7. Metiñe ya Éjôé Zambe ma dañe metiñe ya bijôé ya émo ji

Bijôé bi wô’ô telé metiñ asu na be volô bôte bese be ne éjôé jabe si. Éjôé Zambe fe é bili metiñ, a bôte ba kômbô tabe éjôé éte si ba yiane tôñ me. Lañe’e 1 Becorinthien 6:​9-​11, mvuse ya valé, yala’ane minsili mi:

• Wo simesane na émo ja ye funane jé nge bôte bese ba tôñe metiñe me Zambe?a

• Ye wo simesane na Yéhôva a yiane telé metiñ asu bôte ba ye nyiñ Éjôé jé si? Amu jé?

• Jé ja liti na bôte ba semé ki metiñe mete be ne su’ulane kôñelane minlem a tôñe me?​—Fombô’ éfus 11.

Bôte béziñ ba wô’ ôsone ya kobô ajô nkeane binoñ. Ve éyoñ Bible a kobô ajô ete, a bo de bôsa a ésemé ése. Mam a jô me ne asu mfi wongan a ma wô’é ne sañesañ, amu Yéhôva nnye a ne Nté wongan. Nnye a yeme mam me ne mvo’é asu dangan. A liti bia mam bi ne bo asu na bi ve nye nlem avak, a mam me ne volô bia na bi bu’uban ényiñ nnôm éto.

1. Aval avé Yéhôva a yene nkeane binoñ?

Nkeane binoñ ô ne mbamba dase Yéhôva a nga ve bone be bôt. A yi na fam ba minga be ne nlu’an mbe be bu’uban das ete. Ane ô vaa na das ete da volô belu’u na be biaé bon, da volô fe be na be yemete nye’an ô ne zañe jap. Jôme te nje Kalate Zambe a jô na: “Ô va’ak a minga ô nga luk ô to ndôman.” (Minkana 5:​18, 19) Yéhôva a yi na Kristen é ne nlu’an é nye’e ve môt é nga luk, nalé é volô nye na a bo teke bo mejian.​—Lañe’e Behébreu 13:4.

2. Jé é ne mvine mam ya bisôk?

Kalate Zambe a jô na: “Bebo mangan . . . ba ye nyoñ ngap [Éjôé] Zambe.” (1 Becorinthien 6:​9, 10) Bôte be nga tili Kalate Zambe nkobô Grec ba belan éfia pornéïa asu ya na be kobô ajô mvine mam ya bisôk. Éfia éte ja nambe fe (1) mbia nkeane binoña zañe bôt be nji bo nlu’an, (2)  befam ba jô’ôbô a befam nge ke binga ba jô’ôbô a binga, a (3) bôte ba jô’ôbô a betit. Bii ve Yéhôva nlem avak a bii sa’ale abui minjuk nge bia semé memvinda me Yéhôva a lat a nkeane binoñ​—1 Bethessalonicien 4:3.

TUKA’A FAK

3. Tubu’u mvine mame ya bisôk

Joseph, mbo ésaé Yéhôva éziñ a nga tube mvine mame ya bisôk. Lañe’e Metata’a 39:​1-​12, mvuse ya valé, yala’ane minsili mi:

• Jé é nga bo na Joseph a tup?​—Fombô’ éfus 9.

• Ye wo simesane na Joseph a nga nyoñe mbamba ntyi’an? Amu jé?

VIDÉO: Tube’e mbia nkeane binoñ (5:​06)

Yéhôva a yi na bia bese bi tube mvine mame ya bisôk. Lañe’e 1 Becorinthien 6:​18, mvuse ya valé, yala’ane minsili mi:

• Jé é ne bo na môt éziñ a bo mvine mame ya bisôk?

• Aval avé ô ne tube mvine mame ya bisôk?

4. Ô ne ngule ya tube mvine mam ya bisôk

VIDÉO: Kalate Zambe a ne wo ve ngule ya tube mvine mame ya bisôk (3:​02)

• Jé mojañ ya vidéo nyi a ke bo éyoñ a yeneya na mbia b’asimesan a mam a mbe a bo’o bi ne tindi nye na a bo mejian?

To’o benya Bekristen fe be wô’ô biban biyoñe biziñ asu na be ba’ale asimesane dap mfuban. Jé é ne volô wo na ô wosane mbia b’asimesan? Lañe’e Bephilippien 4:​8, mvuse ya valé, yala’ane minsili mi:

• Aval mam avé bia yiane simesan?

• Aval avé éyoñe bia lañe Kalate Zambe mban a éyoñe bia jeñe na bi bi abui mam ya bo ésaé Yéhôva, nalé a ne volô bia na bi bo teke sem?

5. Memvinda me Yéhôva me ne asu mfi wongan

VIDÉO: Bo’o fek (9:​31)

• Aval avé ndôman éte é nga telé ébien mbia été?​—Fombô’ô Minkana 7:​8, 9.

• Minkana 7:​23, 26 a liti na mvine mame ya bisôk é ne soo bia abui minjuk. Minju’u mivé bi ne sa’ale nge bia ba’ale biabebien mfuban mfa’a ôte?

• Éyoñ bia ba’ale biabebien mfuban mimfa’a mise, aval avé nalé a ne volo bia na bu’uban ényiñ nnôm éto?

Bôte béziñ ba jô na Kalate Zambe a beté ôdo’é éyoñ a tyili nkeane binoñ zañe befam befam nge ke binga binga. Ve Yéhôva, Zambe ya nye’an, a yi na môt ase a bu’uban ényiñ nnôm éto. Ajô te, nge bia yi na bi bi ényiñe ya melu mese, bia yiane semé memvinda mé. Lañe’e 1 Becorinthien 6:​9-​11, mvuse ya valé, yala’ane nsili wu:

• E mise me Zambe, ye nkômbane ya ke binoñ zañe befam befam nge ke binga binga ñwô étam bia yiane sa’ale?

Asu na bi ve Yéhôva Zambe nlem avak, bia bese bia yiane bo mintyendan binyiñe biangan. Ye e ne mfi na bi ve ngule ya bo de? Lañe’e Besam 19:​8, 11, mvuse ya valé, yala’ane minsili mi:

• Ye wo simesane na memvinda me Yéhôva me ne ayaé ya tôñ? Amu jé?

ÔBALEBAS

Nkeane binoñ ô ne dase Yéhôva a nga ve nnôm ba ngal asu na be bu’uban alu’u dap.

Ô ne yalan aya?

• Jé ba loone na mvine mam ya bisôk?

• Jé é ne volô wo na ô sa’ale mvine mam ya bisôk?

• Bibotane bivé bia bi éyoñ bia tôñe memvinda me Yéhôva?

MAM MEFE ME NE VOLÔ WO

Yene’ amu jé Yéhôva a yi na fam ba minga ba kômbô nyiñe nsamba be taté lu’an.

“Vivre en couple sans être mariés : Qu’en dit la Bible ? (Ô ne koone nye anjeñe mefoé dangan)

Éyoñe Kalate Zambe a jô na nkeane binoñ zañ befam befam nge ke binga binga ô ne abé, nalé a tinane ki na bia yiane vini bôte ba bo mam mete.

“L’homosexualité : est-ce mal ?” (Ô ne koone nye anjeñe mefoé dangan)

Yene’ aval avé metiñe me Yéhôva a lat a fatane nkeane binoñ ése me ne bo na bi sa’ale abui minjuk.

“Les relations buccogénitales sont-elles vraiment des relations sexuelles?” (Ô ne koone nye anjeñe mefoé dangan)

Lañe’e nlô ajô ô ne na, “Ils ont respecté ma dignité,” a yene jam e nga tindi fam éziñ é mbe é bili fulu ya jô’ôbô a befam bevo’o na é tyendé mbia fulu ate, a ve Yéhôva nlem avak.

“La Bible transforme des vies” (Nkume mmombô a bete ya Ngone nyini é too alu 1, mbu 2011)

Si se meku’u menyin, bôte be bili asimesane meval meva a lat a nyuane meyok. Bôte béziñ ba nye’e be nya’a bone meyok éyoñ ba vôman a bemvôé bap. Ba bevo’o ba tyi’i na ba nambe ki atoé meyok. Wônaa bevo’o ki ba nyu meyok mbia nyuan. Ôsimesane Kalate Zambe ô ne ôvé a lat a nyuane meyok?

1. Ye nyuane meyok ô ne abé?

Kalate Zambe a tyili ki nyuane meyok. Ajô te éyoñ Kalate Zambe a lañ mbamba be mam Yéhôva a nga ve bia; a jô fe na “vin ja ve nleme môt avak.” (Besam 104:​14, 15) Kalate Zambe a kobô ajô bebo bisaé be Yéhôva béziñ be nga nyu meyok.​—1 Timothée 5:​23.

2. Melebe mevé Bible a ve bôte ba tyi’i na ba nyu meyok?

Kalate Zambe a tyili mbia nyuan a nso’ane meyok. (Begalate 5:​21) A jô na: “Te tabe nsamba bôt ba dañe nyu vin.” (Minkana 23:20) Ajô te, éyoñ wo tyi’i na wo nyu meyok, to’o wo bo de vôm ô ne étam, wo yiane ki nyu aval e ne na, ô nga viane jô bijôjô, nge bo mam ma yiane ki, nge taté na wo ndemetan, nge ke balé womien meveñ. Éyoñe bia yene na bi ne avale môt e ne na, ane a taté na a nyu meyok, a nga viane tulan abo dumba, bia yiane jiba tyi meyok.

3. Aval avé ô ne semé mintyi’an bôte bevo’o ba nyoñ a lat a nyuane meyok?

Môt émien nnye a yiane tyi’i nge a nyu meyok nge momo. Nge môt a nyoñe ntyi’ane na a nyu meyok teke beté ôdo’é, bia yiane ki ve nye bijô. Nde fe, bia yiane ki yemete môte na a nyu meyok, a too ke na a kômbô ki me nyu. (Beromain 14:10) Bia tyi’i fe na bia nyu ki meyok nge jam ete e ne ndeñele bôte bevok. (Lañe’e Beromain 14:21.) Bia yi na bi tôñ abendé ya Kalate Zambe di: “Môt a bo’o te jeñ mvaé jé émien, ve môt ase a jeñe’ mvaé bôte befe.”​—Lañe’e 1 Becorinthien 10:​23, 24.

TUKA’A FAK

4. Wo yiane nyoñ ntyi’an nge wé nyu meyok

Aval avé Yésus a mbe a yene’e nyuane meyok? Asu na ô bi éyalane ya nsili ôte, yene’ asimba ôsu Yésus a nga bo. Lañe’e Jean 2:​1-​11, mvuse ya valé, yala’ane minsili mi:

• Asimba ete da liti bia na Yésus a yen meyok a ba ba nyu meyok aya?

• Mbôle Yésus a nji tyili nyuane meyok, aval avé Bekristene ba yiane yen môt a tyi’i na a nyu meyok?

To’o Kristen é ne fili ya nyu meyok, nalé a tinane ki na ja yiane nyu éyoñ ése. Lañe’e Minkana 22:​3, mvuse ya valé, yene’e mam méziñ me ne bo na ô nyoñ ntyi’an ya nyu nge momo:

• Wo zu dutu ébi’iti éziñ nge ke belane minsini.

• Ô ne abum.

• Dokita a nga tyili wo meyok.

• Wo kate kui na ô jôé womien éyoñ ô tatéya na wo nyu

• Atiñe ya si ô too da tyili wo nyuane meyok.

• Wo nyiñ a môt a nga nyoñ ntyi’ane na a ye ke beta nyu meyok, amu a mbe a nya’a mbia nyuan.

Éyoñ bo abô’ô aluk nge ke ébek éfe, ye wo yiane ve bôte meyok? Asu na ô yem jam e ne volô wo na ô nyoñe mbamba ntyi’an, futi’i VIDÉO.

VIDÉO: Ye ma yiane ve bôte meyok? (2:41)

Lañe’e Beromain 13:13 a 1 Becorinthien 10:​31, 32. Éyoñ ô lañeya éfuse jia, ô yalane nsili wu:

• Aval avé miñye’elane ya éfus éte mi ne volô wo na ô nyoñ ntyi’an wo ye ve Yéhôva nlem avak?

5. Tyi’i abim meyok wé nyu

Nge wo nyoñ ntyi’an ya nyu meyok, te vuane jam di: Yéhôva a tyili ki bia meyok, ve a tyili mbia nyuane meyok. Amu jé? Lañe’e Osée 4:​11, 18, mvuse ya valé, yala’ane nsili wu:

• Jé é ne kui éyoñ môt a nyu meyok mbia nyuan?

Jé é ne volô bia na bi bo teke nyu mbia nyuan? Bia yiane yeme minné miangan. Lañe’e Minkana 11:​2, mvuse ya valé, yala’ane nsili wu:

• Amu jé é ne mfi na ô tyi’i abim meyo’o wé bo ô nya’ak?

6. Jé é ne volô môte na a telé mbia nyuane meyok?

VIDÉO: ‘Me mbe teke fe beta jibi fatan ényiñe jam’ (6:32)

• Aval avé Dmitry a mbe a bo’o éyoñ a maneya nyu meyok?

• Ye a nga kui na a ji’a telé nyuane meyok?

• Jé é nga volô nye na a su’ulane kôlô éto ôlo meyok?

Lañe’e 1 Becorinthien 6:​10, 11, mvuse ya valé, yala’ane minsili mi:

• Amu jé nso’one meyok ô ne abé?

• Jé ja liti na môt a nyu meyo’o mbia nyuan a ne ngule ya tyendé?

Lañe’e Matthieu 18:​8, mvuse ya valé, yala’ane nsili wu:

• E ‘tyi’i wo’ a tinane na bia nyume biabebien mam asu na bi ve Yéhôva nlem avak. Jé ô ne bo nge wo juan a fulu ya nyu meyok mbia nyuan?a

Lañe’e 1 Becorinthien 15:​33, mvuse ya valé, yala’ane nsili wu:

• Jé é ne kui wo nge wo yeñ a bôte ba nyu meyok mbia nyuan?

ÔBALEBAS

Yéhôva a nga ve bia meyok asu na me ve bia ava’a nlem, ve a tyili mbia nyuane meyok a nso’one meyok.

Ô ne yalan aya?

• Jé Kalate Zambe a jô a lat a nyuane meyok?

• Amu jé é ne abé na môt a nyu mbia nyuan?

• Aval avé bi ne semé mintyi’an bôte bevo’o ba nyoñ a lat a nyuane meyok?

MAM MEFE ME NE VOLÔ WO

Aval avé bisoé bi ne nyoñe mbamba mintyi’an a lat a meyok?

Taté’é fas ôsusua na wo nyoñ élaé (2:31)

Yene’e mam ô ne bo asu na ô telé mbia nyuane meyok.

“Quelle place l’alcool a-t-il dans votre vie ?” (Nkume mmombô a bete ya Ngon ôsu é too 1, mbu 2010)

Ye Kristen é ne bete élaé jé yôp ôsusua na ja nyu meyok?

“Questions des lecteurs” (Nkume mmombô a bete ya Ngone baa é too melu 15, mbu 2007)

Lañe’e nlô ajô ô ne na “Tout semblait me réussir,” asu na ô yen aval avé môt éziñ a nga telé mbia nyuane meyok,

“La Bible transforme des vies” (Nkume mmombo a bete ya Ngone tane é too alu 1, mbu 2012)

To’o bia nye’e Yéhôva nya nye’ane a na bia ve ngul ése na bi sa’ale mam ma bo nye nlem mintaé, e ne kui na bi kop. Ve minsem miziñ mi ne abé adañe mi mivok. (1 Becorinthien 6:​9, 10) Nge wo te bo beta nsem, te ve’ele buni na Yéhôva a nye’e ki fe wo; a ne ôjeja’a ya jamé wo a volô wo.

1. Jé bia yiane bo asu na Yéhôva a jamé bia?

Bôte ba nye’e Yéhôva be wô’ô wôk nlem mintaé éyoñ ba yemelane na ba te bo beta nsem. Ve ba beta bi ngule nyul éyoñe ba simesane ngaka’a Yéhôva a nga bo ayoñ dé na: “A kôsa bo mam m’abé menan me nto évele ne tyañ, ma ye bo éfumulu aval ane sut.” (Ésaïe 1:​18) Nge bia kôme jôban nsem bi nga bo, Yéhôva a ye jamé bia. Aval avé bi ne liti na bia jôban? Bia yiane wô’ô mbia jam bi nga bo angôndô ya abé, a telé mbia mboon ate, bi sili fe Yéhôva njaman. Mvuse ya valé, bia yiane ve ngul ése asu na bi tyendé asimesane nge ke mimboone mi nga tindi bia na bi sem, a ve ngule ya tôñ miñye’elan mi Yéhôva.​—Lañe’e Ésaïe 55:​6, 7.

2. Aval avé Yéhôva a belane bemvendé na a volô bia éyoñe bia te sem?

Nge bia te bo beta nsem, Yéhôva a jô bia na bi ‘loone bemvendé ya [akônda].’ (Lañe’e Jacques 5:​14, 15.) Bemvendé bete ba nye’e Yéhôva a ba nye’e fe bebo bisaé bé. Yéhôva a nga yañele be asu na be volô bia na bi beta bi mbamba élat a Nye.​—Begalate 6:1.

Nde ñhe, aval avé bemvendé ba volô bia éyoñe bia te bo beta nsem? Bemvendé bebaé nge belal be ne lebe bia a zene ya Kalate Zambe. Be ne liti bia jam bi ne bo asu na bi bo teke beta bo nsem ôte. E ne kui na bemvendé be vaa môt akônda éyoñ a te bo beta nsem teke kômbô tyendé, asu na be kaman akônda.

TUKA’A FAK

3. Kula’ane jam wo te bo, ndemben ô kôm élat jôé a Yéhôva

Nsem ôse bia bo wo taé Yéhôva nlem, ajô te, e ne mvo’é na bi kate nye wô. Lañe’e Besam 32:​1-5, mvuse ya valé, yala’ane nsili wu:

• Amu jé é ne mfi na bi mem minsem miangan be Yéhôva a lôte na bi solé mie?

VIDÉO: “Bôte Yéhôva a nye’e, mbe bete a lep” (3:01)

• Aval avé bemvendé be nga volô Canon na a bulane be Yéhôva?

Bia yiane yoé bemvendé nlem wongan a kate be mame zôsô été, amu be ne valé asu na be volô bia. Lañe’e Jacques 5:​16, mvuse ya valé, yala’ane nsili wu:

• Amu jé da ye bo tyi’ibi asu bemvendé na be volô bia nge bia kate be mam zôsô été?

4. Yéhôva a ne mvam a bebo minsem

Nge môt a te bo beta nsem, éyoñe te a bene tôñe memvinda me Yéhôva, ba ye vaa nye akônda a bia ye ke beta yeñ a nye. Lañe’e 1 Becorinthien 5:​6, 11, mvuse ya valé, yala’ane nsili wo tôé valé:

• Fo’o ve aval ane mvusu a vusu fembé, jé ja ye boban akônda nge bia ke ôsu a yeñ a môt a te tebe feñ?

Aval avé avale Yéhôva a nyoñe bebo minseme da liti na a ne mvam, nye’an a na a wô’ô be?

5. Yéhôva a jamé bia éyoñ bia jôban abé dangan

Yésus a nga belan éve’ela ja volô bia na bi wô’ avale Yéhôva a wô’ôtan éyoñ môt a bulane be nye. Lañe’e Luc 15:1-7, mvuse ya valé, yala’ane nsili wu:

• Jé nalé a ye’ele wo a lat a Yéhôva?

Lañe’e Ézéchiel 33:11, mvuse ya valé, yala’ane nsili wu:

• Jé bia yiane bo asu na bi liti na bia kôme jôban?

ÔBALEBAS

Nge bia te bo beta nsem a kôme jôban a nleme wongan ôse, bi tyi’i fe na bia ye ke beta bo mbia jam ate, Yéhôva a ye jamé bia.

Ô ne yalan aya?

• Amu jé e ne mfi asu dangan na bi mem minsem miangan be Yéhôva?

• Jé bia yiane bo asu na Yéhôva a jamé bia?

• Nge bia te bo beta nsem, amu jé bia yiane ke jeñ mvolan be bemvendé?

MAM MEFE ME NE VOLÔ WO

Yene’ avale Yéhôva a nga liti môt éziñ fulu nkoon éngôngol aval Ésaïe 1:18 a jô.

Te sôô môs éziñe na Yéhôva a ne mvam (5:02)

Aval avé bemvendé ba jeñe na be volô bôte ba bo beta minsem?

“Avale bemvendé ba mvamane bôte ba bo beta minsem a liti be nye’an” (Nkume mmombô a bete ya Ngone muamô, mbu 2024)

Yene’e avale bemvendé be ne liti na ba mvamane bôte ba bene kôñelane minlem a na ba nye’e be.

“Avale bemvendé be ne volô bôte ba vaa ékôane bekristen” (Nkume mmombô a bete ya Ngone muamô, mbu 2024)

Lañe’e nlô ajô ô ne na “Il fallait que je revienne vers Jéhovah,” asu na ô yen amu jé môt a nga lume benya mejôô mvus a nga wô’ôtane na Yéhôva a dutu nye.

“La Bible transforme des vies” (Nkume mmombô a bete ya Ngone nyini é too alu 1, mbu 2012)