Amu jé mbote wongan a nyanga jangan bi ne mfi?

Môt ase ya be bia a bili aval biyé a nye’e a jaék, a avale nyanga a nye’e a bo’ok. Nge bi jeñe na bi tôñe miñye’elane ya Kalate Zambe, bi ne kui na bi jaé avale biyé bia nye’e, bi va’a fe Yéhôva nlem avak. Bi tame zu yene miñye’elane miziñ ya été.

1. Miñye’elane mivé mi ne volô bia na bi nyoñ mbamba mintyi’an a lat a nyanga jangan a mbote wongan?

Bia yiane top “ngômesan é ne te melitan, a ntabane ya ésemen a mba’alane minlem.” Bia yiane fe jeñe na bi bo mfuban asu na e kôme yené na bi ne bôte ba bo “mame ya Zambe.” (1 Timothée 2:​9, 10) Bi tame kobô ajô mam menyin ma: (1) Ngômesan jangan ja yiane bo “te melitan.” Aval womien wo yen bisulane biangan, Bengaa be Yéhôva ba jaé ki avale biyé da, nge bo avale nyanga da. Ve biyé ba jaé, mesi’i map, a nyanga ba bo ja liti na ba semé Zambe ba kañ. (2) Ngômesan ja liti “ntabane ya ésemen” é ne avale ngômesan da bo ki na bôte be bi mbia b’asimesan nge ke mbia minkômban, nge na bôte be ku avem. (3) Bii liti na bia ‘ba’ale minlem’ miangan nge ke na bi ne fek, éyoñ bia tôñe ki fatane nyanga a fatan mbot ése ja wum. (4) Mbote wongan a fatane nyanga jangan bia yiane liti éyoñ ése na bi ne bôte ba bo “mame ya Zambe.” Bia liti fe a zen éte na bia kañ nya Zambe.​—1 Becorinthien 10:31.

2. Amu jé bia yiane simesane bôte bevok éyoñ bia tobe mbote wongan a nyanga jangan?

Akusa bo bia yeme na bi ne fili ya tobe mbote wongan, ve bia yiane fe fas nge biyé bia jaé a nyanga jangan bii ndeñele bôte bevok. Bia ve ngule jangan ése na bi bo teke bo jam da ye kolé bôte bevo’o ôbak, ve bia bo “mam me ne mvaé, mfa’a ya [ve be] mvolan.”​—Lañe’e Beromain 15:​1, 2.

3. Aval avé mbote wongan ô ne dutu bôt benya mejôô?

Bia jeñe na bi jaé biyé bi ne éjijin éyoñ ése, ve bia dañe de bo éyoñ da sili na bi tabe bisulan nge ke na bi ke nkañete. Bia yi ki na jam éziñ e bo na bôt be kate vô’ôlô mbamba foé bia kañete be. Bia yi na mbote wongan a nyanga jangan bi ve bôte nkômbane ya vô’ôlô benya mejôô a na “ñye’elane Zambe, Nyi wongan” ô yené abeñ mise map.​—Tite 2:​10.

TUKA’A FAK

4. Éyoñ bia jaé mbot ô ne éjijin, bia liti na bia semé Yéhôva

Jé ja yiane dañe bo na bi véé mis mfa’a ya mbote wongan? Lañe’e Nlitan 4:​11, mvuse ya valé, yala’ane minsili mi:

• Mbôle bi be’e éyôlé Yéhôva, mintyi’an mivé bia ye nyoñ a lat a mbote wongan?

• Ye wo simesane na e ne mfi na bi tu’a yeme tobe biyé bia jaé éyoñ bia ke bisulan a éyoñ bia ke minkañete? Amu jé?

5. Aval avé bi ne nyoñ mbamba mintyi’an a lat a mbote wongan a nyanga jangan?

Futi’i’ VIDÉO.

VIDEO: “Bo’one mame mese asu duma Zambe” (10:18)

To’o na biyé bi be’e bi ne dia nge momo, bia yiane bo mfuban a éjijin. E ne fe mfi na bi jaé biyé bia yian a bevôm bia ke. Lañe’e 1 Becorinthien 10:24 a 1 Timothée 2:​9, 10. Mvuse ya valé, kate’ amu jé bia yiane ki jaé . . .

• biyé bi ne mvit, nyaban, nge ke éngbwemese

• biyé bia late nyul, biyé bia liti bibu’a bi nyul ba yiane solé, a bi bi ne bo na bôte ba yene bia be bi mbia minkômban.

Akusa bo Bekristen be nji beta bo atiñ Moïse si, ve atiñ ete da volô bia na bi yem ôsimesan Yéhôva. Lañe’e Deutéronome 22:​5, mvuse ya valé, yala’ane nsili wu:

• Amu jé bia yiane ki jaé avale biyé nge ke bo aval nyanga da bo na fam é yené ane minga, nge ke na minga a yené ane fam?

Lañe’e 1 Becorinthien 10:​32, 33 a 1 Jean 2:​15, 16, mvuse ya valé, yala’ane minsili mi:

• Amu jé bia yiane véé mise na mbote wongan ô bo teke ndeñele bôte ya akônda nge ke bôte ya vôm bi too?

• Avale mimbot avé bôte ba jaé vôm ô too?

• Ye wo simesane na mimbot miziñ ya été mi nji bo mvo’é asu Bekristen? Amu jé?

ÔBALEBAS

Éyoñ bia tobe biyé bi ne éjijin, bia liti na bia semé Yéhôva a bôte bevok.

Ô ne yalan aya?

• Amu jé mbote wongan a nyanga jangan bi ne mfi mise me Yéhôva?

• Miñye’elane mivé ya Kalate Zambe mi ne volô bia na bi nyoñe mbamba mintyi’an a lat a mbote wongan a nyanga jangan?

• Aval avé mbote wongan a nyanga jangan bi ne dutu bôt benya mejôô, nge ve éyôlé Yéhôva mvit?

MAM MEFE ME NE VOLÔ WO

Yene’e jame biyé biôé bi ne kate bôte ba fombô wo.

“Que révèle ma façon de m’habiller?” (Ô ne koone nye anjeñe mefoé dangan)

Amu jé e ne mfi na ô taté fas ôsusua na wo tyi’i na wo kañe biôm nyule jôé?

“Tatouages : qu’en dit la Bible ?” (Ô ne koone nye anjeñe mefoé dangan)

Yene’e miñye’elane ya Kalate Zambe mife mi ne volô wo na ô nyoñ mbamba mintyi’an.

“Ye fatane ngômesane jôé ja ve Yéhôva duma?” (Nkume mmombô a bete ya Ngon ébulu, mbu 2016)

Aval avé minga éziñ a nga tyendé ôsimesane wé a lat a mbot a nyanga?

“Je croyais que la coquetterie était condamnable (Vee ôyo! ya Ngon awôm a baa é too melu 22, mbu 2003)