NLÔ AJÔ 49
Aval avé nda bôte jôé é ne nyiñe meva’ été?—Ngab 1
Mimfefé beluk ba yi na ava’a be nga bi môs alu’u dap e tabe nnôm éto. Jam ete e ne ngule ya boban. Bekristen be lu’aneya den a nto abui mimbu a be veya ngule ya tôñe miñye’elane ya Kalate Zambe ba kôme yeme na jam ete e ne ngule ya boban.
1. Melebe mevé Kalate Zambe a ve beyôm?
Yéhôva a nga ve beyôm mbe’e ya wulu nda bôt. (Lañe’e Beéphésien 5:23.) Yéhôva a yi na be nyoñe mintyi’an mii bo mfi asu nda bôt ése. Kalate Zambe a jô beyôme na: “Nyeka’ane benyo beya.” (Beéphésien 5:25) Nalé a tinan aya? Mbamba nnôm a voñôlô minga wé éyoñ ése, éyoñ be ne étam, a éyoñ be ne bôt été. A ba’ale minga wé mvo’é, a jeñe fe na a ve nye nlem avak a na a jale miñyiane mié. (1 Timothée 5:8) Ve jam da dañe mfi e ne na a volô minga wé na a bi mbamba élat a Yéhôva. (Matthieu 4:4) Éve’an é ne na, a ne ye’elane Yéhôva a lañ Kalate Zambe ba nye nsamba. Éyoñ nnôm a nyoñ ngap a minga wé a nye’an ôse, émien a ba’ale mbamba élat a Yéhôva.—Lañe’e 1 Pierre 3:7.
2. Melebe mevé Kalate Zambe a ve beyal?
Kalate Zambe a jô minga na a “semé nnôme wé.” (Beéphésien 5:33) Aval avé a ne bo de? A ne simesane mbamba mefulu nnôme wé a bili, a ngul ése a ve asu na a toñe nye a bone bap. A ne fe liti na a semé nnôme wé éyoñ a su’u mintyi’ane mié, éyoñ a kobô nye évôvoé été, a éyoñ a se’e nye, to’o nnôme wé a kañe ki Yéhôva.
3. Aval avé belu’u be ne yemete nda alu’u jap?
Kalate Zambe a jô na nnôm ba ngal “ba ye bo nsône wua bebaane.” (Matthieu 19:5) Nalé a tinane na, ba yiane wosan jam ese e ne bo na be kandan. Be ne kui na be bo de nge ba lôt éyoñ nsamba, a nge ba laan éyoñ ése, môt ase a kôme’e kate nyi mbok mam me ne nye nlem été. Ane ô vaa Yéhôva, teke môt mfe nge ke jôm éfe é ne mfi mise me môt a ne nlu’an a lôte nnôm wé nge ke minga wé. Beluk ba yiane fe kôme tabe ntyel ya bo môt mfe ayas.
TUKA’A FAK
Fombô’ô miñye’elan ya Kalate Zambe mi ne yemete alu’u denan.
4. A beyôm, mia yiane nye’e benyo beyal a nyoñ ngap a be
Kalate Zambe a jô na beyôm “ba yiane nye’e beyale bap aval ane menyôle mape bebien.” (Beéphésien 5:28, 29) Nalé a tinan aya? Futi’i VIDÉO, mvuse ya valé, yala’ane nsili wo tôé.
Aval avé nnôm a ne liti na a nye’e minga wé a na a nyoñ ngap a nye?
Lañe’e Becolossien 3:12, mvuse ya valé, yala’ane nsili wu:
Aval avé nnôm a ne liti mefulu mete nda alu’u jé?
5. A beyal, mia yiane nye’e benyo beyôm a semé be
Kalate Zambe a lebe minga ase na a semé nnôme wé, a kusa bo mbo ésaé Yéhôva nge momo. Lañe’e 1 Pierre 3:1, 2, mvuse ya valé, yala’ane minsili mi:
Nge nnôm wôé a nji bo Ngaa Yéhôva, teke bisô na nkômbane wôé ô ne na nye fe a bo mbo ésaé Yéhôva. Jé wo simesane na e ne vôlô nye nya mvolane, ye na ô kañete nye mejô me Zambe éyoñ ése, ye na ô bi mbamba ntaban a semé nye? Amu jé wo simesane nalé?
Nnôm ba ngal be ne nyoñe mbamba mintyi’an éyoñ ba bo de nsamba. Ve e ne kui biyoñ biziñe na minga a bo teke kui tyiñ a nnôm wé. Éyoñe nalé a kui, minga a ne kate nnôm wé ôsimesane wé évôvoé été a ésemé ése, ve a yiane yeme na Yéhôva a nga ve nnôme wé mbe’e ya nyoñe mintyi’an mii dañe bo mfi asu nda bôt. A yiane ve ngule ya su’u mintyi’an nnôm a te nyoñ. Éyoñ a bo nalé, nda bôte jé ése ja bu’uban mevak. Lañe’e 1 Pierre 3:3-5, mvuse ya valé, yala’ane nsili wu:
Yéhôva a wô’ôtan aya éyoñ minga a semé nnôme wé?
6. Ô ne dañ minju’u wo tôbane mie nda alu’u jôé
Teke nda alu’u éziñ é ne teke tôbane minjuk. Ajô te, belu’u ba yiane ve ngule na be dañe minju’u mise ba tôbane mie nsamba. Futi’i VIDÉO, mvuse ya valé, yala’ane minsili mia tôé.
Jé ja liti na belu’u bete be nji be be beta bi ngul élat?
Mam mevé be nga bo asu na be yemete élate jap?
Lañe’e 1 Becorinthien 10:24 a Becolossien 3:13. Éyoñ ô lañeya éfuse jia, ô yalane nsili wu:
Aval avé melebe me ne éfuse ji me ne yemete nda aluk?
Kalate Zambe a jô na môt ase a yiane wumulu nyi mbok. Nalé a tinane na, bia yiane bo mbamba nlem a bôte bevok a semé be. Lañe’e Beromain 12:10, mvuse ya valé, yala’ane minsili mi:
Ye nnôm nge ke ngal a yiane yange na môt mbo’o nnye a taté wumulu nye? Amu jé wo yalane nalé?
BÔTE BÉZIÑ BA JÔ NA: “Bia môte wom bi nji beta bi ngul élat aval ane melu mvus.”
Aval avé ô ne liti be na Kalate Zambe a ne volô be?
ÔBALEBAS
Nnôm ba ngal be ne bu’uban mevak nge ba nye’esan, môt ase a semé’é nyi mbok, be tôñe’e fe miñye’elane ya Kalate Zambe.
Ô ne yalan aya?
Aval avé nnôm a ne bo na nda bôt é nyiñe meva’ été?
Aval avé minga a ne bo na nda bôt é nyiñe meva’ été?
Nge ô ne nlu’an, miñye’elane ya Kalate Zambe mivé mi ne yemete nda alu’u jôé?
MAM MEFE ME NE VOLÔ WO
Yene’e bone be mam ô ne bo asu na ô bu’uban alu’u dôé.
Vô’ôlô’ô mbamba jia a liti bibotan ô ne bi nda alu’u jôé éyoñ wo tôñe miñye’elane ya Kalate Zambe.
Jé ja tinane na e sulu womien si éjôé be nnôm?
Jé é nga volô belu’u béziñe na be dañe beta minju’u be nga tôbane mie nda alu’u jap a na be bo teke tyam alu’u dap?.