Hoo Kaaz Aala Wi Sofarin?
If Gaad noh kaaz sofarin, den wai lata peepl stil di staav ahn lata peepl stil poa? Wai wi ga lata waar, terabl dizeez, ahn nachral dizaasta? Gaad Werd, di Baibl, shoa wi chree mayn reezn wai hyoomanz sofa:
Selfishnis, Greedinis, ahn Haychrid. “Man rool oava man an onli kaaz payn.” (Ecclesiastes 8:9) Wahn lata taim peepl sofa bikaaz kruwil ahn selfish hyoomanz tek advantij a dehn.
Taim ahn Tingz Weh Peepl Noh Ekspek. Wahn lata taim hyoomanz sofa “bikaaz taim ahn tingz weh dehn noh ekspek afek aala dehn.” (Ecclesiastes 9:11) Dat meenz dat peepl deh da di rang plays da di rang taim, bad tingz hapm bai aksident, er peepl noh kyaaful er dehn mek mistayk.
Di Wikid Wan Weh Di Rool di Werl. Di Baibl shoa wi di nomba wan reezn wai hyoomanz sofa. Ih seh: “Di hoal werl deh anda di powa a di wikid wan.” (1 Jan 5:19) Di “wikid wan” da Saytan di Devl, hihn da wahn powaful spirit kreecha weh mi yoostu bee wan a Gaad aynjel bot hihn mi “neva kantinyu eena di chroot.” (Jan 8:44) Sohn ada aynjel mi ton deemonz bikaaz dehn mi jain Saytan an dehn gaahn gens Gaad jos fi goh afta weh dehn mi waahn fi dehnself. (Genesis 6:1-5) Eva sins dehn mi gaahn gens Gaad, Saytan an ih deemon dehn kanchroal di werl eena wahn kruwil way, espeshali nowadayz. Di Devl beks bad an ih “di fool op di hoal ert,” ahn dis kaaz “chrobl fi di ert.” (Revilayshan 12:9, 12) Saytan da wahn kruwil roola. Ahn hihn hapi wen hyoomanz sofa. Soh, Saytan da di wan weh di kaaz peepl fi sofa, noh Gaad.
TINK BOWT DIS: Onli sohnbadi weh eevl ahn kruwil wuda mek inosent peepl sofa. Bot Gaad da noh laik dat, di Baibl seh: “Gaad da lov.” (1 Jan 4:8) Soh, sins Gaad da lov, “ih impasabl fi tink dat di chroo Gaad wahn du sohnting wikid, dat di Almaiti du sohnting rang!”—Job 34:10.
Bot yu mait wanda, ‘How lang di Almaiti Gaad wahn mek Saytan wikid roolaship laas?ʼ Laik weh wi mi laan, Gaad reeli hayt wikidnis an ih hert ih haat fi si wi sofa. Pahn tap a dat, ih Werd tel wi: “Chroa aala unu woriz ahn kyaa pahn hihn, bikaaz hihn kay bowt unu.” (1 Peeta 5:7) Gaad lov wi an ih ga di powa fi geh rid a aal kaina sofarin an injostis. Eena di neks aatikl, wi wahn si how Gaad wahn du dat.a