Praverbz
24 Yu noh fi jelos wikid peepl,
Ahn yu noh fi kip kompni wid dehn,
2 Bikaaz dehn tink bowt loan vailent tingz,
Ahn dehn aalwayz di taak bowt how dehn ku hert adaz.
3 Wizdom ku help wahn persn bil ih hows,*
An andastandin ku help ahn fi bil it schrang.
4 Ih yooz ih nalij fi ful op ih room dehn
Wid aal kaina preshos ahn byootiful chrezhaz.
5 Wahn waiz man powaful,
Ahn nalij mek ih ga moa powa.
6 Wen yu goh da waar, yu need fi fala waiz dairekshan,
An if yu aks fi advais, tingz gwehn gud fi yu.*
7 Ih impasabl fi mek wahn foolish persn geh chroo wizdom.
An ih noh ga notn fi seh da di siti gayt.
8 Peepl wahn kaal sohnbadi weh plan fi du wikid tingz
Wahn maasta a eevl aidyaaz.
9 Di tingz weh wahn foolish persn plan mek ih sin,
Ahn peepl hayt wahn persn weh mek fon a adaz.
10 If yu geh diskorij wen yu di goh chroo haad taimz,
Yu wahn looz yu schrent.
11 Reskyu dehn wan weh wahn ded,
Ahn sayv dehn wan weh peepl waahn kil.
12 If yu seh, “Bot wi neva noa bowt dat,”
Yu noh tink dat Gaad, di wan weh noa weh deh eena peepl haat,* noa weh yu di tink?
Yes, di wan weh wach yu* wahn noa,
An ih wahn pay bak eech persn fi di tingz weh ih du.
13 Mi son, eet honi, bikaaz ih gud fi yu.
Pyoar honi tays sweet.
14 Saym way soh, memba dat wizdom gud fi yu.
If yu fain it, yu wahn ga wahn gud fyoocha
Ahn yu wahn aalwayz ga hoap.
15 Noh ak laik wahn wikid persn ahn laywayt wahn raichos persn kloas tu ih hows.
Noh dischrai di plays wehpaat ih liv.
16 Eevn if wahn raichos persn jrap dong sevn taimz, ih wahn get op agen.
Bot dizaasta wahn mek wahn wikid persn faal dong ahn noh get op.
17 Yu noh fi feel hapi wen yu enimi jrap dong,
Ahn yu noh fi ga jai wen ih chrip dong.
18 Bikaaz if yu du dat, Jehoava wahn see’t an ih noh wahn hapi wid yu,
An ih wahn stap bee beks wid yu enimi.
19 Noh geh beks wid wahn wikid persn,
Ahn noh jelos wikid peepl,
20 Bikaaz wahn eevl persn noh wahn ga no fyoocha.
Ahn di lamp a wikid peepl wahn owt.
21 Mi son, ga lata rispek fi Jehoava ahn di king.
Ahn noh kip kompni wid peepl weh ribel,*
22 Bikaaz dizaasta wahn kohn pahn dehn sodn-wan.
Ahn nobadi noa how di too a dehn* wahn ponish peepl weh ribel.
23 Dehnya tingz da weh waiz peepl seh:
Wen yu di joj, ih noh gud fi chreet wahn persn beta dan adaz.
24 Peepl wahn kers* enibadi weh tel wahn wikid persn, “Yu raichos,”
Ahn di nayshan dehn wahn kandem dehn tu.
25 Bot tingz gwehn gud fi dehn wan weh karek ahn;
Dehn wahn geh bles wid lata gud tingz.
26 Peepl wahn rispek wahn persn* weh ansa eena wahn aanis way.*
27 Fers du yu werk owtsaid ahn get evriting redi eena di feel, den bil yu hows.*
28 Noh testifai gens yu nayba if yu noh ga gud reezn,
Ahn noh yooz yu mowt fi fool op adaz.
29 Yu noh fi seh: “Ah wahn du ahn di saym ting weh ih du mi;
Ah wahn pay ahn bak fi weh ih du mi.”*
30 Ah mi waak paas wahn feel, wahn grayp aachad,
Weh bilangz tu wahn layzi persn weh noh ga no sens.
31 Ah mi si lata bush groa pan it,
Ahn lata prikl mi groa pahn di grong.
Ahn di stoan waal mi brok op.
32 Wen Ah si dat, Ah staat tu tink bowt it.
Ah mi see’t an Ah mi laan dis lesn:*
33 If yu sleep wahn lee bit moa, yu tek wahn lee faiv,
Ahn yu foal op yu han fi res,
34 Den yu wahn geh poa sodn-wan laik wen wahn teef atak sohnbadi,
Ahn yu sofarin wahn kohn laik wen wahn teef atak sohnbadi wid wahn wepan.