Shoa Kompashan

Di Prablem

If wi onli tink bowt how peepl difrent fahn wee, wi ku staat tu tink dat dehndeh difrens meen dat sohnting rang wid dehn. Soh dis wuda shoa, den, dat wi prejudis gens peepl weh difrent fahn wee. Wans wi staat tu tink bowt peepl eena wahn negitiv way, ih wahn bee haad fi mek wi shoa kompashan tu dehn. An if wi noh shoa kompashan, ih ku bee dat wi ga wahn biga prablem—wi ga prejudis eena wi haat.

How di Baibl Ku Help Wi fi Deel Wid Dis Prablem?

“Unu fi rijais wid peepl weh rijais ahn krai wid peepl weh krai.”—ROAMANZ 12:15.

Weh dat meen? Wi ku som op dis skripcha eena jos too werdz—shoa kompashan. Wat da kompashan? Di werd weh wi chranslayt az kompashan eena dis aatikl meen fi put wiself eena wahn nada persn sichuwayshan ahn feel weh da persn di feel.

Wai ih Gud fi Mek Wi Shoa Kompashan tu Ada Peepl?

Wen wi put wiself eena wahn nada persn sichuwayshan, wi get fi si weh wi gat in kaman wid da persn. Wi mait fain owt dat wi feel di saym way az da persn ahn dat wi wuda du di saym tingz weh da persn wuda du. Kompashan help wi fi si dat evribadi, noh mata weh bakgrong dehn kohn fram, da paat a di hyooman famili. If wi tink bowt di tingz weh wi gat in kaman wid peepl, wi wahn ga wahn beta vyoo a dehn.

Kompashan help wi fi rispek ada peepl. Tek, fi egzampl, Anne-Marie fahn Senegal. Shee yoostu luk dong pahn peepl weh kohn fahn wahn loawa klaas dan shee. Noatis weh shee seh mi help ahn: “Wen Ah mi si how dehndeh peepl mi-di sofa, Ah staat tu tink how Ai wuda mi feel if Ah mi-di sofa laik dat. Bikaaz a dat, Ah staat tu riyalaiz dat Ah noh beta dan dehn. An Ah neva du notn fi mek Ah bee beta dan dehn.” Soh if wi chrai fi andastan weh ada peepl di goh chroo, wi noh wahn tink negitiv tingz bowt dehn.

Weh Yu Ku Du?

If yu vyoo wahn sertn rays er kolcha eena wahn negitiv way, chrai fi si wat da som a di tingz weh yu gat in kaman wid dehn. Fi egzampl, imajin how dehn feel wen:

Kompashan help wi fi si dat evribadi, noh mata weh dehn kohn fram, da paat a di hyooman famili

dehn di eet wahn meel wid dehn famili
dehn don werk fi di day
dehn di spen taim wid dehn frenz
dehn di lisn tu fi dehn fayvrit myoozik

Den, chrai fi imajin yuself eena fi dehn sichuwayshan. Aks yuself:

‘Weh Ai wuda du if sombadi mek Ah feel laik Ah noh wert notn?ʼ
‘How Ai wuda feel if ada peepl joj mi bifoa dehn eevn get fi noa mi?ʼ
‘If Ai mi bilangz tu da groop a peepl, how Ai wuda waahn adaz chreet mi?ʼ

Wahn wait man ahn wahn Indiyan man di shoa wan anada pichaz a tingz weh dehn gat in kaman, laik dehn famili, spoats, ahn werk.

Reel-Laif Egzampl: Robert (Singapore)

Robert seh: “Eena di paas, Ah yoostu tink dat peepl weh def mi schraynj, dat dehn neva smaat, ahn dat dehn kech feelinz fi evriting. Soh Ah yoostu avoid dehn. Bot Ah neva tink dat di way Ah mi feel bowt dehn da-mi bikaaz a prejudis, sins Ah neva mi-di hert enibadi.”

Robert kantinyu fi seh: “Ah staat tu ga kompashan fi peepl weh def, ahn dat mi help mi fi fait gens di prejudis weh Ah mi gat eena mi haat. Fi egzampl, Ai mi tink dat sohnting mentali rang wid peepl weh def, kaaz wen Ah taak tu dehn, dehn wuda jos luk pahn mi wid wahn blank luk pahn dehn fays. Soh Ah chrai fi imajin how Ai wuda feel if Ah kudn hyaa wen sombadi di taak tu mi. Wel, af koars, Ai wuda ga wahn blank luk pahn mai fays tu! An eevn if Ah mi gat een wahn hearing aid, peepl mait tink dat Ah di schrogl fi andastan dehn, bot reeli Ah wuda di schrogl fi hyaa dehn.

“Di moa Ah imajin miself eena wahn def persn sichuwayshan, di moa di prejudis weh Ah feel eena mi haat staat tu disapyaa.”