Wai Wi Sofa, Geh Oal, ahn Ded?

Wi Sofa Bikaaz a Weh Adam ahn Eev Du

“Sin mi fos kom eena di werl sayka wan man, ahn sin bring det. Soh det spred tu evribadi.”—ROAMANZ 5:12.

Wen Gaad mi kriyayt Adam ahn Eev, di fers too peepl pan ert, hihn mi gi dehn wahn perfek main ahn wahn perfek badi. Hihn mi put dehn eena wahn paradais pan ert; di byootiful gyaadn a Eedn. Hihn mi tel dehn dat dehn kuda mi eet fahn aala di chree dehn eena di gyaadn, eksep fi wan a dehn. Bot, Adam ahn Eev mi chooz fi sin wen dehn mi eet fahn da wan chree weh Gaad tel dehn noh fi eet fram. (Genesis 2:15-17; 3:1-19) Bikaaz dehn neva obay Gaad, hihn neva alow dehn fi stay eena di gyaadn. Afta dat, laif mi staat tu geh haad fi dehn. Laytaraan, dehn mi ga chiljren, ahn laif mi geh haad fi dehn tu. Aala dehn mi geh oal ahn ded. (Genesis 3:23; 5:5) Wee geh sik, geh oal, ahn ded tu bikaaz wee kohn fan Adam ahn Eev.

Wi Aalso Sofa Bikaaz a Wikid Aynjelz

“Di hoal werl deh anda di powa a di wikid wan.”—1 JAN 5:19.

Datdeh “wikid wan” da Saytan. Hihn da wahn aynjel weh mi ribel gens Gaad. (Jan 8:44; Revilayshan 12:9) Laytaraan, sohn aynjel mi jain Saytan eena ih ribelyan. Di Baibl kaal dehn deemonz. Dehnya wikid aynjel yooz dehn powa fi chrai chrik peepl fi mek dehn noh obay Gaad. Dehn chrai mek peepl du bad tingz. (Psalm 106:35-38; 1 Timoti 4:1) Saytan ahn di deemonz laik si wen peepl sofa.

Wi Sofa Bikaaz Sohntaim Wee Mek Bad Disizhanz

“Wateva wahn persn plaant, dat da weh ih wahn reep.”—GALAYSHANZ 6:7.

Eena lata wayz, wi sofa bikaaz a imperfekshan ahn bikaaz a di powa weh Saytan gat eena dis werl. Bot sohntaim da wee mek wi laif haada. How? Wen wi chooz fi du bad tingz er mek foolish disizhanz. Pan di ada han, wen wi du gud tingz, wi reep gud rizolts. Fi egzampl, wahn hozban weh aanis, weh werk haad, ahn weh lov ih famili wahn aalwayz injai lata gud tingz an ih wahn mek ih famili bee hapi. Bot if ih laik gyambl, laik jrink tu moch, er if ih layzi, dis wahn mek hihn an ih famili poa. Soh ih impoatant fi mek wi lisn tu wi Kriyayta. Hihn waahn mek wi reep lata gud tingz ahn dis inklood “lata pees.”—Psalm 119:165.

Wi Sofa Bikaaz Wi Di Liv Eena “di Laas Dayz”

“Di laas dayz wahn bee daynjaros . . . , peepl wahn lov dehnself ahn lov moni . . . Dehn noh wahn obay dehn payrents . . . Dehn noh wahn ga no self-kanchroal. Dehn wahn bihayv laik wail animal, ahn dehn wahn hayt evriting weh gud.”—2 TIMOTI 3:1-5.

Dat da how lata peepl bihayv tudeh. Dis da proof dat weh di Baibl prafesai di kohn chroo tudeh ahn dat wi di liv eena di “laas dayz” a dis wikid werl. Di Baibl aalso prafesai dat joorin di laas dayz lata waar an ertkwayk wahn di hapm, peepl wahn di staav, ahn lata dizeez wahn deh. (Machyu 24:3, 7, 8; Look 21:10, 11) Dehnya da sohn reezn wai soh moch peepl di sofa ahn ded.