Wen Yu Goh Chroo Wahn Nachral Dizaasta

“Wi mi feel kompleetli hoaples. Evriting weh wi mi oan mi geh dischrai bai wahn modslaid ahn wahn flod.”—Andrew, Sierra Leone.

“Afta di harikayn, wi mi gaahn bak hoam. Evriting mi gaahn. Wi mi shak. Mi daata jrap dong pan ih nee ahn staat tu baal.”—David, Virgin Islands.

IF YOO eva servaiv wahn dizaasta, yu mait andastan how ada peepl feel weh gaahn chroo wahn dizaasta. Fi egzampl, dehn feel kanfyooz, schres owt, ahn dehn eevn ga naitmyaa. Lata peepl weh goh chroo dis, feel laik ih noh eevn mek sens fi kantinyu liv.

If yoo gaahn chroo dis, yu mait feel laik yu reech tu di point weh yu kyaahn tek it nohmoh. Yu mait eevn staat tu feel laik ih noh mek sens fi kantinyu liv. Bot, di Baibl help wi fi si dat ih mek sens fi kantinyu liv ahn dat wi ku ga hoap fi wahn beta fyoocha.

DI CHROOT EENA DI BAIBL GI WI HOAP

Ikleeziyasteez 7:8 seh: “Ih beta wen sohnting finish dan wen ih staat.” Wen yu jos staat tu get bak pahn yu fut afta wahn dizaasta, laif mait luk hoaples. Bot az yu werk haad fi bil op bak yu laif, tingz ku geh beta.

Di Baibl taak bowt wahn taim wen “nohmoh kraiyin ahn baalin wahn deh.” (Isaiah 65:19) Dis wahn kohn chroo wen di ert kohn fi bee wahn paradais anda Gaad Kingdom. (Saam 37:11, 29) Nachral dizaasta wahn neva hapm agen. Eni paynful ting weh wi mi gaahn chroo eena di paas wahn geh irays fahn wi main fareva, bikaaz Jehoava pramis: “Di tingz fahn di paas noh wahn kom bak op eena wi main, ner wi haat.”—Isaiah 65:17.

Jos imajin: Di Kriyayta mek planz ‘fi gi yu wahn fyoocha ahn wahn hoapʼ—wahn peesful laif anda fi hihn roolaship. (Jeremiah 29:11) Yoo tink dis chroot ku gi yu hoap eena laif? Sally, weh wi mi menshan erliya eena dis aatikl, seh: “If yu tink bowt aala di wandaful ting dehn weh Gaad Kingdom wahn du fi wi eena di fyoocha, ih ku help yu fi let goh a di paas ahn get chroo eni sichuwayshan yu di fays now.”

Tek di taim fi laan moa bowt weh Gaad Kingdom wahn soon du fi hyoomanz. If yu du dis, yu ku ga kanfidens dat eevn doa yu mi sofa bikaaz a wahn dizaasta, ih mek sens fi kantinyu liv az yu wayt wid eeganis fi wahn fyoocha widowt dizaasta. Eena di meentaim, di Baibl gi wi sohn yoosful advais weh ku help wi fi koap wid di prablemz weh kom op afta wahn dizaasta hapm. Mek wi luk pahn sohn egzampl.

Sohn Baibl Vers Weh Ku Help Yu fi Koap

Get inof res.

“Ih beta fi geh wahn lee bit a res, bikaaz if yu oava werk yuself, dat wahn bee laik if yu di chays afta loan breez.”—Ikleeziyasteez 4:6.

Afta yu fays wahn terabl ekspeeryens, sohn peepl weh du risaach seh dat “if yu noh get inof sleep . . . ih ku mek yu simtomz fahn da bad ekspeeryens wers ahn mek it haada fi kip yu feelinz anda kanchroal.” Soh ih waiz fi get inof res.

Taak bowt how yu feel.

“Di tingz weh wahn persn wori bowt mek ih haat feel hevi, bot di gud tingz weh wahn persn seh mek ih haat feel hapi agen.”—Praverbz 12:25.

Taak tu wahn famili memba er wahn fren weh yu chros. Apaat fahn jos lisn tu yu, dehn ku inkorij yu ahn gi yu gud advais.a

Luk faawod tu beta taimz weh deh heda yu.

“Gaad pramis wi wahn nyoo hevn ahn wahn nyoo ert wehpaat jostis wahn deh. Wi reeli di luk faawod tu dis.”—2 Peeta 3:13.

a Wahn persn weh di goh chroo schres er woriz fi wahn lang taim mait need fi geh medikal help.