NLÔ AJÔ 51
Aval avé mam wo jô me ne ve Yéhôva nlem avak?
Éyoñe Yéhôva a nga té bia, a nga ve bia angôndô ya mbamba das: fane ya kobô. Ye é ne mfi mise mé na bi yeme belane das ete? Teke vaa nge beté! (Lañe’e Jacques 1:26.) Nde ñhe, jé bi ne bo asu na mam bia jô me ve Yéhôva nlem avak?
1. Aval avé bia yiane belan ôyem wongan?
Kalate Zambe a jô bia na: “Wua a lebe’e nyô mbok, a wua a volô’ô nyô mbok.” (1 Bethessalonicien 5:11) Ye wo yeme môt éziñ a yiane na be ve nye ngule nyul? Jé ô ne bo asu na môt ate a bi ngule nyul? Ô ne liti nye na wo wô’ô nye mintaé. Éko éziñ ô ne kate nye mbamba mefulu a bili wo nye’e. Ye wo simesan éfuse ya Kalate Zambe é ne volô môt éziñ? Kalate Zambe a bili abui bifus ô ne belane bie. Te vuane fe na, avale wo kobô e ne nambe bôte bevo’o nya abuii. Ajô te, jeñe’ éyoñ ése na ô belane mbamba bifia, a na ô kobô évôvoé été.—Minkana 15:1.
2. Avale minkobô avé bia yiane sa’ale?
Kalate Zambe a jô na: “Te yebane na, ébol nkobô é kui anyu denan.” (Lañe’e Beéphésien 4:29.) Nalé a tinane na, bia yiane sa’ale mvite minkobô, meta, a bifia bi ne bo bôte bevo’o mintaé nlem. Bia yiane fe sa’ale ékobôkobô a mfuk.—Lañe’e Minkana 16:28.
3. Jé é ne volô bia na bi kobô avale dé ve bôte bevo’o ngule nyul?
Biyoñe biziñ, mam bia jô ma liti bôte bevo’o mam me ne bia nlem été. (Luc 6:45) Ajô te, da sili na bi bem ôsimesane wongan mbamba be mam, “mam mese me ne zôsô, mam mese me ne mfuban, mam mese me ne abeñ, mam mese ma toteban mvo’é.” (Bephilippien 4:8) Asu na bi bem ôsimesane wongan mam mete, e ne mfi na bi yeme tobe mimvômane miangan a bemvôé bangan. (Minkana 13:20) E ne fe mfi na bi taté fas ôsusua na bia kobô. Nyoñe’ éyoñe ya fas avale mam wé jô mé nambe bôte bevok. Kalate Zambe a jô na: “Môt a ne kobô [teke fas] aval ane minlumane mi nkpwaté mekôn; ve ôyeme ya ñyeme mam ô ne aval ane mvo’é ya nyôl.”—Minkana 12:18.
TUKA’A FAK
Yene’ aval avé mam wo jô me ne ve Yéhôva nlem avak, a ve bôte bevo’o ngule nyul.
4. Tabe’e ntyel a mam ma kui wo anyu
Biyoñe biziñ, bi wô’ô jô mam ma bo na bi su’ulane jôban. (Jacques 3:2) Lañe’e Begalate 5:22, 23, mvuse ya valé, yala’ane minsili mi:
Mefulu mevé ya mefulu ma ô ne sili Yéhôva meye’elan été asu na ô yeme belan ôyeme wé? Aval avé mefulu mete me ne volô wo?
Lañe’e 1 Becorinthien 15:33, mvuse ya valé, yala’ane nsili wu:
Nja ôvé ô ne zañe mam ma kui wo anyu a bemvôé bôé, nge ke mimvômane miôé?
Jé é ne bo na ô bi mbamba minkobô nge ke mbia minkobô?
Lañe’e Ecclésiaste 3:1, 7, mvuse ya valé, yala’ane nsili wu:
Éyoñ évé é ne mvo’é na bi tabe évô nge ke na bi yange mbamba éyoñ asu na bi jô jôm éziñ?
5. Jô’ô mbamba be mam a lat a bôt bevok
Aval avé ô ne sa’ale mvite minkobô a meta? Futi’i VIDÉO, mvuse ya valé, yala’ane minsili mia tôé valé.
Amu jé mojañ bia te yene vidéo a mbe a yiane tyendé aval a kobô bôte bevok?
Jé a nga bo asu na a tyendé?
Lañe’e Ecclésiaste 7:16, mvuse ya valé, yala’ane nsili wu:
Jé wo yiane simesan éyoñ wo kômbô jô mbia be mam a lat a môt éziñ?
Lañe’e Ecclésiaste 7:21, 22, mvuse ya valé, yala’ane nsili wu:
Jé é ne volô wo na ô bo teke kañ éyoñ môt a te kobô wo abé?
6. Yeme’e kobô a bibu’a ya nda bôte jôé
Yéhôva a yi na éyoñ bia laan a bibu’a ya nda bôte jangan, bi kobô be a mbamba nlem. Futi’i VIDÉO, mvuse ya valé, yala’ane nsili wo tôé valé.
Jé é ne volô wo na ô laan a bibu’a ya nda bôte jôé a nye’an ôse?
Lañe’e Beéphésien 4:31, 32, mvuse ya valé, yala’ane nsili wu:
Aval minkobô avé da yemete élat é ne zañe bibu’a ya menda me bôt?
Yéhôva a nga liti aval avé a yen Mone wé, Yésus. Lañe’e Matthieu 17:5, mvuse ya valé, yala’ane nsili wu:
Aval avé ô ne vu Yéhôva éyoñ wo laan a bibu’a ya nda bôt jôé?
Jeñe’e mezene ya se’e bôte bevok
BÔTE BÉZIÑ BA JÔ NA: “Ma kobô mam ma so ma nlem été, ma bisi ki nge môt éziñ a wô’ô jam ma jô abé.”
Ye wo kañese ôsimesan ôte? Amu jé?
ÔBALEBAS
Mam bia jô me ne ngule ya ndeñele bôte bevok nge ke volô be. Wo yiane kôme fas ôsusua na wo kobô, wo yiane fe yemelan éyoñ é ne mvo’é na ô kobô, a aval wo yiane kobô.
Ô ne yalan aya?
Jé ô ne bo asu na mam wo jô me volô bôte bevok?
Aval mam avé da yiane ki kui anyu dôé?
Jé é ne volô bia na bi kobô mbamba be mam a mam ma ve bôte bevo’o ngule nyul éyoñ ése?
MAM MEFE ME NE VOLÔ WO
Jé é ne volô wo na ô kobô mam ma ve bôte bevo’o ngul nyul?
Yene’e mam me ne volô wo na ô sa’ale mbia minkobô.
“Est-ce vraiment mal d’être grossier?” (Ô ne koone nye anjeñe mefoé dangan)
Yene’e jam ô ne bo asu na ô sa’ale ékobôkobô a mfuk.
Yene’ aval avé Yéhôva a nga volô môt a mbe a bili mbia nkobô.