Wen Yu Feel Laik Giv Op Pahn Laif

Tek fi egzampl, Sally,a fahn di United States, weh mi looz nayli evriting weh ih mi oan eena wahn harikayn. Shee seh: “Ah mi feel laik Ah mi kyaahn tek it nohmoh. Sohn dayz, Ah mi feel laik Ah mi reech mi limit.”

Wat if yu looz wahn fren er relitiv eena det? Janice, fahn Australia, seh: “Wen Ah mi looz di too a mi son eena det, Ah mi feel laik mi laif jos faal apaat. Ah mi haftu werk haad fi pik miself op agen. Ah bayg Gaad: ‘Pleez, mi haat kyaahn tek it nohmoh! Jos mek Ah ded, Ah noh waahn kantinyu fi liv.ʼ”

Daniel, mi feel soh emti wen ih waif mi cheet pan ahn. Hihn seh: “Wen mi waif mi tel mi dat shee mi cheet pahn mi, da mi laik if sombadi stab mi eena mi haat wid wahn naif oava ahn oava agen. Dis terabl payn mi laas fi sohn monts.”

Dis ishu a Di Wachtowa wahn kansida how wi ku fain meenin eena laif eevn wen:

• Yu goh chroo wahn nachral dizaasta

• Sombadi yu lov ded

• Yu hozban er waif cheet pahn yu

• Yu sik reeli bad

• Yu feel laik yu kyaahn bayr op nohmoh

Soh, fers, mek wi kansida how wi ku koap wen wahn nachral dizaasta hapm.