Ikleeziyasteez

11 Chroa bred pahn tap a di waata, bikaaz afta sohn dayz yu wahn fain it agen. 2 Shayr weh yu gat wid sevn er ayt peepl, bikaaz yu noh noa wen sohnting bad wahn hapm pahn di ert.

3 If di klowd dehn ful op a waata, den dehn wahn poar dong rayn pahn di ert. An if wahn chree jrap tuwaadz di sowt er tuwaadz di naat, den ih wahn stay rait deh wehpaat ih jrap dong.

4 Sombadi weh stay di wach pahn di breez noh wahn plaant notn, ahn sombadi weh luk pahn di klowdz noh wahn reep notn.

5 Jos laik how yu noh noa how di bret a laif werk eena wahn baybi badi wen ih deh eena ih ma beli, da rait soh yoo noh andastan weh di chroo Gaad du, ahn hihn da di wan weh du evriting.

6 Plaant sohn seed eena di maanin ahn noh mek yu han res til wen eevnin kohn, bikaaz yu noh noa wich wan wahn groa, weda da di wan weh yu mi plaant da maanin er di wan weh yu mi plaant da eevnin er weda di too a dehn wahn groa.

7 Lait da sohnting gud, an ih gud fi mek sombadi si di son. 8 If sombadi liv fi wahn lata yaaz, ih fi bee hapi evri day. Bot ih need fi memba dat dehn wahn ga lata dayz wen ih wahn feel sad tu; evriting weh wahn hapm noh mek no sens.

9 Yong peepl, unu fi injai di taim wail unu yong ahn bee hapi wail unu stil schrang. Du tingz weh wahn mek unu haat hapi ahn goh afta tingz weh unu aiy dehn laik si. Bot memba dat di chroo Gaad wahn joj unu fi evriting.* 10 Soh stay weh fahn tingz weh wahn hert unu haat ahn kip weh fahn tingz weh wahn damij unu badi, bikaaz unu onli yong ahn schrang fi wahn lee wail.