Sa’ale’e mame ya émo ji

1. Alu da ôsusua na Yésus a wu, amu jé nlem ô mbe ô tyele nye yôp?

BI NE alu da ôsusua na Yésus a wu. A yeme na a mbeme wu a li’i beyé’é bé, ve nlem ô tyele nye yôp ajô ya aval ényiñe jap ja ye bo. Nde a jô be na: “Mi nji bo bôte ya [émo ji].” (Jean 15:19) Mvuse ya valé, a ye’elan Ésa wé ajô dap a jô’ô na: “Be nji bo bôte ya [émo ji], aval ane ma me nji bo môte ya [émo ji].” (Jean 17:15, 16) Jé Yésus a mbe a kômbô’ô jô?

2. Jé Yésus a loone na “[émo ji]”?

² Bifia “[émo ji]” Yésus a belane bie va, bia fombô bôte be nji yeme Zambe, bôte be ne éjôé Satan si. (Jean 14:30; Beéphésien 2:2; Jacques 4:4; 1 Jean 5:19) Aval avé bi ne bo te “bo bôte ya [émo ji]”? Kabetôlô nyi, bia ye yen aval bi ne ke ôsu a wulu ba’aba’a a Éjôé Zambe, nalé a tinane na, bia bo te nyoñe ngap a mame me pôlitik. Bia wosane nsisim ya émo. Bia yeme minné miangan mfa’a ya mbot a nyanga bia bo, bia yeme fe telé moné été jé. Bia jaé fe biôme mewosane ya nsisime Zambe a ve bia.​—Lañe’e Ayemé 16.

SU’U VE ÉJOÉ ZAMBE ÉTAM

3. Ye Bekristen ba nyoñe ngap a mame me pôlitik?

³ Éyoñe Yésus a mbe si va, a nga yene bôt be bili abui minjuk, ényiñe jap é nji be tyi’ibi. A mbe fo’o a nyoñe’e be ngap; ajô te a mbe a kômbô’ô volô be. Ve ye a mbe ntebe ôsu ya pôlitik? Momo. A mbe a yeme’e na, Éjôé Zambe étam nje é ne volô be. Yésus nnye a mbe a yiane bo Njôô ya Éjôé éte, ajô te, Éjôé Zambe nje é mbe ntene nlô ajô ya nkañete wé. (Daniel 7:13, 14; Luc 4:43; 17:20, 21) Yésus a nji nyoñe ngap a mame me pôlitik môs éziñ. Éyoñ a nga tele Ponce Pilate, Ngovina ya Rome ôsu, a nga jô nye na: ‘Éjôé jam é nji bo Éjôé ya émo ji.’ (Jean 18:36) Beyé’é bé fe be nji be be nyoñe’e ngap a mam me pôlitik. Kalate L’essor d’une civilisation a liti na, Bekristen ya ntete mimbu ôsu be “nji be be kañese’e mbe’e éziñ ô tii a mame me pôlitik.” Dene fe, benya Bekristene ba vu be. Bia su’u ve Éjoé Zambe étam.​—Matthieu 24:14.

4. Aval avé benya Bekristene ba liti na ba su’u Éjôé Zambe?

⁴ Ambassadeur a ne môt a kamane si jé éza si, nalé a tinane na a nji nyoñe ngab éziñ a mam me pôlitik ya si éte. Miñwo’an, Bekristene be bili ndi nleme ya jôé a Krist e yôp été, be tele aval été éte den. Paul a nga tili miñwo’ane mivo’o na: “Bi ne bekat mbañete señe Krist.” (2 Becorinthien 5:20) Miñwo’an mia saé señe Éjôé Zambe si va. Be ne teke nyoñe ngap a mame me pôlitik ya si nyi, be ne teke futi anyu dap mam ma fombô ngovina. (Bephilippien 3:20) Ve miñwo’ane mia volô bemillion be bôte na be yem Éjôé Zambe. “Mintômba mife,” Bekristene be bili ndi nleme ya nyiñe nnôm éto mfefé émo, mia su’u miñwo’an. Aval ane miñwo’an, mintômba mife mi ne teke nyoñe ngap a mame me pôlitik. (Jean 10:16; Matthieu 25:31-40) Bia yene fo’o na, nya Kristene éziñ a nji yiane nyoñe ngap a mam me pôlitik.​—Lañe’ Ésaïe 2:2-4.

5. Jam avé da bo na Bekristen be bo te ke bita?

⁵ Asu benya Bekristene, bebo bisaé be Yéhôva bese bevok be ne bibu’a ya nda bôte jia, be ne fe nlatan ja’a ba so bevôm mevale meval. (1 Becorinthien 1:10) Nge bia ke bita, bia ye viane wosane bibu’a ya nda bôte jangan, bebo bisaé be Yéhôva bevok, bôte Yésus a nga jô na bia yiane nye’e. (Jean 13:34, 35; 1 Jean 3:10-12) Jame da dañe dañ é ne na, Yésus a nga jô beyé’é bé na, be nye’e to’o besiñe bap.​—Matthieu 5:44; 26:52.

6. Aval avé benya Bekristene ba liti na ba semé bijôé?

⁶ Bia Bekristen bi nji yiane nyoñe ngap a mam me pôlitik, ve bia yiane ve ngule ya semé metiñe ya si bi too. Bia semé ngovina éyoñe bia bo nye mewôk a éyoñe bia ya’ane toya. Ve jame bia telé ôsu é ne na, bi ve “Zambe biôm bi Zambe.” (Marc 12:17; Beromain 13:1-7; 1 Becorinthien 6:19, 20) Biôme bite bi ne nye’an, mewôk, a ékaña’a. Bi ne nkômesane ya ve ényiñe jangan amu bia kômbô bo Yéhôva mewôk.​—Luc 4:8; 10:27; lañe’e Mam Minlôman 5:29; Beromain 14:8.

SA’ALE’E NSISIME YA ÉMO

7, 8. Jé é ne “nsisime ya émo,” aval avé wo ndamane bôt?

⁷ E kandan émo Satan, a tinane na bi bo te kañese na “nsisime ya [émo ji]” ô wulu bia. Nsisim ôte ô ne asimesan a mimboan mia so be Satan, amu nnye a jôé bôte be nji bo Zambe ésaé. Ve Bekristen ba sa’ale nsisim ôte. Aval ane Paul a nga jô, “Bi nga nyoñ, sa nsisim ya [émo ji], ve nsisim wo so be Zambe.”​—1 Becorinthien 2:12; Beéphésien 2:2, 3; lañe’e Ayemé 17.

⁸ Nsisime ya émo ñwô wo tindi bôte na be bo afom, mebun, a éngana’a. Wo bo na be buni na, be nji bo ntindane ya bo Zambe mewôk. Satan a yi na bôte be bo avale ba yi, teke bisi minjuk be ne tôbane mie. A yi na bôte be simesane na, “mbia minkômbane ya minsôn a mbia nkômbane ya mis,” mi ne mam ma dañe mfi ényiñ. (1 Jean 2:16; 1 Timothée 6:9, 10) Diable a dañe jeñe na a du’u bebo bisaé be Yéhôva asu na be yene mam ane nye.​—Jean 8:44; Mam Minlôman 13:10; 1 Jean 3:8.

9. Aval avé bi ne taté na bia bi nsisime ya émo?

⁹ Aval ane évuñelu, nsisim ya émo ô ne vôm ase. Nge bi teke jeñ a ngul ése na bi wosane wô, bia ye vebe wô. (Lañe’e Minkana 4:23.) Nalé a ne taté bone be mam, bi ne taté na bia bi asimesan a ntabane bôte be nji kañe Yéhôva. (Minkana 13:20; 1 Becorinthien 15:33) Bi ne fe taté na bia yene befam a binga minsoé, nge bo apostasie, nge ke nye’e besport ba wumulu mesengan.​—Lañe’e Ayemé 18.

10. Jé bi ne bo asu na nsisime ya émo ô bo teke mane jaé bia nlô?

¹⁰ Nde ñhe jé bi ne bo asu na, nsisime ya émo ô bo teke mane jaé bia nlô? Bia yiane subu Yéhôva bebé, a jô’é na fe’e jé é liti bia zen. Bia yiane bo mbane ya ye’elane nye na, a ve bia mbamba nsisime wé, a bo na bi bo nye ésaé a ayôñ ése. Yéhôva a ne Zambe ya ngul ése. Bi ne tabe ndi na a ne ngule ya volô bia na, nsisime ya émo ô bo teke mane jaé bia nlô.​—1 Jean 4:4.

TOBE’E MBOT WO VE ZAMBE DUMA

11. Avale biyé avé nsisime ya émo wo tindi bôte na be jaé?

¹¹ Bi ne fe liti na, bia nyoñe ngap a mame ya émo ji, a zene ya mbot a nyangan bia bo. Bôt abui ya émo ji ba jaé biyé asu ya na be bo miñyené, asu ya na be tindi bôte na be bi asimesane ya bisôk, asu ya na be liti na be ne éngana’a, nge ke asu ya na be liti na be bili abui moné. Bôte bevo’o be ne éfua. Ba jaé biyé bi ne mvit, nge ke bekuluba. Bi nji yiane vu avale bôt ete.

12, 13. Miñye’elane mivé ya Bible mia volô bia na bi tobe biyé bia ye jaé?

¹² Mbôle bi ne bebo bisaé be Yéhôva, bia yi na mbote wongan ô bo kom ése mvo’é, mfuban, abeñe ya yen, a wu wo yian a jame bia bo. Bia jaé “bijijine mengômesan a biôm bi nyanga bi ne éjijin teke dia,” asu na bi bo “mame ya Zambe.”​—1 Timothée 2:9, 10, Mfefé Nkôñelan; Jude 21.

¹³ Mbote wongan ô ne bo na bôte ba yene bia be semé Yéhôva a bebo bisaé bé nge momo. Bia kômbô bo “mam mese mfa’a ya duma Zambe.” (1 Becorinthien 10:31) E yeme minné miangan mfa’a ôte a tinane na, bi yeme tebe été bôte bevok. Nde ñhe, éyoñe bia tobe biyé bia ye jaé, bi nji yiane vuane na ntyi’ane bia nyoñ ô ne ndeñele, nge ke volô bôte bevok.​—1 Becorinthien 4:9; 2 Becorinthien 6:3, 4; 7:1.

14. Jé bia yiane taté fas ôsusua na bia tobe biyé bia zu jaé?

¹⁴ Avale biyé avé bia jaé éyoñe bia ke bisulan, nge ke éyoñe bia ke nkañete? Ye e mise mangan mbot a nyanga bi ne mfi a lôt nné? Ye biyé biangan bia kolé bôte bevok ôbak? Ye bia simesane na, fatane mbote jangan ja fombô ve biabebien sa ke bôte bevok? (Bephilippien 4:5; 1 Pierre 5:6) E ne été na môt ase a nye’e a wô’ô émiene mvaé, ve mbamba mefulu mangan mme ma bo na bôte be nye’e bia. Mefulu mete mme Yéhôva a yen éyoñ a fombô bia. Amu ma kate avale môt bi né, “nsolane môte ya nlem . . . , ñwô ô ne tañ anen mise me Zambe.”​—1 Pierre 3:3, 4.

15. Amu jé Yéhôva a nji ve bia nkobe metiñ wo liti bia biôme bia yiane jaé nge momo?

¹⁵ Yéhôva a nji ve bia nkobe metiñ wo liti bia biôme bia yiane jaé nge momo. A nga ve bia miñye’elan ya Bible mi ne volô bia na bi nyoñe mbamba mintyi’an. (Behébreu 5:14) A yi na mintyi’ane mise bia nyoñ mi bo njalan a nye’an, nye’ane bia nye’e nye a bôte bevok. (Lañe’e Marc 12:30, 31.) Si ése, bebo bisaé be Yéhôva be bili mimbot mevale meval, mbot ôse ô lu’an a metume ya si jap, a avale mimbot da ve be nleme mvaé. Nsela’ane ate a ne abeñe ya yen.

TELÉ’É MONÉ ÉTÉ JÉ

16. Aval émo ja yene moné da selan a miñye’elane mi Yésus; aval avé? Minsili mivé bia yiane sili biabebien?

¹⁶ Satan a yi na bebo bisaé be Yéhôva be buni na moné a biôme bi mo mbie bia soo mevak, ve bebo bisaé be Yéhôva ba yeme na, nalé a ne minsos. Bia buni mejô me Yésus ma: “Akum abui môt a bili, e ne te ve nye ényiñ.” (Luc 12:15) Moné a vo’o soo bia benya meva’a. A vo’o ve bia benya bemvôé, nya mvo’é ya nsisim, nge ke ényiñ ya melu mese. Moné a ne fo’o mfi, bia yi fe na bi bu’uban ényiñ. Ve Yésus a nga ye’ele bia na, bia ye bi benya meva’a nge bi bili mbamba élat a Zambe, a nge ésaé bia bo nye nje ja dañ mfi asu dangan. (Matthieu 5:3; 6:22) Sili’i womiene na: ‘Ye ma yene moné ane émo ji ja yene moné? Ye moné a ne jame ma dañe fas, nge nlô ajô ya minlañe miam?’​—Luc 6:45; 21:34-36; 2 Jean 6.

17. Nge wo telé moné été jé, aval avé ényiñe jôé j’aye dañe bo abeñ?

¹⁷ Nge ésaé bia bo Yéhôva nje bia telé ôsu, a telé moné été jé, ényiñe jangan ja ye bo abeñ. (Matthieu 11:29, 30) Bia ye vak a abime bi bili, nleme wo ye bômbô bia si ne mieññ. (Matthieu 6:31, 32; Beromain 15:13) Bia ye ke dañe tyelé nlem yôp ajô ya biôme bi mo. (Lañe’e 1 Timothée 6:9, 10.) Bia ye dañe bi bibotan amu bia ye yene mvaé ya ve. (Mam Minlôman 20:35) A fatan ényiñe jangan ja ye ve bia éyoñe ya bo mam a bôte bia nye’e. Ôyo wongan wo ye fe bo mvaé.​—Écclésiaste 5:12.

JAÉK ‘BIÔME MEWOSANE YA NSISIM BISE’

18. Satan a yi bia jé?

¹⁸ Satan a kômbô ndamane amvôé dangan a Yéhôva, jôm éte nje bia yiane bo jam ése bi ne ngule ya bo asu na, bi kamane amvôé éte. Bia yiane wosan a “mimbia minsisim.” (Beéphésien 6:12, Mfefé Nkôñelan) Satan ba mimbia minsisime mié be nji yi na bi bo mevak, ba yi ve na bi sup ényiñe ya nnôm éto. (1 Pierre 5:8) Beta mengule mete ma wosane bia, Yéhôva a ne volô bia na bi dañ mewosane mete!

19. Avale kalate Beéphésien 6:14-18 a liti, biôme bivé bi ne “biôm mewosan” bi Kristen?

¹⁹ Melu mvus, mone bezimbi a mbe a jaé’ biôme mewosan na bi kamane nye éyoñ a ke bita. Aval ete fe, bia yiane jaé “biôm mewosan bise” Yéhôva a ve bia. (Beéphésien 6:13) Mbie bia ye kamane bia. Kalate Beéphésien 6:14-18 a kobô ajô biôm mewosane bite. A jô na: “Mi teba’an, vôm mi maneya jaé benya mejôô ntiñetan angeteñ, a vôm mi maneya jaé ébene ya zôsô tôé, a vôm mi maneya jaé nkômesane ya mbamba foé mebo menane si; mi nyoñeya fe ébene ya mbunan, nje éte mi aye bo ngule ya dime je mekoñe me nduan me mbia môt ate mese. A mi nyoñan afô’ôlô ya nyian, a nkpwaté mekône ya Nsisim, ñwô ôte ô ne Mejô me Zambe: mi ye’elan biyoñe bise nsisim été.”

20. Jé bi ne bo nge bia yi na “biôm mewosan” bi volô bia?

²⁰ Nge mone bezimbi a vuane jaé jôme jia ya biôme mewosane bié, nsiñe wé a ye jeñe na a lume nye akoñ afôla ya nyule jé é nji bo mbutan. Nge bia yi na “biôme mewosane” biangan bi ba’ale bia, bi nji yiane vuane jaé to’o ve jôme jia ya été. Bia yiane jaé bie éyoñ ése, teke vaa bie môs éziñ. Bia ye ke ôsu a wosane akekui éyoñ mbia émo Satan nyi a ye tyameban, a éyoñ Satan a mimbia minsisime mié ba ye jañ nnôm éto. (Nlitan 12:17; 20:1-3) Nde ñhe nge bia wosane mbia minkômban, nge ke mbia fulu éziñ, bi nji yiane bili atek!​—1 Becorinthien 9:27.

21. Aval avé bi ne dañe mewosane me ne zañe bia be Satan?

²¹ Bia vo’o ke ve’an a Satan. Ve bi ne dañe nye a mvolane Yéhôva! Asu na bi ke ôsu a wulu ba’aba’a a Yéhôva, bia yiane ye’elane nye, bia yiane yé’é Mejô mé, a tabe bisulan a bobejañ ya nsisim. (Behébreu 10:24, 25) Mame mete mese mme ma ye volô bia na, bi ba’ale biabebiene nye’ane Zambe été, a tabe nkômesane ya kamane mbunane wongan.

TABE’E NKÔMESANE YA KAMANE MBUNANE WÔÉ

22, 23. (a) Jé bi ne bo asu na, bi tabe nkômesane ya kamane mbunane wongan? (b) Jé bia ye yene kabetôlô a zu?

²² Éyoñ ése, bia yiane bo nkômesane ya kamane mbunane wongan. (Jean 15:19) Biyoñe biziñ, ntyi’an Bengaa be Yéhôva ba nyoñ ô wô’ô selan a wu abui bôte ba nyoñ. Sili’i womiene na: ‘Ye ma kôme fo’o wôk amu jé bia bo anô si anô ka? Ye ma buni fo’o na mam Bible a ôlo ô ne mewôk a fek ba jô me ne zôsô? Ye me ne mevak ya bo Ngaa Yéhôva? (Besam 34:2; Matthieu 10:32, 33) Ye me ne timine bôte bevok mbunane wom?’​—Matthieu 24:45; Jean 17:17; lañe’e 1 Pierre 3:15.

²³ Abui biyoñ, e ne tyi’ibi ya yem avale bia yiane bo asu na bi kandan émo. Ve biyoñe biziñ, bi ne bo teke yeme ntyi’ane bia yiane nyoñ. Satan a belan abui mezene na a kpwé bia si. Mimvôman mi ne zene jia ya mezen a belane me. Aval avé bi ne tobe mbamba mimvôman? Bia ye yalane nsili ôte kabetôlô a zu.