Wen Yu Hozban er Waif Cheet Pahn Yu

“Wen mi hozban mi tel mi dat ih mi-di lef mi fi wahn yonga uman, Ah mi waahn ded. Ah mi kyaahn bileev it, espeshali wen Ah tink bowt aal di sakrifais dehn Ai mi mek fi hihn.”—Maria, Spain.

“Sodn-wan mi waif mi lef mi, ih mi hert soh bad, da-mi laik if sohnting eensaida mi ded. Aala wi jreemz, wi hoaps, ahn wi planz mi geh dischrai. Sohn dayz, Ah mi tink dat Ah mi don get oava di payn ahn woriz, bot den, Ah wuda fain miself di feel dipres aal oava agen.”—Bill, Spain.

WEN wahn hozban er waif cheet, ih ku reeli hert di wan weh ih cheet pan. Sohntaim doh, di inosent persn stil fergiv di wan weh cheet pan ahn, an werk haad fi ga wahn gud rilayshanship agen.a Bot weda di marij servaiv er nat, di wan weh dehn cheet pan stil sofa wahn lat. Soh, how dehn ku deel wid dehn paynful feelinz?

SOHN BAIBL VERS WEH KU HELP YU FI KOAP

Eevn doa ih hert dehn haat, wahn lata hozban er waif weh geh cheet pan di fain komfert eena di Baibl. Dehn geh fi laan dat Gaad kay fi dehn; hihn si dehn tyaaz ahn feel dehn payn.—Malachi 2:13-16.

“Wen mi woriz mi feel laik da tu moch fi bayr, yu komfert mi ahn yu kaam mi dong.”—Saam 94:19.

Bill seh: “Az Ah reed da vers, Ah picha Jehoava di komfert mi an eez mi payn, jos laik weh wahn lovin pa wuda du.”

“Yu laayal tu enibadi weh laayal tu yoo.”—Saam 18:25.

Carmen hozban mi cheet pan ahn fi monts. Shee seh: “Mai hozban neva laayal, bot Ai ku chros dat Jehoava wahn aalwayz bee laayal tu mee. Hihn wahn neva let mi dong.”

“Unu noh fi wori bowt notn, bot unu mos pray ahn aks Gaad fi evriting . . . Den Gaad wahn gi unu wahn kaina pees weh nobadi kyaahn andastan. Ih wahn mek da sayhn pees wach oava unu haat.” —Filipiyanz 4:6, 7.

Sasha seh: “Ah mi reed dis skripcha oava ahn oava agen. An az Ah mi pray moa ahn moa, Gaad gi mi pees eena mi laif.”

Evribadi weh wi mi menshan eena dis aatikl mi feel laik giv op. Bot dehn mi chros dat Jehoava mi wahn help dehn ahn gi dehn di schrent weh dehn need fahn di Baibl. Bill seh: “Wen evriting mi luk laik ih di faal apaat, mi fayt mi gi mi laif meenin. Eevn doa Ah waak fi wahn wail ‘eena di vali weh pich blak,ʼ Gaad mi deh wid mi.”—Saam 23:4.

a Fi moa infamayshan pahn weda fi fergiv er nat, si di seeriz eena di Awake! a Aypril 22, 1999, payj 3, 5 ahn 9. “When a Mate Is Unfaithful.”

Weh Ku Help Yu fi Koap

Reed ahn tink bowt skripchaz weh giv komfert.

Bill seh: “Ai mi reed di buk a Joab ahn den Saamz. Evritaim Ah mi fain wahn vers weh fit mai sichuwayshan, Ah mi maak it. Ah mi fain owt dat dehnya Baibl raita mi gaahn chroo di sayhn kaina payn ahn woriz weh Ai mi-di goh chroo.”

Lisn tu komfertin myoozik.

Carmen seh: “Ah doz lisn tu myoozik da nait wen Ah mi kyaahn sleep. Dat mi reeli komfert mi.” Daniel seh: “Ah mi laan fi play di gitaar, ahn di myoozik mi help mi fi ga pees.”

Taak bowt how yu feel.

Daniel seh: “Ah neva yoostu laik taak bowt mi feelinz wid adaz. Bot Ah mi ga sohn gud frenz, an Ah taak tu dehn evri day. Ah wuda poar owt mi haat tu dehn eeda wen Ah rait letaz tu dehn er taak tu dehn. Dat mi reeli help.” Ahn Sasha seh: “Di help fahn mi famili mi veri impoatant. Mi ma aalwayz mi dehdeh fi mi. Wen Ah mi feel laik taak, shee mi aalwayz dehdeh fi lisn. Mi pa mi aalwayz lovin tu mi. Hihn neva rosh mi, bot ih mi mek Ah heel eena mi oan taim.”

Pray wahn lat.

Carmen seh: “Ah mi pray wahn lat. Ah mi feel laik Gaad mi deh kloas tu mi, di lisn tu mi, ahn di help mi. Eena dis terabl taim a mi laif, Ah mi jraa eevn kloasa tu Gaad.”