Sekant Kingz

3 Eena di 18th yaa, wen Jehoshafat mi-di rool az king oava Jooda, Ayhab son Jehoaram staat rool az king oava Izrel eena Samayrya, an ih mi rool fi 12 yaaz. 2 Hihn mi kip di du weh bad eena Jehoava sait, bot noh az bad az evriting weh ih pa er ih ma mi du, kaaz ih geh rid a di stoan weh ih pa set op fi wership Bayal. 3 Bot ih komit di saym sin dehn weh Neebat son Jeroboawam mi komit ahn weh Izrel komit bikaaz a hihn. Ih neva ton weh fan ih sin dehn.

4 Now Meesha di king a Moawab mi rayz sheep, an ih yoostu gi 100,000 sheep ahn 100,000 ram weh stil ga dehn wul az taks tu Izrel king. 5 Az soon az Ayhab ded, Moawab king staat tu ribel gens Izrel king. 6 Joorin da taim, King Jehoaram lef fahn Samayrya ahn gyada di hoal a Izrel aami. 7 Ih aalso sen wahn mesij tu Jehoshafat di king a Jooda. Ih seh: “Moawab king di ribel gens mi. Yoo gwehn wid mee fi fait gens di peepl da Moawab?” Jehoshafat seh: “Ah wahn goh wid yu, ahn mai peepl wahn jain op wid fi yoo peepl ahn mai haas dehn wahn jain op wid fi yoo haas dehn.” 8 Den ih aks ahn: “Wich way wi shuda goh?” Hihn seh: “Di road weh goh chroo Eedom wildanes.”

9 Soh Izrel king, Jooda king, an Eedom king gaahn da Moawab. Afta dehn chravl fi sevn dayz, dehn neva ga nohmoh waata fi di aami ner di animalz weh mi deh wid dehn. 10 Izrel king seh: “Dis jos rang, mayn! Jehoava kaal aala wi ya jos fi han wi oava tu di Moawabait dehn!” 11 Soh Jehoshafat seh: “Eni a Jehoava prafit deh ya weh wi ku goh tu fi aks Jehoava weh fi du?” Soh wan a di servant fi Izrel king tel ahn: “Dehn ga Shayfat son Ilaisha, weh yoostu poar owt waata fi mek Ilaija wash ih han.”* 12 Den Jehoshafat seh: “Yea, hihn ku tel wi weh Jehoava waahn wi du.” Soh di chree king dehn gaahn si Ilaisha.

13 Ilaisha tel Izrel king: “Wai yu di kohn da mee?* Goh aks di prafit dehn weh yu ma ahn pa goh tu.” Bot Izrel king tel ahn: “Noh seh dat. Da Jehoava bring di chree a wi tugeda fi han wi oava tu di Moawabait dehn.” 14 Ilaisha tel ahn: “Ah swayr eena di naym a Jehoava di livin Gaad weh Ai serv, di komanda a di hevnli aamiz, dat if da neva bikaaz a Jehoshafat di king a Jooda, Ah wudn eevn pay yoo no main. 15 Now bring sombadi fi mi weh ku play di haap.” Az soon az di persn staat tu play di haap, Jehoava spirit* kohn dong pahn Ilaisha. 16 Ilaisha seh, “Dis da weh Jehoava seh: ‘Dig sohn jrayn eena di vali,* 17 kaaz Ai, Jehoava, seh dat unu noh wahn geh no breez ner rayn, bot di vali* wahn ful op a waata, an unu an unu animal dehn wahn ku jrink fan it.’ 18 Bot fi Jehoava, dis da noh notn, kaaz hihn wahn aalso han oava di Moawabait dehn tu unu. 19 Unu fi dischrai evri schrang siti an aala di impoatant siti dehn, unu fi kot dong aala di gud chree dehn ahn stap op aala di waata spring, an unu fi chroa stoan pahn aala di gud lan soh dat notn ku groa deh.”

20 An eena di maanin taim, wen dehn aafa op di grayn aafrin,* sodn-wan waata kohn fahn Eedom dairekshan, ahn di hoal vali geh ful op wid waata.

21 Aala di Moawabait dehn mi hyaa dat di chree king mi-di kohn fi fait gens dehn, soh dehn gyada tugeda aala di man dehn weh ku fait, ahn dehn pozishan dehnself da di boada. 22 Wen dehn get op erli eena di maanin, di son mi-di shain pahn di waata, ahn fahn di ada said di waata mi luk red laik blod tu di Moawabait dehn. 23 Dehn seh: “Dat da blod! Fi shoar di king dehn kil op eech ada wid dehn soad! Lesgoh Moawab! Mek wi tek weh evriting weh bilangz tu dehn!” 24 Wen dehn get eena di Izrelait dehn kyamp, di Izrelait dehn staat atak dehn ahn di Moawabait dehn ron weh. Dehn gaan eena Moawab, ahn dehn kil di Moawabait dehn lang di way. 25 Dehn dischrai di siti dehn, an eech soalja mi chroa wahn stoan pahn aala di gud lan fi ful it op soh dat notn ku groa deh. Dehn stap op aala di waata spring, ahn dehn kot dong aala di gud chree. Ahn den onli di stoan waal dehn da Kir-hareeset mi lef, ahn di soalja dehn weh mi sorong di siti mi yooz dehn sling fi chroa stoan aata di siti an atak it.

26 Wen Moawab king riyalaiz dat dehn don looz di waar, hihn mi waahn get weh. Soh hihn gyada 700 soalja wid soad fi brok chroo di enimi front lainz fi get tu di king a Eedom, bot dehn neva get chroo. 27 Soh hihn tek ih fersbaan son, weh mi wahn rool az king afta hihn, an aafa ahn op az wahn bon sakrifais tu dehn gaad pahn di siti waal. Di peepl* geh beks bad wid Izrel, soh aala dehn lef fahn deh ahn gaahn bak hoam.