Mejô me Yésus ma balé abui bôt

E synagogue ya Capernaoum, Yésus a ye’ele na nnye a ne nya belete ja so yôp. Mam a kobô ma yemete jam a nga jô bôte be mbe be so’o Mañ ya Galilée yat, e ba be nga di belet a kose be nga ve be wôé.

Yésus a ke ôsu a nlañe wé a jô’ô na: “Beéso benan be nga di manne fé été, ane be nga wu.” Ve a liti na: “Ma me ne bidi bi ne ényiñ été, mbie bi nga so yôp: nge môt a di bie, a ye tabe nnôm éto: ya, bidi me aye ve bi ne minsône miam, me aye ve bie bôte ya si nyô be nyiñ.”​—Jean 6:48-51.

Ngone lale nge nyi nyini ya mbu 30 É.J., Yésus a nga kate Nicodème na, Zambe a nga dañe nye’e si nyô, ajô te a nga lôme Mone wé ane Nyi bôt. Éyoñe ji Yésus a yemete mfi ya di minsône mié, mfa’a ya liti mbunane metuna’a a ye ve. A ne fo’o ve a zen éte nje bi ne ngule ya bi ényiñe ya nnôm éto.

Ve jame da, bôte be nji nye’e minkobô mi Yésus. Ba yalane na: “Môte nyô a ne ngule ya ve bia minsône mié, bi di mie, aya?” (Jean 6:52) Yésus a yi na be yeme na, jam a jô é bili atinan afe, é nji bo avale ba wôk. Jam a beta jô da liti atinane ya mejô mé.

A jô na: “Nge mi teke di minsône mi Mone môt, a nyu fe metyi mé, ényiñ é se ngul ya bo be mia. E môt a di minsône miam a nyu fe metyi mam a bili ényiñe ya nnôm éto, . . . amu minsône miam mi ne benya bidii, a metyi mam me ne benya menyuu. E môt a di minsône miam a nya’a fe metyi mam e nye a too be ma, a ma fe me too be nye.”​—Jean 6:53-56, Mfefé Nkôñelan.

Tame simesan ane bifia bite bi ne balé Bejuif ba vô’ôlô bie! Éko éziñ ba simesane na Yésus a kobô fo’o ajô ya di minsône mi môt nge tyam Atiñe Zambe a lat a ndiane metyi. (Metata’a 9:4; Lévitique 17:10, 11) Ve Yésus a nji kobô ajô ya di minsône nya ndiane, nge nyu metyi nya nyuane. A liti na môt ase a kômbô bi ényiñe ya nnôm éto, a yiane liti na a bili mbunane ntañ a zu ve éyoñ a zu ve ényiñe jé é ne teke bijô a sôé metyi mé. Ve, abui beyé’é bé be ngenan teke kôme wô’ô ñye’elan ôte. Nde bevo’o ba jô na: “Ajô di e ne ayaé; za a ne ngule ya wô’ô de?”​—Jean 6:60.

Mbôle Yésus a yeme na beyé’é bé béziñ ba kobô menyiñ, a sili na: “Ye mi akolé ôbak amu ajô di? Nge mi aye yene Mone môt a kele’ yôp vôm a nga taté tabe, mi aye jô aya? . . . Mejô me maneya kobô mia me ne nsisim a ényiñ. Mi to va, bevo’o be ne te buni.” Amu nalé abui beyé’é bé ba ke a teke fe nye tôñ.​—Jean 6:61-64.

Nde Yésus a sili minlôman mié 12 na: “Ye mia fe mi aye kôlô?” Pierre a yalane na: “A Tat, bi aye ke be za mfe? Wo ô bili mejô ya ényiñ ya melu mese. Bi buniya a yeme fe na ô ne Mbamba Môte ya Zambe.” (Jean 6:67-69) Za avale mbamba fulu beyé’é bé ba liti di! Be too nye mebun, akusa bo na Pierre a minlômane mivo’o mi ngenane teke kôme wô’ô jôme Yésus a kômbô ye’ele be.

Ja’a Yésus a nye’e éyalane Pierre a ve, a jô na: “Ke me nga tope mia bôt awôm a bebaé, môte wua a ne été a ne [nkoñe bôt].” (Jean 6:70) Yésus a kobô ajô Judas Iscariot. Éko éziñ na, Yésus a tatéya na a yene mbia minkômbane mi Judas.

Ve, Yésus a yiane wô’ô meva’a ya yeme na Pierre a minlômane mivo’o mi ngenane teke bili ate’e ya ke ôsu a tôñe nye, a su’u fe nye ésaé a bo asu na a nyii bôt.