Éyoñ be kôlôya afub Éden, Adam ba Ève be nga biaé abui bon. Ntôle mone wop ô mbe ô bé mefup, ô mbe jôé na Caïn; mone baa a mbe jôé na Abel, a mbe mba’ale mintômba.

Môs éziñ Caïn ba Abel be nga bo Yéhôva mimvean. Ye wo yem jôm ba loone na mvean? A ne das é ne ngum aval môt a bo Yéhôva. Yéhôva a nga nye’e mvean Abel, ve a nji nye’e wu Caïn. Jam ete ve zu bo na Caïn a wô’ô mbia ôlun. Yéhôva a nga bemene Caïn na, ôlune wé ô ne tindi nye na, a bo mbia jam. Ve Caïn a nji vô’ôlô.

Ane Caïn a nga jô Abel na: ‘Tame ma ke liti afup.’ Éyoñ be nga be étam, ane Caïn a nga bibi monyañ wé, nye ve wu. Yéhôva a nga yene jam ete aya? Yéhôva a nga foñesô Caïn, a titane nye na a kandan a nda bôte jé. A nga jô nye na a bo teke beta bulane vôme bôte bé be ne.

Nalé a ye’ele bia jé? E ne kui na bi wô’ô ôlun éyoñ mam me nji boban avale bia yi. Ve nge bi yene na ôlune wo bete bia nlem, nge ke na, bôt béziñ ba lebe bia amu ba yene na bia wô’ô ôlun, bia yiane ji’a tyendé a jôé biabebien, ôsusua na ôlun ôte wo tindi bia na bi bo abé.

Mbôl Abel a mbe a nye’e Yéhôva, a mbôl a mbe a bo’o mam me ne mvo’é, Yéhôva a ye ke vuane nye. Zambe a ye beta ve nye ényiñ, éyoñ A ye bo na si é bo paradis.

Nté mimbu mi mbe mi lôtôk, si é mbe ve jaé a bôt. Abui ya été é mbe mbia be bôt. E yôp, beéngele béziñ fe be nga taté na ba bo mam me ne abé. Be nga kôlô vôm be mbe be yiane nyiñ, a zu tabe si va. Ye wo yem amu jé be nga bo jam ete? Be mbe be kômbô’ô jaé nyôle bone be bôt na be lu’u binga.

Beéngele bete be nga tobe binga, a biaé bon a be. Bone bete be mbe mbia ngul a njet. Be mbe be tibili’i bôt. Yéhôva a nji be ngule ya jô’é na mbia be mam bete be ke ôsu. Nde a nga tyi’i na, a zu wôé mbia be bôt bete a zene ya ndône mendim.

Ve môte wua a mbe a sela’an a bôte bevo’o bese. Môt ate a mbe a nye’e Yéhôva. Éyôlé jé é mbe Noé. A mbe a bili minga a bone bela: Sem, Cham a Japhet; môt ase ya be be a mbe fe a bili minga. Yéhôva a nga jô Noé na a lôñe beta arche, asu na nda bôte jé é bo te wu éyoñe beta mveñ a ye noñ. Arche a funane beta éwolo, a ne ngule ya yeñ e mendime yôp. Yéhôva a nga jô fe Noé na, a bo na betit be nyiine arche été, asu na be’e fe be nyiñ.

Ane Noé a nga taté na a lôñ arche été été. A nga bo ésaé éte a nda bôte jé tañe mimbu bebé 50. Be nga lôñ arche fo’o ve avale Yéhôva a nga jô be na be bo. Nté ésaé é mbe é boba’an, Noé a mbe a kate bôte na beta mveñ a ye noñ. Ve teke môt a nga vô’ôlô nye.

Ane éyoñe ya nyiine arche é nga kui. Bi tame zu yen e jam é nga boban éyoñe nda bôte Noé é nyiineya arche été.