1 Samwel
29 Di Filisteen dehn gyada dehn soalja da Ayfek, wail di Izrelait dehn mi-di kyamp bai wahn spring da Jezriyel. 2 Ahn di Filisteen roola dehn mi-di paas bai lang wid dehn soalja weh mi groop aaf eena honjridz ahn towznz, ahn Dayvid ahn fi hihn soalja dehn mi-di maach da bak wid Aykish. 3 Bot di Filisteen roola dehn seh: “Wai dehnya Heebroo deh ya?” Soh Aykish tel di Filisteen roola dehn: “Dis da Dayvid, ahn hihn serv Saal, di king a Izrel. Hihn deh wid mi fi oava wahn yaa now. Fahn di day hihn lef Saal ahn kohn ya, an op tu tudeh, Ah noh ga notn bad fi seh bowt ahn.” 4 Bot di Filisteen roola dehn geh beks wid ahn an tel ahn: “Sen da man bak. Mek ih goh bak da di plays weh yu giv ahn. Noh mek hihn goh da waar wid wi, kaaz direkli ih ton gens wi joorin di fait. An if hihn wuda kil fi wee soalja dehn, yu noh tink dat da di bes way fi mek ih king bee hapi wid ahn? 5 Dis da noh di Dayvid weh dehn mi sing bowt ahn weh dehn daans fa wen dehn sing:
‘Saal kil towznz,
Bot Dayvid kil tenz a towznz’?”
6 Soh Aykish sen fi Dayvid ahn tel ahn: “Az shoar az Jehoava alaiv, yoo da wahn gud man, an Ai wuda mi waahn yoo kohn wid mee ahn mi aami, kaaz fahn di day yoo kohn ya an op tu tudeh Ah noh ga notn bad fi seh bowt yoo. Bot di ada roola dehn noh chros yu. 7 Soh goh bak, an Ah hoap tingz goh gud fi yu. Ahn noh du notn fi mek di Filisteen roola dehn geh beks wid yu.” 8 Bot Dayvid tel Aykish: “Wai, mi king? Da weh Ah du? Fahn di day Ai kohn tu yoo an op tu now, yoo fain eniting bad fi seh bowt mee, yu servant? Wai Ai kyaahn goh wid yu fi fait gens yu enimi dehn?” 9 Den Aykish ansa Dayvid ahn seh: “Tu mee, yoo az gud az wan a Gaad aynjel, bot di Filisteen roola dehn seh, ‘Noh mek hihn goh wid wee da waar.’ 10 Now tumaaro yoo ahn yu king servant dehn weh deh wid yu shuda get op ahn lef erli eena di maanin, az soon az di son staat kom op.”
11 Soh Dayvid ahn di soalja dehn get op erli eena di maanin ahn gaahn bak da di Filisteen dehn teritori, ahn di Filisteen dehn gaahn da Jezriyel.