NLÔ AJÔ 26
Amu jé abé a minju’u bi ne si nyi?
Éyoñe mbia jam éziñ a kui, bia bese bi wô’ô sili na “Amu jé?” Wé bi meva’a ya yen éyalane Kalate Zambe a ve a lat a nsili ôte.
1. Aval avé Satan a nga soo abé si nyô?
Satan Diable a nga bo Zambe melo. A nga yi na a jôé si ése, jôme te nje a nga bo na Adam ba Ève be fe be bo Zambe melo. Aval avé a nga bo de? A nga laan Ève minsos. (Metata’a 3:1-5) A nga du’u nye na Yéhôva a solé be mbamba be mam. A mbe a kômbô’ô liti na bone be bôt be ne bi benya meva’a nge ba jôé bebien. Satan nnye a mbe môt ôsu a nga laane minsos. A nga kôme jô Ève na a ye ke tu’a wu. Jôme te nje Bible a loone Satan na “môte ya minsos” a “ésa minsos.”—Jean 8:44.
2. Adam ba Ève be nga tyi’i na ba bo jé?
Yéhôva a nga ve Adam ba Ève angôndô ya abui biôm. A nga jô be na be ne ngule ya di bibuma ya bilé bise ya afube ya Éden, ane ô vaa ve élé jia. (Metata’a 2:15-17) Ve be nga tyi’i na ba di ébuma ya élé éte. Ève “a nga faté ébuma ya élé éte, a di” je. Mvuse ya valé, Adam “fe a nga di” je. (Metata’a 3:6) Bese bebaane be nga bo Zambe melo. Mbôle Adam ba Ève be mbe teke ayeñ, e mbe tyi’ibi asu dap na be bo ve mam me ne zôsôô. Be nga vañe fo’o bo Zambe melo. Be nga sem éyoñe be nga bo nalé, be liti’i fe na ba ben éjôé Yéhôva. Ntyi’an ôte ô nga soo be abui minjuk.—Metata’a 3:16-19.
3. Ntyi’an Adam ba Ève be nga nyoñ ô nga telé bia été évé?
Éyoñ Adam ba Ève be nga sem, be nga be’e metyi ya abé a kôé me mvoñe bôte jap ése. Bible a kobô ajô Adam a jô’ô na: “Abé e nga zu si nyô amu môte wua, a awu e nga zu amu abé; a nalé awu e nga kui be bôte bese.”—Beromain 5:12.
Abui mam e ne soo bia minjuk. Biyoñe biziñ, bia tôbane minju’ amu bia te nyoñe mbia mintyi’an. Bi ne fe tôbane minju’ amu mbia mintyi’an bôte befe be nga nyoñ. Mam méziñ me ne fe bia kui atemetem, a telé bia minju’ été.—Lañe’e Écclésiaste 9:11.
TUKA’A FAK
Yene’ amu jé bi vo’o jô na Zambe nnye a bo na bi tôbane minjuk, a aval a wô’ôtan éyoñe bia tôbane minju’u den.
4. Minju’u mia so vé?
Abui bôte da simesane na Zambe nnye a jôé émo ji. Ye nalé a ne été? Futi’i VIDÉO.
Lañe’e Jacques 1:13 a 1 Jean 5:19, mvuse ya valé, yala’ane nsili wu:
Ye Zambe nnye a bo na bi tôbane minjuk?
5. Mam éjôé Satan é nga soo me
Lañe’e Metata’a 3:1-6, mvuse ya valé, yala’ane minsili mi:
Minsos mivé Satan a nga laan?—Fombô’ô éfuse 4 a 5.
Aval avé Satan a nga kômbô liti na Yéhôva a solé bôte mbamba be mam?
Ye bone be bôt be ne bi benya meva’a nge ba jôé bebien avale Satan a nga jô?
Lañe’e Écclésiaste 8:9, mvuse ya valé, yala’ane nsili wu:
Mbôle sake Yéhôva nnye a ne Njôô ya émo ji, jé ja boban été?
Adam ba Ève be mbe teke ayeñ éyoñe be mbe Paradis. Ve be nga vô’ôlô Satan, a bo Yéhôva melo
Éngana’a jap é nga soo abé, minjuk, a awu émo ji
Ve Yéhôva a ka’ale na é vaa abé, minjuk, a awu. Éyoñe te bôte ba ye beta bo zôsôô ne tiññ, a nyiñe Paradis
6. Yéhôva a yeme minju’u bia tôbane mie, a wô’ô fe bia mintaé
Ye Zambe a bisi minju’u bia tôbane mie? Yene’e mame Njôô bôte David a Nlômane Pierre be nga tili. Lañe’e Besam 31:7 a 1 Pierre 5:7, mvuse ya valé, yala’ane nsili wu:
Wo wô’ôtan aya éyoñe wo yeme na Yéhôva a yeme minju’u bia tôbane mie, a na a wô’ô bia mintaé?
7. Yéhôva é vaa minju’u mise bia tôbane mie
Lañe’e Ésaïe 65:17 a Nlitan 21:3, 4, mvuse ya valé, yala’ane nsili wu:
Yéhôva a ka’ale na é mane vaa mbia be mam bese. Amu jé ngaka’a éte ja ve wo ngule nyul?
Ye wo too ô yeme’ek?
Minsos mi Satan mi nga ve éyôlé Yéhôva mvit. A nga bo na bôte be simesane na Yéhôva a nji bo mbamba Njôô. Yéhôva é fubu jôé dé éyoñ é mane vaa minju’u mise môt a binam a tôbane mie. Éyoñe te é liti bôte bese na nnye fo’o a yiane jôé si ése. Nya ajôô a ne na, jame da ya mam ma dañe mfi émo minlañ e ne na Yéhôva a fubu jôé dé.—Matthieu 6:9, 10.
BÔTE BÉZIÑ BA JÔ NA: “Zambe a bo na bi tôbane minju’ asu na a yene nge bi bili ngule mbunan.”
Wo simesan aya?
ÔBALEBAS
Satan Diable, Adam, a Ève, mbe be ne bôte ba dañe be’e mekua ya abé ese e ne émo ji. Yéhôva a wô’ô nlem mintaé éyoñ a yen ane bia tôbane minjuk, é mane fe mie vaa mise ne meññ.
Ô ne yalan aya?
Minsos mivé Satan a nga laan Ève?
Éngana’a Adam ba Ève be nga bo é nga soo jé?
Aval avé bia yeme na Yéhôva a yeme minju’u mise bia tôbane mie, a na a wô’ô bia mintaé?
MAM MEFE ME NE VOLÔ WO
Yene’e jôme Bible a loone na “nsem.”
“Qu’est-ce que le péché?” (Ô ne koone nye anjeñe mefoé dangan)
Tuka’a fa’a jam e nga boban afube ya Éden, éyoñe Satan a nga bo éngana’a.
“Pourquoi Dieu permet-il les souffrances?” (Nkume mmombô a bete ya Ngon ôsu é too alu 1, mbu 2014)
Yene’ aval avé biyalane ya beta nsili nyi bi ne volô wo.
Yene’e jame môt éziñ a nga yé’é a lat a minjuk a mbe a yene’e.