Luc 23:36, 37) Miabebien yenan! Môt a nga liti émien ane zen, ényiñ, a benya mejôô nye be nga nyoñ ane jôm é ne ékpwe’ele, a ji ba yiane tibili teke étom! Ve to’o nalé, a ke ôsu a jibi mbia mboan ate, teke komekane Bejuif be ne valé nge bezimbi ya Rome ba kpwe’ele nye, a bôte bebaé be tyele nye fefel.

Bezimbi benyin bete ba nyoñe mengômesane Yésus a to a be’e yôp a kabe me ngap ényin. Nde ba do abia asu na be yeme za a ye nyoñ ngap jia ya été. Ngômesane Yésus a be’e si é ne nya nkômane jômô, amu é ne “ntiñan aso yôp akekui si, te nloen.” Bezimbi ba taté na ba fas a jô na: “Bi aye nyape je, ve do abia, a yeme môt a ye nyoñe je.” Ba tôé fo’o nkulan ajô ô nga jô na: “Bebien be nga kabane mengômesane mam, a nyoñ éwomane jam, a do je abia.”​—Jean 19:23, 24; Besam 22:18.

Ane éyoñ ja lôt, ñwôé bôt wua a yemelane na Yésus a yiane fo’o bo njô bôt. Nde a komekane môte mbok a jô nye na: “Ye ô nji ko Zambe woñ, e wo wo tôban avale melebe da? E mfa’a wongan bia tôban zôsôô ntyi’ane mejô, amu bia nyoñe ma’an mimboone miangan mi nga yiane nyoñ; ve môte nyô a nji bo jam éziñ e n’abé.” Nde a ye’elane Yésus a jô’ô na: “A Yésus, ô simesa’ane ma, éyoñe wo ye zu Éjôé jôé été.”​—Luc 23:40-42, Mfefé Nkôñelan.

Yésus a jô nye na: ‘Ma bele ane ma jô wo de dene na: bia wo bia ye tabe Paradis.’ (Luc 23:43) Ngaka’a éte ja selan a nyi Yésus a nga bo a minlômane mié, na ba ye ke tabe bito ya Éjôé Zambe. (Matthieu 19:28; Luc 22:29, 30, Mfefé Nkôñelan) Ve da, ñwôé bôt ate, éko éziñe mone Bejuif, a nga yiane wô’ô ajô Paradis ya si va, nyi Yéhôva a nga yi asu Adam ba Ève a mvoñe bôte jap. Éyoñe ji, a nto ngule ya wu a bili ndi nlem éte.