1 | Pryaa “Chroa Aala Unu Woriz ahn Kyaa Pahn Hihn”

DI BAIBL SEH: “Chroa aala unu woriz ahn kyaa pahn hihn, bikaaz hihn kay bowt unu.”—1 PEETA 5:7.

Weh Dis Meen?

Jehoava invait wi fi taak tu ahn bowt eniting weh mek wi wori. (Psalm 55:22) Wahn prablem wahn neva bee tu big er tu smaal fi taak bowt eena wi pryaaz tu Jehoava. If ih mata tu wee, den ih mata tu Jehoava. Pryaa da wahn impoatant step weh ku help wi feel kaam.—Filipiyanz 4:6, 7.

How Dis Ku Help?

Wen wi ga wahn mental helt prablem, wi mait feel laik wi dehn pahn wi oan. Peepl noh aalwayz andastan evriting weh wi di goh chroo. (Proverbs 14:10) Wen wi poar owt wi haat tu Jehoava ahn tel ahn evriting weh wi feel, wi ku bee shoar dat hihn wahn reeli lisn tu wi an andastan weh wi di goh chroo. Jehoava noa weh wi di goh chroo, ahn hihn waahn mek wi poar owt wi haat tu ahn, an tel ahn bowt eniting weh di bada wi.—2 Chronicles 6:29, 30.

Di moa wi pray tu Jehoava, di moa wi wahn feel kanvins dat hihn kay bowt wi. Yu wahn feel jos laik di saamis weh mi pray ahn seh: “Yoo si mi sofarin; yoo noa bowt aal weh di schres mi owt.” (Psalm 31:7) Wen wi noa dat Jehoava di feel weh di goh chroo, dat help wi bayr op wid wi chraiyalz. Bot Jehoava du moa dan jos noatis weh di hapm tu wi. Hihn andastan weh wi di goh chroo beta dan enibadi els ahn hihn help wi fi fain komfert an inkorijment eena di Baibl.

How di Baibl Di Help Julian

How Mi Woriz Afek Mi

“Ih reeli haad fi mek Ah noh wori ahn feel schres owt. Ai sofa wid wahn kandishan weh naym OCD (obsessive-compulsive disorder). Ah wuda staat tu feel schres owt oava eniting, enitaim. Wan minit Ah wuda feel gud, ahn di neks minit Ah wuda jos staat wori fi no reezn. Moas a di taim wen Ah deh rong peepl da wen Ah wuda staat feel laik dat. Ai aalwayz di wori bowt weh peepl tink bowt mi.

“Som a mi frenz weh noa weh Ah di goh chroo du dehn bes fi sopoat mi. Sohntaim, di tingz weh dehn seh da noh weh Ah wuda waahn hyaa. Bot Ah reeli tankful dat dehn chrai dehn bes fi help mi.

“Ai ga wahn kandishan weh mek Ah wori tu moch, feel frayd, ahn schres owt. Pahn tap a dat, Ah ga OCD. Ahn kaaz a dat, Ah fain it haad fi pray sohntaim. Ah haftu werk haad fi kansenchrayt ahn pray tu Jehoava. Wahn lata ting wuda deh pahn mi main; sohntaim da tu moch fi kip op wid. Wen Ah kyaahn kanchroal di tingz weh Ah tink bowt, ih haad fi tel Jehoava how Ah feel.”

How di Baibl Help Mi?

“Ah laan dat Ah noh need fi seh wahn lang er fansi pryaa tu Jehoava fi mek hihn lisn tu mi. Sohntaim wen Ah noh noa how fi tel Jehoava how Ah di feel, Ah jos wuda seh: ‘Jehoava, pleez help mi.ʼ Eevn wen Ah du dat, Ah noa dat Jehoava andastan ahn help mi wid weh Ah need. Ah aalso geh medikal help; di terapis help mi wahn lat. Ah soh hapi dat dehnya too tingz help mi wahn lat, an Ah di du moch beta dan bifoa. Eevn doa ih ku bee haad fi aks Jehoava fi help, Ah du it bikaaz Ah noa fi shoar dat hihn lov mi ahn dat hihn reeli waahn help mi.”