Wai Peepl Noh Ga Rispek fi Adaz Nohmoh?

WAI IH IMPOATANT FI RISPEK ADAZ?

Wen wi shoa rispek fi adaz, wi ku kip wahn bad sichuwayshan fahn geh wers.

Wahn skripcha seh: “Wahn jentl ansa ku mek sohnbadi weh beks kaam dong, bot wen wahn persn taak eena wahn rof way ih ku mek sombadi geh beks.” (Praverbz 15:1) Wen wahn persn taak an ak eena wahn way weh noh shoa rispek, tingz ku geh wers.
Jeezas mi seh: “Wateva ful op wahn persn haat, dat da weh ih wahn taak bowt.” (Machyu 12:34) If wi noh rispek peepl weh kohn fahn difrent rays, chraib, konchri, er kolcha, ih shoa dat wi ku ga wahn seeryos prablem. Ih ku shoa dat wi noh wilin fi aksep ahn rispek dehndeh peepl ahn dat wi need fi ajos wi tinkin.

Eena wahn servay weh dehn mi du laas yaa, owta 32,000 peepl fahn 28 konchriz, moa dan haaf mi seh dat dehn neva yet si soh moch disrispek eena di werl.

HOW YU KU RISPEK ADAZ?

Rispek evribadi yu meet—eevn if yu noh agree wid weh dehn bileev. Fain tingz weh yu kud agree pan. Dat wahn help yu fi noh joj adaz ahn noh pik pahn dehn.

“Stap joj adaz, ahn Gaad noh wahn joj unu.”—Machyu 7:1.

Chreet adaz di way yu wuda waahn dehn chreet yu. If yu chreet adaz eena wahn kain ahn fyaa way, moa dan laikli dehn wahn chreet yu di saym way.

“Chreet adaz di saym way how unu waahn dehn chreet unu.”—Look 6:31.

Fergiv adaz. If sombadi tel yu er du yu sohnting weh neva kain, chros dat di persn neva du it fi spait.

“Wahn man weh ga andastandin noh eezi fi geh beks, ahn da wahn byootiful ting wen ih fergiv sombadi weh mek wahn mistayk.”—Praverbz 19:11.

Dis da eensaida wahn Kingdom Haal a Jehoava Witnisiz bifoa di meetin staat. Yong an oal peepl fahn difrent bakgrong di spen taim wid eech ada.

HOW JEHOAVA WITNISIZ SHOA RISPEK FI ADAZ?

Az Jehoava Witnisiz, wi shoa rispek fi adaz an inkorij peepl fi du di saym ting wehpaat wi liv ahn werk.

Wi aafa free Baibl ejukayshan tu evribadi, bot wi noh foas wi bileef dehn pahn adaz. Insted, wi chrai fala weh di Baibl seh ahn “mek shoar fi bee jentl ahn shoa deep rispek” wen wi shayr wi mesij wid adaz.—1 Peeta 3:15; 2 Timoti 2:24.

Wi noh prejudis ahn wi welkom eena wi kangrigayshan enibadi weh waahn laan weh di Baibl teech, noh mata dehn bakgrong. Wi andastan dat peepl ga di rait fi mek dehn oan disizhan, ahn wi du wi bes fi “shoa rispek fi aal kaina peepl.”—1 Peeta 2:17.

Wi rispek di atariti a di govament wehpaat wi liv. (Roamanz 13:1) Wi obay di laa ahn wi pay wi taks dehn. Eevn doa wi noh tek said eena palitiks, wi rispek di rait weh adaz gat fi mek dehn oan disizhan eena mataz weh ga fi du wid palitiks.