Sekant Kingz
9 Di prafit Ilaisha kaal wan a di prafit dehn* ahn tel ahn: “Tai op yu kloaz rong yu ways, ahn hori kehr dis batl a ail da Raymot-gilyad. 2 Wen yu get deh, goh luk fi Jeehoo, hoofa pa da Jehoshafat, hoofa pa da Nimshai. Wen yu fain ahn, ih wahn deh wid ih breda dehn; yu fi kehr ahn wan said tu wahn praivit room. 3 Den yu fi tek di batl a ail ahn poar it pan ih hed ahn tel ahn, ‘Dis da weh Jehoava seh: “Ai anoint* yu fi bee king oava Izrel.”’ Afta dat noh wayt fi notn, oapm di doa ahn hori ron weh.”
4 Soh di prafit servant gaahn da Raymot-gilyad. 5 Wen ih get deh, di aami cheef dehn mi-di sidong deh. Hihn seh: “Ah ga wahn mesij fi yu, cheef.” Jeehoo aks ahn: “Da wich wan a wi di mesij fa?” Hihn seh: “Da fi yoo, cheef.” 6 Soh Jeehoo get op ahn gaan eena di hows; di servant poar ail pan ih hed, an ih tel ahn, “Dis da weh Izrel Gaad, Jehoava, seh: ‘Ai anoint yu fi bee king oava Jehoava peepl, fi rool oava Izrel. 7 Yu fi kil aaf aala Ayhab famili. An Ah wahn tek rivenj pahn Jezibel bikaaz ih kil mi prafit dehn an adaz weh mi serv mee, Jehoava. 8 An aala Ayhab famili wahn ded. Ah wahn kil owt aala di mayl disendant fahn Ayhab famili,* inkloodin dehn wan fahn Izrel weh week ahn kyaahn difen dehnself. 9 An Ah wahn mek Ayhab famili ded jos laik how Neebat son Jeroboawam famili mi ded ahn jos laik how Ahaija son Bayasha famili mi ded. 10 Ahn di daag dehn wahn eet op Jezibel pahn wahn pees a lan da Jezriyel, ahn nobadi wahn beri ahn.’” Afta dat ih oapm di doa ahn hori ron weh.
11 Wen Jeehoo gaahn bak tu di ada cheef dehn a di king aami, dehn aks ahn: “Evriting aarait? Wai da krayzi man kohn si yu?” Hihn tel dehn: “Yu noa dat ih krayzi ahn notn weh ih seh mek sens.” 12 Bot dehn seh: “Stap lai tu wi. Tel wi weh ih seh, man.” Soh Jeehoo tel dehn. Hihn aalso tel dehn dat di man seh dat Jehoava anoint ahn az king oava Izrel. 13 Wen dehn hyaa dis, rait away dehn tek dehn roab ahn put it da ih fut pahn di step dehn, ahn dehn bloa di haan ahn seh: “Jeehoo da di king now!” 14 Den Jeehoo, hoofa pa da Jehoshafat, hoofa pa da Nimshai, mek planz fi kil Jehoaram.
Jehoaram ahn di hoal a Izrel aami mi deh da Raymot-gilyad di difen Izrel gens Hazayel, di king a Siriya. 15 King Jehoaram gaahn bak da Jezriyel fi heel op afta di Siriyan dehn inja ahn eena di batl weh ih mi-di fait gens Hazayel, di king a Siriya.
Now Jeehoo seh: “If unu wahn sopoat mee, den noh mek nobadi lef dis siti fi ripoat dis da Jezriyel.” 16 Den Jeehoo get eena ih chariyat ahn gaahn da Jezriyel bikaaz Jehoaram mi dehdeh; ih mi sik afta ih geh inja. An Ayhazaiya di king a Jooda mi gaahn da Jezriyel fi vizit Jehoaram. 17 Wen di wachman weh mi-di stan op pahn di towa da Jezriyel si wahn big krowd a man lang wid Jeehoo, hihn seh: “Ah si wahn big krowd a man di kohn.” Ahn Jehoaram seh: “Kaal wahn soalja weh raid haas ahn tel ahn fi goh meet dehn ahn mek ih aks dehn, ‘Unu deh ya fi kaaz chrobl?’” 18 Soh di haasman gaahn meet ahn an ih seh: “Dis da weh di king seh, ‘Unu deh ya fi kaaz chrobl?’” Bot Jeehoo seh: “Weda er nat Ai deh ya fi kaaz chrobl da non a yu bizniz. Get bihain mi ahn fala mi!”
Den di wachman ripoat dis tu di king: “Di mesinja mi reech, bot ih noh kom bak.” 19 Soh ih sen wahn neks haasman ahn di haasman gaahn meet dehn ahn seh: “Dis da weh di king seh, ‘Unu deh ya fi kaaz chrobl?’” Bot Jeehoo seh: “Weda er nat Ai deh ya fi kaaz chrobl da non a yu bizniz. Get bihain mi ahn fala mi!”
20 Den di wachman ripoat dis tu di king: “Di mesinja mi reech, bot ih noh kom bak. Ahn di wan weh di jraiv di chariyat jraiv jos laik Nimshai granson* Jeehoo, kaaz hihn jraiv laik ih krayzi.” 21 Jehoaram seh: “Get mi chariyat redi.” Soh dehn pripyaa ih waar chariyat, ahn Jehoaram, di king a Izrel, an Ayhazaiya, di king a Jooda, gaahn meet Jeehoo. Eech a dehn gaahn pahn dehn oan chariyat. Dehn gaahn meet op wid Jeehoo pahn di pees a lan weh bilangz tu Naybot fahn Jezriyel.
22 Az soon az Jehoaram si Jeehoo, ih seh: “Yoo deh ya fi kaaz chrobl, Jeehoo?” Bot hihn seh: “Weh yoo tink, Ah di kom eena pees? How pees ku deh wen yu ma Jezibel kip aan di du disgostin tingz* ahn di praktis majik.” 23 Rait away Jehoaram ton ih chariyat rong fi get weh, an ih tel Ayhazaiya: “Dis da wahn chrap, Ayhazaiya.” 24 Ahn Jeehoo tek ih boa, an ih shoot Jehoaram eena ih bak rait bitween ih shoalda dehn ahn di aro kom owt rait chroo ih haat, an ih mi ded eena di waar chariyat. 25 Den ih tel ih aami aafisa Bidkar: “Pik ahn op ahn chroa ahn eena di feel weh bilangz tu Naybot weh da fahn Jezriyel. Memba weh Jehoava mi seh wen mee ahn yoo mi-di raid eena di chariyat bihain ih pa Ayhab? 26 Jehoava mi tel Ayhab: ‘Yestudeh Ah mi si how yu mi kil Naybot an ih son dehn. Ah pramis yu dat Ah wahn mek yu pay fi weh yu du pahn dis saym pees a lan. Dis da weh Ai, Jehoava, seh.’ Soh now, pik ahn op ahn chroa ahn eena dis pees a lan, jos laik weh Jehoava mi seh.”
27 Wen Ayhazaiya, di king a Jooda, si weh mi-di hapm, ih ron weh eena di dairekshan a di hows weh deh eena di gyaadn. (Laytaraan Jeehoo gaan afta ahn an seh: “Kil hihn tu!” Soh dehn atak ahn eena di chariyat wen ih mi-di goh op da Ger, weh deh bai Ibliyam. Bot hihn kantinyu fi ron weh dong tu Megido, an ih ded deh. 28 Den ih servant dehn kehr ahn da Jeroosalem eena wahn chariyat, ahn dehn beri ahn eena Dayvid Siti. 29 Ayhazaiya mi staat tu rool az king oava Jooda eena di 11th yaa wen Ayhab son Jehoaram mi-di rool.)
30 Jezibel mi hyaa dat Jeehoo mi reech da Jezriyel. Soh shee put aan blak aiy shado* ahn fiks ih hyaa, an ih luk dong chroo di windo. 31 Wen Jeehoo mi kohn chroo di gayt, shee seh: “Yu memba weh mi hapm tu Zimrai afta ih kil ih oan laad?” 32 Wen ih luk op da di windo, hihn seh: “Hoo deh pahn mai said?” Rait away bowt too er chree ofishal mi luk dong pan ahn fahn di windo. 33 Hihn seh: “Chroa ahn dong ya!” Soh dehn chroa ahn dong, ahn som a fi shee blod splash op aal pahn di waal ahn di haas dehn, ahn di haas chrampl op pan ahn. 34 Afta dat Jeehoo gaan eensaid gaahn eet ahn jrink. Den hihn seh: “Pleez tek dis disgostin pees a wuman ahn goh beri ahn, bikaaz shee da stil wahn king daata.” 35 Bot wen dehn gaahn fi beri ahn, aal dehn mi fain da ih skol, ih fut dehn, ahn di paam a ih han dehn. 36 Wen dehn gaahn bak, ahn dehn tel Jeehoo weh hapm, hihn seh: “Weh Jehoava mi seh chroo ih servant Ilaija di Tishbait kohn chroo. Ih mi seh, ‘Di daag dehn wahn eet op Jezibel pahn wahn pees a lan da Jezriyel. 37 Ahn Jezibel badi wahn bee laik manyoar pahn di feel eena di pees a lan da Jezriyel, soh dat nobadi ku rekonaiz dat dis da Jezibel.’”