1 Samwel

31 Now di Filisteen dehn mi-di fait gens di Izrelait dehn, ahn di Izrelait dehn mi-di ron weh fahn di Filisteen dehn, bot wahn lata dehn ded pahn Mongt Gilboawa. 2 Di Filisteen dehn chays dong Saal an ih son dehn, ahn dehn kil Saal son dehn. Dehn kil Janatan, Abinadab, ahn Malkai-shoowa. 3 Now di Filisteen dehn mi-di fait eevn haada gens Saal, ahn dehn mi kip aan di shoot aata ahn wid dehn boa an aro. Ahn Saal mi geh hert reeli bad. 4 Den Saal tel ih servant weh bak ih aama an ih wepan dehn: “Tek owt yu soad ahn kil mi soh dat dehnya man weh noh serkomsaiz* noh kohn taacha ahn kil mi.” Bot ih servant neva waahn du dat, bikaaz hihn mi frayd. Soh Saal tek ih soad ahn kil ihself. 5 Wen ih servant si dat Saal kil ihself, hihn tek ih soad ahn kil ihself tu. 6 Soh Saal, ih chree son, di man weh bak ih aama an ih wepan dehn, an aala ih servant weh mi deh wid ahn mi ded da day. 7 Wen di Izrelait dehn weh mi-di liv rong di vali* ahn rong di Jaadn si dat di soalja dehn mi ron weh, ahn wen dehn fain owt dat Saal an ih son dehn mi ded, dehn staat tu lef dehn siti ahn ron weh tu. Soh di Filisteen dehn gaahn liv deh.

8 Di neks day, wen di Filisteen dehn kohn fi tek aala di tingz aafa dehn wan weh mi ded, dehn fain Saal an ih chree son ded pahn Mongt Gilboawa. 9 Soh dehn kot aaf ih hed ahn tek aaf ih aama. Den dehn sen sohn mesinja eena di Filisteen teritori fi spred di nyooz eena aala di templ wehpaat dehn kip dehn gaadz ahn monks aala di peepl. 10 Den dehn put ih aama eena di templ wehpaat dehn kip aala dehn Ashtoret* aidol, ahn dehn nayl ih badi pahn di waal da Betshan. 11 Wen di peepl fahn Jaybesh-gilyad hyaa weh di Filisteen dehn du Saal, 12 aala di soalja dehn chravl aal nait ahn gaahn tek dong Saal an ih chree son badi fahn aafa di waal da Betshan. Den dehn gaahn bak da Jaybesh wid di badi dehn ahn bon dehn deh. 13 Den dehn kehr di boan dehn ahn beri dehn anda di tamarisk chree da Jaybesh, ahn dehn faas* fi sevn dayz.