Sekant Kingz
10 Now Ayhab mi ga 70 son da Samayrya. Soh Jeehoo rait sohn leta ahn sen dehn da Samayrya; ih sen dehn tu di leeda dehn fahn Jezriyel, tu di elda dehn, ahn tu di wan dehn weh mi-di luk afta Ayhab pikni dehn. Ih mi seh: 2 “Wen unu get dis leta, Ayhab son dehn wahn deh wid unu, an unu wahn ga wahn schrang siti, sohn waar chariyat, haas, ahn wepan. 3 Unu fi pik di bes ahn moas anarabl wan a Ayhab son dehn ahn put ahn pan ih pa chroan. Den unu fi fait fi difen unu laad hows.”
4 Bot dehn geh frayd bad, ahn dehn seh: “Luk ya! Da how wee wahn stan op tu hihn wen too king kudn eevn stan op tu ahn?” 5 Soh di oavaseeya a di palis,* di govna a di siti, di elda dehn, ahn di wan dehn weh luk afta Ayhab pikni dehn sen dis mesij tu Jeehoo: “Wee da yu servant dehn, ahn wee wahn du evriting weh yu tel wi fi du. Wee noh wahn put nobadi fi bee king. Du wateva yoo tink da di bes ting fi du.”
6 Den ih rait dehn wahn sekant leta; ih mi seh: “If unu deh pahn mai said, an unu waahn obay mee, den unu fi bring Ayhab son dehn hed fi mi tumaaro dis saym taim da Jezriyel.”
Ayhab 70 son dehn mi deh wid di impoatant man dehn fahn di siti weh mi-di tek kayr a dehn. 7 Az soon az di man dehn geh di leta, dehn get Ayhab son dehn ahn kil aal 70 a dehn. Den dehn put dehn hed eena sohn baaskit ahn sen dehn tu Jeehoo da Jezriyel. 8 Di mesinja kom een ahn tel ahn: “Dehn don bring Ayhab son dehn hed.” Soh hihn seh: “Put dehn eena too pail da di siti gayt ahn lef dehn deh til eena di maanin.” 9 Wen ih gaan owt eena di maanin, ih stan op fronta aala di peepl, an ih seh: “Unu inosent. Yes, da mee mi mek planz fi kil mi laad, soh dat da weh Ah du, bot da hoo kil aala dehnya man? 10 Soh unu si, evri singl ting weh Jehoava seh bowt Ayhab famili, Jehoava wahn mek ih kohn chroo. Ahn Jehoava don du weh ih mi seh chroo ih servant Ilaija.” 11 Pahn tap a dat, Jeehoo kil evribadi fahn Ayhab famili weh mi lef da Jezriyel, an ih mi kil aala di impoatant man dehn weh mi werk far ahn, ih fren dehn, an ih prees dehn. Ih neva lef nobadi alaiv.
12 Den ih get op ahn gaahn da Samayrya. Ahn pahn di way deh, dehn mi ga wahn hows wehpaat di shepad dehn kot aaf di sheep dehn wul. 13 Ahn rait deh Jeehoo mi meet op wid Ayhazaiya bradaz. Ayhazaiya da-mi di king a Jooda. Ahn Jeehoo tel dehn, “Da hoo unu?” Ahn dehn seh: “Wee da Ayhazaiya bradaz, ahn wee deh pahn wi way fi fain owt if evriting aarait wid di king son dehn ahn di kween* son dehn.” 14 Ahn rait away ih seh: “Kyapcha dehn!” Soh dehn kyapcha dehn ahn kil dehn da di big wel weh deh da di hows wehpaat di shepad dehn kot aaf di sheep dehn wul. Ih kil 42 a dehn; ih neva lef non a dehn alaiv.
15 Wen Jeehoo mi-di lef fahn deh, ih si Reekab son Jehonadab, hoo mi-di kohn fi meet ahn. Wen ih greet* ahn, ih aks ahn: “Yoo sopoat mee wid aala yu haat jos laik how Ai sopoat yoo wid aala mai haat?”
Jehonadab seh: “Yes.”
Den Jeehoo seh: “Wel, gi mi yu han den.”
Soh ih giv ahn ih han, ahn Jeehoo haal ahn eena di chariyat wid ahn. 16 Den ih seh: “Lesgoh wid mi mek Ah shoa yu dat Ah noh talarayt nobadi weh goh gens Jehoava.” Soh Jeehoo kehr Jehonadab lang wid ahn eena ih waar chariyat. 17 Den ih gaahn da Samayrya, an ih kil evribadi fahn Ayhab famili weh mi lef an enibadi weh mi gat eni kaina kanekshan wid ahn. Ih kil owt evri laas wan a dehn, jos laik weh Jehoava mi tel Ilaija.
18 Den Jeehoo gyada aala di peepl tugeda, an ih tel dehn: “Ayhab neva giv ih bes tu Bayal,* bot Ai gwehn aal owt fi wership ahn. 19 Soh kaal aala Bayal prafit dehn, aala dehn wan weh wership ahn, an aala ih prees dehn tu mi. Aala dehn haftu kohn bikaaz Ah ga wahn big sakrifais fi aafa op tu Bayal. Ah wahn kil enibadi weh noh shoa op.” Bot Jeehoo mi jos waahn chrik dehn soh dat ih ku dischrai evribadi weh wership Bayal.
20 Den Jeehoo seh: “Anonks dat wi wahn ga wahn speshal asembli fi Bayal.” Soh dehn mek di anonksment. 21 Afta dat, Jeehoo sen wahn mesij aal chroo Izrel, an evri singl wan a dehn weh wership Bayal mi kohn. Dehn gaan eena Bayal templ,* ahn dehn ful op di templ fahn wan en tu di ada. 22 Hihn tel di persn weh mi in chaaj a di room wehpaat dehn mi kip di kloaz: “Bring owt sohn kloaz fi mek aala dehn wan weh wership Bayal put aan.” Soh ih bring owt di kloaz fi dehn. 23 Den Jeehoo ahn Reekab son Jehonadab gaan eena Bayal templ. Hihn tel dehn wan weh wership Bayal: “Unu saach gud ahn mek shoar dat da onli dehn wan weh wership Bayal deh ya. Nobadi weh wership Jehoava fi deh ya.” 24 Fainali dehn staat tu aafa op sakrifais ahn bon aafrin. Den Jeehoo pozishan 80 a ih soalja dehn owtsaid, an ih tel dehn: “If eni a di man dehn weh Ah put unu in chaaj a get weh, den unu wahn ded insteda dehn.”*
25 Az soon az dehn don aafa op di bon aafrin, Jeehoo tel di gyaad dehn ahn di aami aafisa dehn: “Kom een ahn kil dehn! Noh mek non a dehn get weh!” Soh di gyaad dehn ahn di aami aafisa dehn kom een ahn kil dehn wid dehn soad ahn den chroa dehn owta di templ. Ahn dehn gaahn di kil dehn aal di way tu di neks bildin weh deh* da Bayal templ. 26 Den dehn bring di stoan dehn weh dehn wership fahn owta Bayal templ ahn bon op eech a dehn. 27 Dehn dischrai di stoan dehn weh dehn yooz fi wership Bayal, ahn dehn dischrai Bayal templ ahn ton it intu tailit. An ih deh soh dong tu dis day.
28 Soh Jeehoo kompleetli geh rid a Bayal wership fahn eena Izrel. 29 Bot Jeehoo mi komit di sayhn sin dehn weh Neebat son Jeroboawam mi mek Izrel komit. Hihn mi wership di goal kyaaf dehn weh mi deh da Betel ahn Dan. 30 Soh Jehoava tel Jeehoo: “Yu du gud ahn yu du weh rait eena mai sait wen yu du aal weh Ah mi disaid fi du tu Ayhab famili. Ahn bikaaz a dat, foa jenarayshan a yu son dehn wahn rool az king oava Izrel.” 31 Bot Jeehoo neva chrai fala di Laa a Jehoava di Gaad a Izrel wid ih hoal haat. Hihn mi alow di Izrelait dehn fi komit di saym sin dehn weh Jeroboawam mi mek dehn komit.
32 Eena dehndeh dayz, Jehoava alow paats a Izrel fi geh kyapcha* lee bit bai lee bit. Hazayel mi kip aan di atak dehn aal chroo Izrel teritori, 33 fahn di Jaadn tuwaadz di ees. Ih tek aala di lan da Gilyad wehpaat Gad chraib, Rooben chraib, ahn Manaaseh chraib deh. Dis mi inklood di teritori fahn Aroawer weh deh bai di Arnon Vali,* ahn den op tu Gilyad ahn Bayshan.
34 Ahn di res a Jeehoo hischri weh taak bowt ih powa an evriting weh hihn mi du, deh rait dong eena di hischri buk a Izrel king dehn. 35 Den Jeehoo ded,* ahn dehn beri ahn da Samayrya. An ih son Jehoawahaz staat rool az king afta ahn. 36 Jeehoo mi rool az king oava Izrel fi 28 yaaz da Samayrya.