Sekant Samwel
1 Afta Saal ded, Dayvid kohn bak fahn kanka di Amalekait dehn, an ih mi stay da Ziklag fi too dayz. 2 Pahn di terd day, wahn man fahn Saal kyamp kohn da Dayvid wid ih kloaz tayr ahn wid dert pan ih hed. Wen ih reech fronta Dayvid ih bow dong loa wid ih fays tu di grong.
3 Soh Dayvid aks ahn: “Wehpaat yu di kohn fram?” An ih tel ahn: “Ai eskayp fahn di Izrelait aami kyamp.” 4 Den Dayvid seh: “Tel mi, how di waar gaan?” Ahn di man tel ahn: “Di soalja dehn ron weh fahn di waar ahn lata dehn ded. Eevn Saal an ih son Janatan ded.” 5 Den Dayvid aks di yong man: “How yoo noa dat Saal an ih son Janatan ded?” 6 Soh di yong man tel ahn: “Ah mi hapm fi deh pahn Mongt Gilboawa, ahn Saal mi dehdeh di leen op pan ih spyaa, ahn di chariyat ahn di haasman dehn mi kech op tu ahn. 7 Wen ih ton rong an ih si mi, ih kaal mi, an Ah tel ahn, ‘Si mi ya!’ 8 Ahn den ih aks mi, ‘Da hoo yoo?’ Soh Ah tel ahn, ‘Ai da wan a Amalek disendant.’ 9 Den ih tel mi, ‘Pleez kohn kil mi, kaaz Ah noh ded yet, an Ah deh eena lata payn.’ 10 Now di man mi geh hert bad, an Ah kuda mi tel dat ih mi wahn ded. Soh Ah gaan an Ah kil ahn. Den Ah tek di krong weh mi deh pan ih hed ahn di brayslet weh mi deh pan ih aam an Ah bring dehn ya fi yoo, mi laad.”
11 Den Dayvid tayr ih kloaz, an aal di man weh mi deh wid ahn tayr fi dehn wan tu. 12 Ahn dehn baal ahn dehn faas* til eevnin bikaaz Saal, ih son Janatan, ahn soh moch a Jehoava peepl, di Izrelait dehn, mi ded eena di waar.
13 Dayvid aks di yong man: “Wehpaat yoo kohn fram?” An ih tel ahn: “Mai pa da wan a Amalek disendant, wahn farina weh liv eena Izrel.” 14 Den Dayvid aks ahn: “How yoo neva frayd fi kil di king weh Jehoava anoint?”* 15 Soh Dayvid kaal wan a di yong man weh mi deh wid ahn an tel ahn: “Goh kil ahn.” Soh ih kil ahn wid wahn soad. 16 Ahn Dayvid tel ahn: “Yoo rispansabl fi yu oan det, bikaaz yoo kandem yuself wid yu oan mowt wen yu seh, ‘Da mee kil di wan weh Jehoava anoint.’”
17 Den Dayvid sing wahn sad sang fi Saal an ih son Janatan. 18 Ih naym di sang “Di Boa,” an ih seh dat aal di peepl fahn Jooda chraib fi laan di sang. Ih deh rait dong eena di buk weh naym Jayshar, ahn dis da how ih goh:
19 “Aiy, Izrel! Byootiful peepl lef ded pahn yu mongtin dehn.
Luk pahn how di maiti soalja dehn ded eena di waar!
20 Noh seh notn bowt it da Gat;
Noh anonks it pahn di schreet da Ashkelon,
Adawaiz di Filisteen dehn daata wahn rijais,
Er di daata dehn fi dehnya man weh noh serkomsaiz wahn selibrayt.
21 Unu mongtin da Gilboawa,
Noh mek no joo ner rayn jrap pahn unu,
Ahn noh mek no feel projoos food fi eni aafrin,
Bikaaz da rait deh soh di sheel a di maiti wan dehn looz dehn aana,
Ahn Saal sheel noh anointid wid ail nohmoh.
22 Janatan boa an aro ahn Saal soad bayd eena dehn enimi blod,
Ahn stab dehn maiti enimi dehn flesh.
Dehn wepan wuda neva kohn bak widowt vikchri.
23 Evribadi mi lov ahn cherish Saal ahn Janatan aal chroo dehn laif,
An eevn wen dehn ded dehn mi deh tugeda.
Dehn mi faasa dan wahn eegl,
Ahn schranga dan wahn laiyan.
24 Aala Izrel daata, unu mos krai fi Saal,
Hoo jres unu op eena brait ahn fansi kloaz,
Ahn hoo dekorayt unu kloaz wid goal.
25 Luk pahn how di maiti soalja dehn ded eena di waar!
Janatan lef ded pahn yu mongtin dehn!
26 Aiy, Janatan mi breda, Ah soh sad sayka weh hapm tu yu;
Yoo mi veri preshos tu mi.
Tu mee, fi yoo lov mi moa wandaful dan wahn wuman lov.
27 Luk pahn how di maiti soalja dehn ded eena di waar
Ahn di wepan dehn fi waar geh dischrai!”