Sekant Kingz

7 Now Ilaisha seh, “Lisn tu weh Jehoava ga fi seh. Jehoava seh: ‘Dehnya taim tumaaro da di gayt* da Samayrya, yu wahn pay wan pees a silva* fi bowt nain pong* a flowa, ahn wan pees a silva* fi bowt 18 pong* a baarli.’” 2 Soh di aami aafisa weh di king mi chros seh tu di servant a di chroo Gaad: “Cho, dat kuda neva hapm eevn if Jehoava mek hevn oapm op ahn mek grayn rayn dong.” Soh Ilaisha tel ahn: “Yu wahn see’t wid yu oan aiy, bot yu noh wahn get fi eet fan it.”

3 Now foa man weh mi ga leprosi mi deh rait fronta di siti gayt, ahn dehn seh tu wan anada: “Da wai wi di sidong ya di wayt fi ded? 4 If wi goh eena di siti joorin dis famin, wi wahn ded. An if wi jos sidong ya, wi wahn ded eniway. Soh lesgoh da di Siriyan dehn kyamp. An if dehn spyaa wi laif, wel den wi wahn liv, bot if dehn kil wi, den da soh.” 5 Soh eena di eevnin taim wen ih mi daak, dehn gaan eena di Siriyan dehn kyamp. Wen dehn get kloas tu di kyamp, dehn noatis dat nobadi neva dehdeh.

6 Jehoava mi mek di hoal Siriyan kyamp hyaa laik wahn big aami di kohn lang wid dehn haas ahn waar chariyat. Soh dehn seh tu wan anada: “Hyaa deh! Izrel king geh di Hitait dehn king dehn an Eejip king dehn fi kohn fait gens wi!” 7 Rait away dehn get op ahn ron weh joorin di eevnin taim wen ih mi daak. Ahn dehn lef evriting eena di kyamp; dehn lef dehn tent, dehn haas, ahn dehn dongki, ahn dehn ron fi dehn laif.

8 Wen di man dehn weh ga leprosi reech kloas tu di kyamp, dehn gaan eena wan a di tent dehn ahn staat tu eet ahn jrink. Dehn bak weh di silva, di goal, an aala di kloaz, ahn dehn gaahn haid dehn. Den dehn kohn bak ahn gaan eena wahn nada tent ahn bak weh sohn tingz fahn deh ahn gaahn haid dehndeh tu.

9 Fainali dehn tel wan anada: “Dis noh rait weh wi di du. Wi haftu tel adaz bowt dis gud nyooz. If wi wayt til eena di maanin fi seh sohnting, den wi dizerv fi geh ponish. Soh mek wi goh ripoat dis tu di king palis.” 10 Soh dehn gaan ahn hayl di man dehn weh gyaad di siti gayt ahn tel dehn: “Wi gaan eena di Siriyan dehn kyamp, bot nobadi neva dehdeh; di plays mi emti. Onli dehn haas ahn dongki mi dehdeh, ahn dehn lef aala dehn tent rait deh.” 11 Rait away, di man dehn weh main di gayt showt owt di gud nyooz tu di peepl weh mi deh da di king palis.

12 Soh di king hori get op owta ih bed, an ih tel ih servant dehn: “Pleez, mek Ah tel unu weh di Siriyan dehn di chrai du tu wi. Dehn noa wi hongri bad, soh dehn gaahn haid, ahn dehn di wayt fi mek wi kom owt soh dat dehn ku kyapcha wi ahn kom eena di siti.” 13 Den wan a di servant seh: “Pleez mek sohn man kehr faiv haas fahn owta di haas dehn weh lef eena di siti, ahn sen di man dehn fi mek dehn fain owt weh di hapm. Bikaaz weda er nat dehn goh, dehn wahn ded eniwayz. Dehn wahn ded jos laik di peepl dehn weh don ded eena Izrel.” 14 Soh di king tel dehn: “Unu goh ahn si.” Soh dehn geh too chariyat ahn sohn haas, ahn di king sen dehn da di Siriyan kyamp. 15 Dehn gaan eena di saym dairekshan di Siriyan dehn gaan ahn fala dehn aal di way tu di Jaadn. Ahn di hoal way, dehn si kloaz an ada tingz weh di Siriyan dehn chroa weh wen dehn mi-di ron fi dehn laif. Afta dat dehn gaahn ripoat weh dehn si tu di king.

16 Soh di peepl dehn gaan ahn dehn tek evriting weh mi deh eena di Siriyan dehn kyamp. Ahn bowt nain pong a flowa mi kaas wan pees a silva, ahn bowt 18 pong a baarli mi kaas wan pees a silva, jos laik weh Jehoava mi seh. 17 Di king mi put di aami aafisa weh ih mi chros fi gyaad di gayt, bot di peepl chrampl op pan ahn, an ih mi ded da di gayt, jos laik weh di servant a di chroo Gaad mi tel di king wen ih gaahn si ahn. 18 Ih mi hapm jos laik weh di servant a di chroo Gaad mi tel di king: “Dehnya taim tumaaro, da di gayt a Samayrya, yu wahn pay wan pees a silva fi bowt 18 pong a baarli, ahn wan pees a silva fi bowt nain pong a flowa.” 19 Bot di aami aafisa mi seh tu di servant a di chroo Gaad: “Cho, dat kuda neva hapm eevn if Jehoava mek hevn oapm op ahn mek grayn rayn dong.” Soh Ilaisha mi tel ahn: “Yu wahn see’t wid yu oan aiy, bot yu noh wahn get fi eet fan it.” 20 Ahn dat da egzakli weh hapm, bikaaz di peepl dehn chrampl op pan ahn, an ih ded da di gayt.