3. Beza ba ye bi mefulu ya 2 Timothée 3:2-5?

³ Paul a nga tili na, “melu me asu’ulan mbia biyoñ bi aye bo.” A nga lañe mbia mefulu 19, a jô’ô na bôte ba ye bi me melu mangane ma. Mefulu mete ma funane ma bia koone me Beromain 1:29-31, ve bifia biziñ Paul a belane bie Timothée baa, bi nji yené bifuse bife ya éfase Kalate Zambe é nga tilibane nkobô Grek. Paul a taté na a lañe mbia mefulu mete a jô’ô na “bôt be aye . . .” Ve nalé a nji tinane na bôte bese mbe ba ye bi mefulu mete. Beta nsela’ane a ye yené zañe Bekristen a bôte bevok.​—Lañe’e Malachie 3:18.

4. Bôte be ne mebun be ne aya?

⁴ Ôsusua na a jô na bôte ba ye nye’e bebien a bo ôzañ akum, Paul a nga tili na ba ye wumulu bebien, ba ye bo mebun, a ba ye bo “njalan a mebun, MN;” mefulu mete me wô’ô yené be bôte ba bete bebiene yôp, éko éziñ amu atyeñ mboone mam, abeñ ya ékôp, akum, nge minkôñ. Avale bôt ete da yene bebien ane bezambe. Ñyeme mam éziñ a nga kobô ajô ya môt a ne njalan a mebun, a jô’ô na: “Nlem wé été, a bili mon autel, vôm a bo a kele’e kañ émien.” Bôt béziñ ba jô fe na, mebun me ne avale nyé fulu é ne na, bôte be ne mebun bebien be ne te ke wô’an.

8. (a) Aval avé bôte béziñ ba yene ajô ya semé bebiaé den? (b) Kalate Zambe a jô bon na be bo aya?

⁸ Paul a nga liti fe avale bôte ya asu’ulan ba ye nyoñe bôte bevok. A nga tili na, melu ma su’ulan, bon ba ye bo bebiaé bap melo. Akusa bo bekalate a bingeñgeñ biziñ, bia ye’ele bongô na be biasé bebiaé bap, nya ajô a ne na, éyoñ bongô be ne ébiasé, nalé a soo jo’ojo’o menda me bôt, a too ke na, élate ya menda me bôt é ne nya mfi, ja’a mise me éjôé. Jam ete da so ôteñ. Melu mvus, éjôé ya Grèce é mbe é tita’ane môt a bôm bebiaé bé; atiñe ya Rome ki é mbe é jô’ô na, nyô a bôme mbiaé a nyi a wôé môt, bese be ne avale da. Éfase Kalate Zambe é nga tiliban nkobô Hébreu, a ji ya nkobô Grek, bise bia liti na, bon ba yiane semé bebiaé bap.​—Nk. 20:12; Beép. 6:1-3.

10, 11. (a) Mefulu mevé ma liti na bôte be nji nye’esan? (b) Abim avé Bekristen ba nye’e bôte bevok?

¹⁰ Paul a nga lañe mefulu mefe ma liti na bôte ba ye bo te nye’e ba bevok. Éyoñ a maneya jô na bone ba ye “bo bebiaé bap melo,” a nga kobô ajô bikalak, a kômbô’ô liti na, bôt ba ye bo te bisi mvaé ba bo be. Bôte ba ye fe bo “te ba’ale élat, MN.” Ba ye bo minziziñ, ba ye nye’e be nyiñe mejô été, teke jeñe na be kôme me. Ba ye bo ‘bekobô Zambe ébiasé’ a bekoñe bôt, ba ye ta ta Zambe, a bôte bevok. Ba ye fe bo bebo bibôta, mbo bibôta a ne môt a vañe ve bôte bevo’ éyôlé mvit.a