Ba kôme mbime Yésus a jame wô

Bi nga ke memane ya môse nkul éwônga, Ngone Nisan é to melu 14. Éyoñe jôp da ye dim, môse Sabbat ya Ngone Nisan é to melu 15 wo ye taté. Yésus a wuya, ve bewôé bôt bebaé be ne nye fefel be nga’ane be vee. Atiñ da jô na, mbim ô nji yiane “li’i ô tyelé élé ngum alu,” ve ba yiane jame wô “môs ôte ôbien.”​—Deutéronome 21:22, 23.

A fe na, ba loone mame ngô’é ya môse Nkul éwônga na, “môse ya be akôme Pâque,” amu bôte ba yame bidi a ba mane bisaé bise bi vo’o yange na be bo bie mvuse Sabbat. Éyoñ jôp da ye dim, “beta” Sabbat a ye taté. (Jean 19:31) Ba jô na beta Sabbat amu Nisan 15 a ye bo môs ôsu ya melu zangbwale ya abô’ô ya Fembé é ne te mvusan, a môs ôte ô ne kom ése ve môse Sabbat, ja’a wo kui éyoñ évé e sondô. (Lévitique 23:5, 6) A mbôle mbu wuna (mbu 33), môs ôsu ôte (Nisan 15) wo tôban a môs éwônga, môse Sabbat, ba loone wô na “beta” Sabbat.

Amu nalé, Bejuif ba sili Pilate na a ji’a bo na, Yésus a bewôé bôte bebaé be ne a nye be wu. Aval avé be ne bo de? Be ne bu’u be mimbiene. Nalé a ye bo na be bo teke nyokan a vebe. Nde bezimbi ba bu’u mimbiene bewôé bôt bebaé, ve sa mi mi Yésus, amu a wuya. Jam ete da toé nkulan ajô wo so kalate Besam 34:20: “A ba’ale bivese bié bise: Te ke jia ya été é ne mbu’an.”

Asu na be tabe ndi na Yésus a wuya fo’o, mone bezimbi wua a ji nye akoñ mvaé. Ane ‘metyi a mendim ma ji’a kui.’ (Jean 19:34) Jam ete da tôé nkulan ajô ôfe: ‘B’aye fombô nyô be nga jii.’​—Zacharie 12:10.

Joseph, môte ya Arimathée a ne “akum abui,” ntyi’i mejô ya Sanhédrin bôte ba semé a ne fe valé. Ba yeme nye ane môt a ne “mba môte ya zôsô,” a nyi a ‘buni na Éjôé Zambe ja ye fo’o zu.’ Mbôl a ne “ñyé’é Yésus, ve asoé amu a nga ko Bejuif woñ,” a nji su’u ntyi’ane ajô be nga bo Yésus. (Luc 23:50; Marc 15:43; Jean 19:38) Nde, a ayo’o ése a ke sili Pilate mbime Yésus. Pilate ve sili évete bezimbi nge a wuya fo’o, nye na ôwé. Ane Pilate a kañese ve Joseph mbim.

Joseph ve kuse mfefé ndombo éndelé a va mbime élé. Nde a vute wô ndombo éndelé a kôme wô na a jame wô. Ane Nicodème, “môt a nga taté zu be Yésus alu,” a kôme mbim. (Jean 19:39) A so a bili biôme ya mbamba menyum bebé kili 33. Ba vute nyule Yésus a bindelé bi bili menyum mete aval ane Bejuif ba bo be jame’e bôt.

Joseph a bili mfefé soñe wé émien be nga fak ako’ été, ba futi mbime Yésus été wôé. Ane ba feneke beta akok, a dipe de mbé soñ. Ba mane bo mam mete ôsusua na Sabbat a taté. Marie Madeleine a Marie nyia Jacques ba te yiane bo valé éyoñ ba te kôme mbime Yésus. Ba ji’a bulane nda na be ke “kôme biôm bi ne mbamba menyum a mbon” na be saé mbime Yésus éyoñ Sabbat a ye man.​—Luc 23:56.

Môse wo tôé valé, môse Sabbat, bemie beprêtre a Bepharisien ba ke yene Pilate a kate nye na: “A tat, bi asimesane na ndu’u bôt ate, éyon a nga vee, a nga jô na, Môse mila mi lôteya, wôna me aye wômô soñ. Ajô te, jô’ô bôte na be tuka’a ba’ale soñ melu mela, beyé’é bé be za zu wupe nye, a jô bôte na, A wômôya: medu’an me asu’ulan me za dane medu’an me nga taté bo, abé.” Nde Pilate a yalane be na: “Nyoñane bezimbi: kelan mi ke mi tuka’a ba’ale je ane mi ne ngule ya bo.”​—Matthieu 27:63-65.

Ésala tyé, e môse sondô, Marie Madeleine, Marie nyia Jacques a binga befe ba zu biôm bi ne mbamba menyum na be zu wo’o bie mbime Yésus. Ba ke ba jô bebiene na: “Za a ye feneke bia akok, a va bia de mbé soñ?” (Marc 16:3) Ve si ja te fô’ôsan. A jame da dañ é ne na, éngele Zambe a te feneke akok, bezimbi ba te mane tup, a soñ ja yené v’ane é ne ékôkoé!