Bo’o zôsô mam mese

Bia bese bia yi na bemvôé bangan be bo aval bôt e ne zôsô. Yéhôva fe a yi na bemvôé bé be bo nalé. Ve jam ete e nji bo tyi’ibi amu émo ji é ne njalan a bôte be ne ékotekot. Bibotane bivé wé bi nge ô ne zôsô mam mese?

1. Amu jé bia yiane bo zôsô?

Éyoñe bi ne zôsô a bôte bevok, bia liti Yéhôva na bia nye’e nye a na bia semé nye. Tame simesane jame di: Yéhôva a yeme mam mese bia fas, a ma bia bo. (Behébreu 4:​13) A yem éyoñe bia tyi’i na bia bo zôsô, a jam ete da ve nye nlem avak. Kalate Zambe a jô na: “Ékotekote môt é ne mbia jôm be Yéhôva; ve a ñbwaane bôt be ne [zôsô].”​—Minkana 3:​32.

2. Jé bi ne bo asu na bi liti na bi ne zôsô?

Yéhôva a yi na ‘môt ase a kobô môt ba nye be to benya mejôô.’ (Zacharie 8:​16, 17) Nalé a tinan aya? Éyoñe bia kobô a bôte ya nda bôte jangan, nda bisaé, bobejañ a besita, nge ke betebe ôsu ya émo ji, bia yiane ki laane minsos nge ke kate be mefoé mé joñôlô be. Bôte be ne zôsô ba wube ki bôte bevok, nge ke du’u be. (Lañe’e Minkana 24:28 a Beéphésien 4:​28.) A ba ya’ane fe abime toya ba yiane ya’an. (Beromain 13:​5-7) Bia yiane ve ngule ya “tabe ane da yian mfa’a ya mam mese.”​—Behébreu 13:18.

3. Amu jé é ne mfi na bi bo zôsô?

Éyoñe bi ne zôsô, bôte bevo’o bé tabe bia ndi. Bia volô fe môt ase na a kômbô tabe akônda été, a na a wô’ôtane na a ne nda bôte jé. Bii bi fe mone môte ya nlem a too mfuban. Éyoñe bi ne zôsô, bia “jalé ñye’elane Zambe, Nyii wongan abeñ mimfa’a mise,” a bia ve bôte bevo’o nkômbane ya kañe Yéhôva.​—Tite 2:​10.

TUKA’A FAK

4. Yéhôva a wô’ô mvaé éyoñe bi ne zôsô

Lañe’e Besam 44:21 a Malachie 3:​16, mvuse ya valé, yala’ane minsili mi:

• Amu jé bia yiane ki buni na bi ne solé Yéhôva jam éziñ?

• Aval avé Yéhôva a wô’ôtan éyoñe bia tobe na bia kobô benya mejôô, to’o éyoñe nalé a nji bo tyi’ibi?

5. Bo’o zôsô éyoñ ése

VIDÉO: Mam mevé ma soo bia mevak?​—Mbamba mone môte ya nlem (2:​32)

Lañe’e Behébreu 13:​18, mvuse ya valé, yene’ aval avé ô ne bo zôsô . . .

• nda bôte jôé.

• nda bisaé nge ke sikôlô.

• mimfa’a mife.

6. Bibotane bia bi éyoñe bi ne zôsô

Bi ne taté simesane na éyoñ bi ne zôsô, nalé a soo bia minjuk. Ve mvus ayab éyoñ bii yene na, mboon ôte ñwô ô ne mvo’é. Lañe’e Besam 34:​12-​16, mvuse ya valé, yala’ane nsili wu:

• Amu jé bia bi mbamba ényiñ éyoñe bi ne zôsô?

1. Nnôm ba ngal ba yemete élate ya nda alu’u jap éyoñe be ne zôsô

2. Éyoñe mbo ésaé a ne zôsô, masa wé a tabe ndi a nye

3. Betebe ôsu ya émo ji ba nye’e bôte be ne zôsô

ÔBALEBAS

Yéhôva a yi na bemvôé bé be bo zôsô éyoñ ése ba jô nge ke bo jam éziñ.

Ô ne yalan aya?

• Jé bi ne bo asu na bi liti na bi ne zôsô?

• Amu jé bia yiane ki simesane na bi ne solé Yéhôva jam éziñ?

• Amu jé é ne mfi na ô bo zôsô éyoñ ése?

MAM MEFE ME NE VOLÔ WO

Aval avé bebiaé be ne ye’ele bone bap na be bo zôsô?

obô’ô ve benya mejôô (1:44)

Amu jé é ne mfi na bi tôé bengaka’a bese bia bo?

E tôé bengaka’a bangan a soo bibotan (9:09)

Yene’ amu jé bia yiane ya’ane toya to’o ngovina a yeme ke belane moné ate.

“Faut-il payer ses impôts ?” (Nkume mmombô a bete ya Ngon ébulu é too alu 1, mbu 2011)

Jé é nga volô ékotekote môt éziñe na é tyendé, a bo mam me ne zôsô?

“J’ai découvert la miséricorde et le pardon de Jéhovah” (Nkume mmombô a bete ya Ngone tane é too alu 1, mbu 2015)