E buti nlô: éyoñ évé a amu jé?

Éyoñ évé a amu jé sita a nyoñe ngap a mame ya nsisim a yiane buti nlô? Bi tame zu yene mame Paul a nga jô mfa’a ôte. A ve bia melep me ne volô bia na bi nyoñe mintyi’an mia ve Yéhôva duma. (1 Becorinthien 11:3-16) Paul a kate bia mam melal bia yiane taté fas: (1) sita a yiane buti nlô éyoñ a bo bisaé bivé ya akônda? (2) sita a yiane buti nlô éyoñ a tele bité bivé? (3) jé ja yiane tindi sita na a semé melebe mete?

Bisaé. Paul a kobô ajô bisaé bibaé: meye’elan a nkulan ajô. (Éfus 4, 5) E ne été na, meye’elan me ne ngabe jia ya ékaña’a bia ve Yéhôva. Wônaa, melu ma, nkulan ajô wo fômbô mam mese me tii a ésaé nkañete. Nde ñhe, ye Paul a kômbô jô va na, sita a yiane buti nlô éyoñ ése a ye’elan, nge ye’ele môte Bible? Momo. Bité sita a tele éyoñ a ye’elan, nge ke éyoñ a kañete, mbie bia bo na a buti nlô, nge momo.

Bité. Paul a kobô ajô bité bibaé: nda bôt a akônda. A jô na: “Nlô ya minga ô ne fam . . . minga ase a ye’elan nge kulu mejô, te yen a to nlô nsolan a jôm, a ve nlô wé ôson.” (Éfus 3, 5) Yéhôva a nga telé fam ane nlô ya nda bôt. Ajô te, minga a yiane semé éto nnôme wé; a wo’o nnôme wé ôsone nyul nge a jeñe na, a bo bisaé Yéhôva a nga ve fam nda bôt été. Bi tame jô na, a yiane bo môt ayé’é, nnôm a too. A ye liti na a semé éto nnôme wé éyoñ a buti nlô. A yiane buti nlô to’o nnôme wé a ngenan te duban, amu nnôme wé nnye a ne nlô ya nda bôt.a Nge da sili na a ye’elan, nge ke na a ye’ele, mon a too, nge mon ate a dubaneya, a yiane buti nlô, ja’a a ngenane mone mongô. A ye de bo, sa ke amu na mone wé a ne nlô ya nda bôt, ve amu a semé éto Yéhôva a nga ve befam be dubaneya akônda.

Paul a kobô ajô ya akônda a jô’ô na: “Nge fam éziñ je ayené ane je asôan, bi nji bi [melebe mefe,] nalé fe [mekônda] ya Zambe [me] nji bi.” (Éfus 16) Yéhôva a nga telé befam na, mbe be wuluu mame ya akônda. (1 Timothée 2:11-14; Behébreu 13:17) Befam étam mbe be bili mbe’e ya ba’ale mintômba mi Yéhôva, amu mbe étam be ne bo bemvendé, nge ke bediakon akônda. (Mam Minlôman 20:28) Ve é ne kui na, be jô sita éziñe na, a bo ésaé fam é dubaneya ja yiane bo. Éko éziñ, é ne sili na a wuluu ésulan asu nkañete, amu mojañ a ne ngule ya bo de a se ki. Nge ke na a yiane bo môt ayé’é, fam é dubaneya é too.b Mbôl avale bisaé ete é tii a mam ma boban akônda, sita a yiane buti nlô; nalé a ye liti na, a yeme na fam nje ja yiane bo ésaé éte.

Sita a ne fe nyoñe ngab a mam mefe ya nsisim a teke buti nlô. Ane éyoñ a yalane bisulan, éyoñ a kañete menda menda a nnôm nge a mojañe mfe, nge ke éyoñ a ye’elan nge bo ayé’é mone wé a ngenane te duban. Ve é ne kui biyoñ biziñe na, sita a bo te kôme yeme jam a yiane bo; éyoñ a tele été éte, a yiane tu’a lañ bekalate befe ba kobô ajô ete.c Nge akusa bo nalé, a nji yem aval a yiane bo, a nge mone môte ya nlem a jô nye na a buti nlô, a yiane buti nlô, avale fôtô a liti.

Jam da tindi nye. Éfus 10 ja liti mam mebaé ma yiane tindi sita na a buti nlô. Ja jô na: “Minga a yiane bi ndeme ya ngu nlô wé yôp, amu beange.” Éfus éte ja taté kobô ajô “ndeme ya ngu.” Éyoñe minga a buti nlô, a liti na a semé éto Yéhôva a nga ve befam akônda. A liti fe na a nye’e Yéhôva, a na a wulu ba’aba’a a nye. Éfus éte ja jô fe na, “amu beange.” Nde bi ne sili biabebiene na: aval avé sita a liti beange mbamba éve’ela éyoñ a buti nlô?

Beange be jaéya liti na ba nye’e ba yen éyoñ bôte ba semé minta’ane mi mame ya ékôane Yéhôva, ja’ane yôp, ja’ane si. Mbamba éve’ela bôte ba liti mfa’a ôte a ne fe angôndô ya mfi asu dap. Bia yeme na beange fe ba yiane semé minta’ane mi mam mi Yéhôva, ve é nga kui na abui ya été é biasé mie melu mvus. (Jude 6) Melu ma, é wô’ô kui na beange be yene sita éziñ, a boya abui mimbu ékôane Yéhôva, a semé éto Yéhôva a nga ve mojañ éziñ, ja’a mojañ ate a nji bo atyeñ, nge ke na a nji bi abui ñyeman ane nye. É wô’ô kui kui na, sita a bo ñwo’an. Avale sita te, da ye bi éto ja dañe ji beange amu a ye jôé a Krist. Ngo’o abime mbamba éve’ela a liti beéngele éyoñ a semé éto befam be bili akônda! Nya ajô a ne na, besita bese be bili beta ma’a ya suk, a semé minta’ane mi mam mi Yéhôva nté beange ba fombô be!