“Mfa’a ya mam mese, beta nye’an a tabe’e ézezañ jenan”
“Asu’ulan ya mam mese énto bebé. . . . Mfa’a mam mese, beta nye’an a tabe’e ézezañ jenan.”—1 PIERRE 4:7, 8.
YÉSUS a nga yeme na, ôbe nté baa beye’é bé b’akandane tabe bône mfi abui. A nga liti be avale mam d’ébo be. A nga ye’ele fe be na ésaé éngenane be angôndô y’abui, b’évini be, a tôbane meve’ele aval ane émien. (Jean 15:18-20) Biyoñ abui y’alu énga su’ulane be, Yésus a nga ba’alan beye’é bé ajô ya “nye’esan bebien.”—Jean 13:34, 35; 15:12, 13, 17.
2 Pierre, nye’é Yésus wua a nga too alu te, a nga tu’a ba’ale mfi ya melep mete. Eyoñ mimbu abui mi lôte ya, a na asu’ulan ya Jerusalem é nto bebé, Pierre a nga beta tili mone kalate a ba’ala’an mfi ya nye’an. A nga lebe bekristen na: “Asu’ulan ya mam mese é nto bebé. . . . Mfa’a ya mam mese, beta nye’an a tabe’e ézezañ jenan.” (1 Pierre 4:7, 8) Mejô Pierre ajô le mene nyaa mfi mfa’a bia bese bi anyiñ “melu y’asu’ulan” ya nta’an mam wu. (2 Timothée 3:1) J’éne “beta nye’an”? Amu jé bi ayiane bi avale nye’an te? A avale avé bine wô liti ényiñ jangan?
“Beta nye’an”—ane jé?
3 Nye’ane wo yaé nlem été tyi’ibi ône abui meva. Sak’aval nye’an te nde Pierre a kobô, ve nye’an wo dañe jin. Efia Grék b’akôñelane na “nye’an ” éfus 1 Pierre 4:8 éne na a·gaʹpe. Efia te j’akobô ajô ya nye’an ône te sôñ jôm éfe yat, avale nye’an wo tôñe metiñ me Zambe. Kalate éziñ ajô mfa’a ya éfia te na: “Nye’an Agape ô ne avale nye’an môt ane jôé wo, amu ônji bo aban jôm bi awô’ôtan, ve w’aso ngumba ntyi’an ya wo tyi’i nleme wôé été na, w’abo mam m’éziñ.” Amu na bi abialé a nkômban ya simesan ve biabebien, bi ayi melep m’avolô na, bi nye’e bôt bevok avale metiñ me Zambe m’ajô.—Metata’a 8:21; Beromain 5:12.
4 Nalé a nji tinane na bi nye’e bôt bevok amu na bi ne ntindan. A·gaʹpe a nji bo na nlem wo kôlô môt abum. Pierre ajô na “beta nye’an a tabe’e ézezañ jenan.”a (Kingdom Interlinear) Nalé a tinan na, nye’an te wo sili ôvañ. A bi ayiane ve ngul ya liti wô. Mfa’a ya éfia Grek be nga kôñelan na “beta,” nyeme mam éziñ ajô na: “J’adañe liti éve’ane ya ngule minsôn môt a ke mbil a kandan liti éyoñ a nga zu kui memane me mbil.”
5 Nye’an wongan, ô nji yiane su’u fo’o ve mboan ya mam mene tyi’ibi y’abo, nge ve be mingumba mi bôt. Nye’an be kristen wo sili na bi “ndamé” nleme wongan; bi liti nye’an wongan to’o éyoñ éne ayaé y’abo nalé. (2 Becorinthien 6:11-13) Bine jô tyi’ibi na, avale nye’an ôte ône avale jôm bi ayiane jeñ a ngul ése na bi liti je, aval ane nke mbil ayiane kômesan na a bi jôm a sôñ. Ene fo’o mfi na biabebien bi nye’esan avale te. Amu jé? Nge mezen me ne tyôtyoé, me ne bo melal.
Amu jé biabebien bi anye’esan?
6 Zen ôsu éne na “nye’an ône fulu Zambe.” (1 Jean 4:7) Yéhova, nyô ane tin ya mbamba mefulu mete, a nga taté nye’e bia ôsusua. Nlôman Jean ajô na: “Avale di nde nye’ane Zambe ônga yené mfa’a wongan, amu Zambe a nga lôm atyi’i mone dé si na bi nyiñ amu nye.” (1 Jean 4:9) Mone Zambe a nga “lôme ôsu” n’abialé môt’abinam, a bo Zambe ésaé, ajibi awu a tyele mbôñ—mam mete mese me nga boban “na bi bi ényiñ.” Aval avé bine yalan Zambe mfa’a ya mbamba nye’an anga nye’é bia di? Jean ajô na: “Ng’avale di nde Zambe anye’e bia, wôna bine ntindan na biabebien bi nye’esan.” (1 Jean 4:11) Yene na Jean a tili na, “nge avale di nde Zambe anye’e bia”—sake na wo ve na bia bese. Ôsimesan te wo tu’a liti na: Nge Zambe a nye’e bebuni bé bese, bia fe bine ntindan na bi nye’e be bo b’ésaé be Yéhova bese avale da.
7 Zen baa bi ayiane dañ nye’esan biabebien den éne na, nge bi akômbô volô bobejañ bangan be jameya amu “asu’ulan ya mam mese é nto bebé.” (1 Pierre 4:7) Bi anyiñ “mbia biyoñ bii bo.” (2 Timothée 3:1) Ayet nta’an mam wu, bibubua bi aso si se, a évini bia telé bia mbia bité. Avale mbia biyoñ bite, bi ayiane dañ wô’an mintaé. Beta nye’an élate bia bese a tindi bia na “minlem miangan mi tyebe yôp ajô bekristen bevok.”—1 Becorinthien 12:25, 26.
8 Zen lale j’aliti na bi ayiane nye’esan éne na, bi nji kômbô “ve Diable afôla ” y’abelan bia. (Beéphésien 4:27) Amu bine bebuni be Zambe a bebo mam abé, Satan ane avôle y’abelan—mimbia mefulu mangan, bikop biangan, a abé dangan—aval ane ékol’ôbak mfa’a wongan. Ye mbia éfia nge mbia mboan ya mbuni Yéhova wua ébo na bi kôlô akônda? (Minkana 12:18) Bii bo te kôlô nge bi bili nye’an abui! Avale te da, nye’an wo ba’ale mvo’é a nlatan na bi bo Zambe ésaé “a nleme wua.”—Sophonie 3:9.
Avale ône liti na wo nye’e bôt bevok
9 Nlitane nye’an w’ataté nda bôt été. Yésus a nga jô na b’éyemelan benya bebuni bé a zen ya nye’an bebien b’anye’esan. (Jean 13:34, 35) Nye’an w’ayiane yené saa v’akôn d’étam; adañe dañe na nda bôt été—zañ ngale ba nnôm a zañ bebiaé a bone. E nji bo mone jam na bôt ya nda bôt jia be wô’ôtan na bôt bevok be anye’e be; bi ayiane dañ liti nye’an ôte aval éne mvaé.
10 Aval avé ngale ba nnôm b’éliti na b’anye’esan? Fam j’anye’e minga wé a nlem ôse, j’aliti nalé mimboan a bifia—bôt été a éyoñ bene bebaé —na minga wé an’édima. Fam énji yiane ve minga wé ôsone nyôle; ve j’asemé asimesane dé, nfasane wé, mam avini, a ma anye’e. (1 Pierre 3:7) A telé minkômban mi minga wé ôsu, émié ke mvus. Abim ngule jé éné, fam j’ayiane jalé minyiane minga wé ya minsôn, mi ya nsisim, a ébo na minga wé a vak. (Beéphésien 5:25, 28) Minga anye’e nnôm wé a nleme wé ôse, a bili “beta ésemé ”mfa’a ya be nnôm to’o d’akui biyoñ biziñ na, nnôm a nji bo nye mam mese a sili nye. (Beéphésien 5:22, 33) A volô nnôm wé a sili émien si be nye, ane te sili biôm bi alôte nnôm nkôñ, ve ngale ba nnôm b’asaé nsamba wua na mam ya nsisim me tebe ôsu nda bôt jap.—Metata’a 2:18; Matthieu 6:33.
11 A bebiaé, aval avé mi ne liti bone benan na mia nye’e be? Mbamba nlem ô bili a bo na, ô jalé minyiane miap a liti na wo nye’e be. (1 Timothée 5:8) Ve, bongô be nji yi fo’o ve bidi, biôm ya jaé a nda ya tabe. Nge wo yi na éyoñ b’éyaé be bo Zambe ésaé, wo yiane fe be yalé minyian ya nsisim été. (Minkana 22:6) Nalé a tinan na nda bôt ése j’aye’é mejôô me Zambe, j’ake minkañete, j’atabe bisulan akônda. (Deutéronome 6:4-7) Njalan avale mam mese wo asili na bi tyi mam mefe, adañe dañ melu y’asu’ulan ma. Evak a ôvañ ô bili na wo jalé minyiane ya nsisim be nyo bon bine ndeme na w’anye’e be, a bi aliti na jôm wo dañ yi asu dap éne ényiñ ya nnôm éto.—Jean 17:3.
12 Ene fe mfi na bebiaé be tu’a liti bone bap nye’an. Bebé éyoñ ése, bongô b’asili nlem wop été na, ye bebiaé bam be ngenan fo’o b’anye’e ma. Jame te nde kom ése, bebiaé bap b’ayiane liti be na b’anye’e be. Kate be na wo nye’e be, a ba’ale’e be ane bemvôé bôé, mfa’a jôm ése ône jô be kate be na b’ayiane nye’an a na be ne dia mise môé. Nyeke’e be, a va’a be metiñ nye’an été, litii be na, mam mese b’abo mene mvaé w’ayene me, a se’e fe be. Ye’ele’e be nye’an été, éyoñ ése wo sôane be, kate be na nleme ô tyele wo yôp mfa’a y’avale môt b’akômbô bo melu m’azu. (Beéphésien 6:4) Mimbamba mimboan mise w’abo anye’an, mi abo na nda bôte jôé é wô’ô mevak, a volan; nalé ane mbamba zen ya kômesan nda bôt jôé na édañe meve’ele m’akui melu y’asu’ulan ma.
13 Nye’an wo tindi bia na bi jamé bivus bi bôte bevok. Eyoñ a nga ba’alan bemé bobenyañ bé ya mbunan na “beta nye’an a tabe’e ézezañ jenan,” Pierre a nga kate be amu jé nalé ane mfi abui: “Amu nye’an w’abuti abui abé.” (1 Pierre 4:8) ‘Mbutan’ abui abé ô nji tinan na ‘nsolan’ nsem. Bi ayiane kulane minsem be bemvéndé y’akônda. (Levitique 5:1; Minkana 29:24) Ene fo’o angôndô y’abé—a ébiasé mise me Zambe—na bi jô’é na abé éke ôsu aboban, nge na bôt befe be tôban abé amu bia.—1 Becorinthien 5:9-13.
14 Abui biyoñ, bivus nge abé môt y’akônda ate bo éne ôveves. Bia bese bi akop nkobô a mimboan biyoñ biziñ, nge boane mam mene te yian nge mintaé nlem. (Jacques 3:2) Ye bii mias bivus bôt bevok avôlavôl? Avale mboane te d’adutu ziñ akônda été. (Beéphésien 4:1-3) Nge nye’an wo wulu bia, bii bo te “so’o” mbuni mbok. (Besam 50:20) Avale meyañ me abuti mvit ya mfin nda, avale te fe nye’an wo buti bone bivus bi bôte bevok.—Minkana 17:9.
15 Nye’an w’ébo na, bi volô bôt b’ayi mvolan. Nté ôse ényiñ j’ake ôsu abo ayet, bobejañ ya mbunan b’éyi biôm ya jaé nge di a mimvolan avale te. (1 Jean 3:17, 18) Bitame nyoñ éfunan na, wo yem monyoñ y’akônda ane azoé nge na be ate vaa nye bisaé? Eyoñ éziñ ône nye ve moné abim ô bili ngule ya ve nye. (Minkana 3:27, 28; Jacques 2:14-17) Ye nda nnôm nkus minga j’asili nkôman? Eyoñ éziñ bine mane kôme biom biziñ y’été.—Jacques 1:27.
16 Nye’an bôt bevok ônji su’u ve be bôt b’abôman bia. Mefoé mene so na ôkôs, mimfô’ôsane mi si, bita biate boban vôm bobejañ ya mesi mefe beto. D’akui na bene bo te bi bidi, biôm ya jaé, a biôm bife avale te. To’o bene ayoñ afe nge ékôp éfe, ajô énji bo valé. Bi “anye’e bobejañ ya si se.” (1 Pierre 2:17) Nde, aval ane mekônda ya melu me Yésus, bi ave mimvolan a mevak avale ane ngômôtô j’ate boban. (Mam Minlôman 11:27-30; Beromain 15:26) Eyoñ bi anye’esan mezen mete mese, élat jangan éne ve nene nen melu y’asu’ulan ma.—Becolossien 3:14.
17 Nye’an wo tindi bia na, bi kate bôt befe foé y’éjôé Zambe. Tame fas éve’ela’a Yésus. Amu jé a nga kate foé y’éjôé Zambe a ye’ele bôt? A nga too “ntindan a nkoane éngôngol” ya jama bôt, amu abui azoé dap ya mam ya nsisim énga too. (Marc 6:34) Betebe ôsu ya bivus minyebe, be nga yiane ye’ele be benya mejôô a yemete ndi nleme jap, ve be nga viane biasé a tibili be. Nde, amu nye’ane mbamba nlem wé a mvam, Yésus a nga volô bôt minlem a “mbamba foé y’éjôé Zambe.”—Luc 4:16-21, 43.
18 Den fe, mfa’a ya mam ya nsisism, bôt abui b’atôban ébiasé, étibila’a a bene te ndi nlem. Nge, aval ane Yésus, bi ne avôl ya yene minyiane ya nsisim bôt bene te yem Zambe den, nye’an a mvam bii tindi bia na bi kate foé y’éjôé Zambe. (Matthieu 6:9, 10; 24:14) Amu éyoñ énji fe beta bo abui den, d’asili fo’o avôlavôl na bi kate foé j’anyii bôt.—1 Timothée 4:16.
“Asu’ulan ya mam mese é nto bebé”
19 Simesa’an na, ôsusua na a lep bia na beta nye’an a tabe ézezañ jangan, Pierre a nga taté jô na: “Asu’ulan ya mam mese é nto bebé.” (1 Pierre 4:7) Nnéane si nyô j’alôt, mfefé si Zambe ñwô w’éfol je. (2 Pierre 3:13) Den a nji bo éyoñ ya bo fianga. Yésus a bemé bia na: “Miabebien, taba’an ntyel na minleme mianan mi bo atek a mbia ndian bidi, mbia nyuan meyok, a biyebé ya nlem, a môs ôte ôza dilan mia aval ane ôlam.”—Luc 21:34, 35.
20 Mam mese bi ate yen m’aliti na bi “mombô” a kômesan vôm ase bi né mone étun éyoñ a lôte nyô. (Matthieu 24:42) Bi tabe ntyel na meve’ele me Satan me bo te ndeñele bia. Bi bo te kañese na nye’an o njemban be bia, a njet ya si nyô bi telé bia mfa’a ya nlitan nye’an ézezañ jangan. Adañe dañ na bi subu Yéhova bebé kom ése, amu é belan éjôé Yésus na a tôé beta nsôñan wé mfa’a ya si nyô.—Nlitan 21:4, 5.
[Ôyôme ndem]
a Efus 1 Pierre 4:8 , bôt bevok b’ajô na biabebien bi ayiane nye’esan “zôsôô été,” “a nlem ôse,” nge “a ndi nlem ése.”
MINSILI YA FAS
• Melep mevé Yésus a nga kandan ve beye’é bé, a jé j’aliti na Pierre a nga tu’a me ba’ale? (Étune ntilan 1-2)
• J’éne “Beta nye’an”? (Étune ntilan 3-5)
• Amu jé biabebien bi ayiane nye’esan? (Étune ntilan 6-8)
• Aval avé bine liti bôt bevok na bi anye’e be? (Étune ntilan 9-18)
• Amu jé den anji bo éyoñ ya bo fianga, a jé bia bese bine ntindan y’abo? (Étune ntilan 19-20)
[Fôtô ya afep 29]
Nda bôt éne nlatan nye’an été éne nya nkômesane na é dañe minju’u ya melu m’asu’ulan ma
[Fôtô ya afep 30]
Nye’an w’atindi bia na bi volô bôt be bili minjuk
[Fôtô ya afep 31]
Nkañetan mbamba foé y’éjôé Zambe a bôt bevok ône mboan ya nye’an