3. (a) Avale biyoñ avé Timothée a nga bo Kristen, aval avé a nga kañese miñye’elane be mbe be va’a nye? (b) Paul a nga se’e Timothée amu mame melal mevé?

³ Éko éziñe na Timothée a nga bo Kristen mbu 47 ya É.J., éyoñ ôsu nlômane Paul ô nga jome Lystres. Éyoñ éte, Timothée a ngenan ésoé, a mbe a tôñe’e mam a mbe a yé’é. Mvuse mimbu mibaé, nde Paul a nga nyoñe nye, a ke jome mekônda a nye. Éyoñe mimbu bebé 16 mi lôteya, Paul a nga tili Timothée na: “Tebe’e ne bip e mam ô nga yé’é a kañese ane benya mejôô été. Wo yeme be beza ô nga yé’é me. Aso ébôbo’o abialé dôé, wo yeme Mimfufube Mintilan [Mintilane mi ne nkobô Hébreu]; mi bili ngule ya ve wo fe’e ja [ye ve wo ényiñ] a zene ya mbunan ô ne be Krist Yésus.” (2 Tim. 3:14, 15, Mfefé Nkôñelan) Paul a nga tili nye na (1) a yeme Mimfufube Mintilan, (2) a nga kañese mam a nga yé’é, a (3) a nga bi fe’e ja ye ve nye ényiñ, a zene ya mbunan ô ne be Krist Yésus.

MAM Ô NGA “KAÑESE ANE BENYA MEJÔÔ”

5. (a) Jé ja tinane na, e ‘kañese benya mejôô’? (b) Jé ja kate bia na, Timothée a nga buni mam a nga yé’é a lat a Yésus?

⁵ Ñyemane ya Mimfufube Mintilan ô ne nya mfi. Ve, bebiaé ba yiane yeme belane wô asu ya na be ye’ele bone bap. Timothée a mbe fe a ‘kañese’e benya mejôô.’ Nkobô Grèk, bifia bite bia tinane na, “e tabe ndi a” nge ke “e buni, a e yeme na jôm éziñ é ne benya mejôô.” Timothée a mbe a yeme’e benya mejôô aso nkeñelé. Ve éyoñ a nga bi abime mimbu éziñ, émien a nga yiane kañese miñye’elane mite, a nga yiane fase mame ma liti na, Yésus a mbe fo’o Messie. Ñyemane wé ôte ñwô ô nga wônô mbunane wé. Ngule mbunane Timothée a mbe a bili ñwô ô nga tindi nye na, a duban, a na, a ke jome mekônda a Paul.

6. Aval avé ô ne volô mone wôé na a buni mam a yé’é?

⁶ Aval avé ô ne lôñe mbunane mone wôé asu ya na, a bi ngule mbunan ane Timothée? Jam ôsu, bo’o ôjibi. Ngule mbunane ja so ki atemetem, mbunan ô vo’o ke kôéban ane ôkon. Mongô ase a yiane belane mfasane wé na, a kañese benya mejô. (Lañe’e Beromain 12:1.) A mbiaé, ô bili beta ésaé ya bo asu ya na, mone wôé a bi ngule mbunan, e dañedañ éyoñ a sili minsili. Bi tame nyoñ éve’an.

7, 8. (a) Aval avé ésa éziñ a wô’ô bo ôjibi éyoñ a ye’ele ngone jé? (b) Amu jé wo yene na, e ne mfi na wo fe ô vu nye mfa’a ôte?

⁷ Thomas a bili ngon é ne mimbu 11, a jô na: “Éyoñe ngo jam ja sili ma na, ‘Nga e ne bo na, Yéhôva a nga jô’é na biôme bi so atemetem?’ nge ke na, ‘Amu jé bia bo ke mam méziñ a bôte bevok, ane vôt, asu na mam me tyendé?’ Biyoñe biziñe me wô’ô di anyu asu ya na, me ve nye mbamba éyalan. Nya ajôô a ne na, mbunan ô nji so amu abui ñyeman. Wo yaé ôte’ete’e ôte’etek, amu mame môt a vo’o ke sôan.”

⁸ Avale Thomas a jô, e yeme ye’ele mongô a sili ôjibi. Fulu ôjibi é ne fo’o mfi asu Bekristene bese. (Beco. 3:12) Thomas a nga yene na, asu ya na ngone jé é kañese ñye’elan éziñ, a mbe a yiane laan ajô ete a nye abui biyoñ. A mbe a yiane bo de a zene ya Kalate Zambe, asu ya na, mon a kañese ñye’elan ôte. Thomas a jô na: “Éyoñe jam da ndeñele ngone jangan e ne nya mfi, bia minga wom bi wô’o jeñe na bi yeme nge a buni mam bia ye’ele nye, a nge a kôme me wôk. Nge a sili minsili, mbamba jame le. Nya ajôô a ne na, me wô’ô ko woñ éyoñ a kañese jam éziñ teke sili minsili.”

9. Aval avé ô ne ye’ele mone wôé Mejô me Zambe?

⁹ Éyoñe bebiaé ba ye’ele bone bap a ôjibi ôse, nalé a volô bon ôte’ete’e ôte’ete’e na, be bi “ndam a nté a ôyap yôp a édok” ya miñye’elane ya Kalate Zambe. (Beép. 3:18) Bi ne jeñe mam ma yian a ôkala wop a abime ñyemane be bili. Abime mbunane wop wo yaé, abim ete fe ngule ya kamane mbunane wop fe ja yaé. (1 P. 3:15) Éve’an é ne na, ye mone wôé a ne timine jame da boban éyoñe môt a wu a zene ya Kalate Zambe? Ye a yeme wô’ô jame Kalate Zambe a jô mfa’a ôte?a E ye’ele mone wôé Mejô me Zambe été a sili fo’o ôjibi, ve ngule wo ve é nji bo zezé.​—Dt. 6:6, 7.

10. Bebiaé ba yiane fe ye’ele a zene ya jé?

¹⁰ E ne été na, mbamba éve’ela wôé a ne fe mfi, nge a volô mone wôé na a bi ngule mbunan. Stéphanie a bili bengone belal a jô na: “To’o éyoñe bengone bam be mbe be ngenane bongô, me mbe me sili’i mamiene na, ‘Ye ma laane fo’o a bone bam na, me kate be amu jé me too ndi na, Yéhôva a ne vevea Zambe, na a nye’e bia, a na, mezene mé mese me ne zôsô? Ye bengone bam ba yen abime ma nye’e Yéhôva?’ Me vo’o ke tabe ndi na, bengone bam ba ye bi mbunan nge mbunane wom mamien ô nji bo ngul.”