Shoa Rispek fi Evribadi

1. Wai wi laik it wen peepl rispek wi? (Praverbz 22:1)

YOO laik it wen ada peepl rispek yu? Af koars! Evribadi need fi feel laik ada peepl rispek dehn. Wi feel gud wen peepl chreet wi wid rispek. Dat da wai di Baibl seh dat “ih beta fi mek peepl rispek yu dan fi ga silva ahn goal”!—Reed Praverbz 22:1.

2-3. Wat da sohn sichuwayshan weh wi need fi shoa rispek fi adaz?

² Sohntaim wi mait fain it haad fi shoa rispek fi ada peepl. Wan reezn da bikaaz wi ku si dat dehn noh perfek. Ahn joorin dis taim weh wi di liv eena, lata peepl noh ga rispek fi adaz. Bot wee noh fi bee laik dat. Wai? Bikaaz Jehoava waahn wi “shoa rispek fi aal kaina peepl.”—1 Peet. 2:17.

³ Eena dis aatikl, wi wahn laan weh ih meenz fi shoa rispek fi adaz ahn how wi ku shoa rispek fi (1) wi famili, (2) wi bradaz ahn sistaz, ahn (3) peepl owtsaida di kangrigayshan. Wi wahn taak moasli bowt how wi ku shoa rispek wen dat haad fi du.

WEH IH MEENZ FI SHOA RISPEK FI ADAZ?

4. Weh ih meenz fi shoa rispek fi adaz?

⁴ Wen wi taak bowt rispek, wi di taak bowt di way wi tink bowt peepl. Wi ku rispek peepl fi lata difrent reezn, fi egzampl, fi dehn gud kwalitiz, fi di gud tingz weh dehn du, er fi di atariti weh dehn gat. Wen wi rispek sohnbadi, wi wahn shoa it. Wi shoa rispek, er aana, wen wi chreet dehn eena wahn nais way ahn mek dehn feel speshal, laik wi apreeshiayt dehn, ahn dat dehn impoatant tu wi. Bot da aana, er rispek, haftu bee reel; ih haftu kohn fahn wi haat.—Mach. 15:8.

5. Weh ku help wi fi shoa rispek fi peepl?

⁵ Jehoava waahn wi shoa rispek fi peepl. Fi egzampl, hihn koman wi fi shoa rispek fi “peepl weh ga atariti.” (Roam. 13:​1, 7) Bot sohn peepl mait tink, “Ah wilin fi shoa rispek fi peepl, az lang az dehn dizerv it.” Yu tink dat rait? Wi haftu andastan dat wi noh fi rispek peepl jos fi weh dehn du er weh dehn noh du. Wee da Jehoava peepl. Wi fi rispek adaz bikaaz Jehoava waahn wi rispek dehn, ahn wee lov Jehoava ahn wi waahn mek hihn hapi.—Jash. 4:14; 1 Peet. 3:15.

6. Yu tink ih pasabl fi shoa rispek fi sohnbadi weh noh shoa rispek fi yoo? Pleez eksplayn yu ansa. (Koment pahn di picha.)

⁶ Yu tink yu ku shoa rispek fi sohnbadi weh noh shoa no rispek fi yoo? Yes, yu kud. Mek wi luk pahn sohn egzampl. King Saal mi shaym ih son Janatan fronta ada peepl. (1 Sam. 20:​30-34) Stilyet, Janatan mi rispek ih pa az di king, an enitaim dehn yoostu goh da waar, Janatan mi fait langsaid ih pa Saal til di day wen Saal ded. (Eks. 20:12; 2 Sam. 1:23) Hai Prees Eelai mi seh dat Hana mi jronk. (1 Sam. 1:​12-14) Now, Eelai mi ga too son weh mi-di serv az prees, bot dehn mi-di du lata bad tingz. Eelai da-mi dehn pa ahn di hai prees, bot hihn neva karek dehn, an evribadi mi noa bowt it. Stilyet, Hana mi taak tu Eelai wid rispek. (1 Sam. 1:​15-18; 2:​22-24) Sohn man da Atenz mi insolt Paal ahn kaal ahn wahn “chatabaks.” (Aks 17:18) Stilyet, Paal mi taak tu dehn eena wahn rispekful way. (Aks 17:22) Dehnya egzampl shoa wi dat wen wi lov ahn rispek Jehoava wahn lat, dat wahn help wi fi rispek peepl eevn wen dat noh eezi fi du. Mek wi taak bowt hoo wi fi rispek ahn wai wi fi rispek dehn.

SHOA RISPEK FI YU FAMILI

7. Wai ih ku bee haad fi shoa rispek fi wi famili?

⁷ Wai ih ku bee haad fi shoa rispek fi yu famili? Wi spen wahn lata taim wid wi famili, soh wi ku si di gud eena dehn ahn di bad. Sohnbadi eena yu famili mait bee sik er dehn mait sofa fahn mental er imoashanal helt prablemz, ahn sayka dat dehn mait chreet yu bad er mek it haad fi yu shoa rispek fi dehn. Adaz mait eevn seh er du tingz weh hert wi. Wi sopoas tu bee komfatabl ahn hapi rong wi famili. Bot wen famili membaz noh chreet wan anada wid rispek, ih eezi fi geh beks wid wan anada. Den di famili noh wahn bee hapi ahn dehn noh wahn get lang gud wid wan anada. Eena wahn way, wi famili da laik wahn badi. Wen wi geh sik, wi badi noh fongshan karek. Eena wahn simila way, wen wi famili membaz noh rispek eech ada, den wi famili noh wahn werk gud tugeda. Bot jos laik how yu ku chreet wahn siknis ahn geh beta, wahn famili ku laan fi shoa rispek fi wan anada.

8. Wai wi fi shoa rispek fi wi famili? (1 Timoti 5:​4, 8)

⁸ Wai shoa rispek fi wi famili? (Reed 1 Timoti 5:​4, 8.) Eena di fers leta weh Paal sen Timoti, ih mi taak bowt how famili membaz fi tek kayr a wan anada. Hihn mi seh dat wi noh fi du dat jos bikaaz wi haftu. Di mayn reezn wai wi shoa rispek fi wi famili da bikaaz “[wi] di wership Gaad wid aala [wi] haat.” Dat meenz wi du it bikaaz wi lov Jehoava ahn wi seeʼt az paat a wi wership. Jehoava da di wan weh mek di famili, soh wen wi aana wi famili, wi akchwali di aana Jehoava. (Ifee. 3:​14, 15; reed di noat dehn pahn 1 Timoti 5:4 eena di Study Bible.) Dat da wahn gud reezn wai wi fi rispek wi famili, noh chroo?

9. How wahn hozban ahn waif ku shoa rispek fi eech ada? (Koment pahn di picha dehn.)

⁹ How fi shoa rispek fi wi famili. Wahn hozban weh rispek ih waif wahn shoa humoch ih lov ahn wen dehn deh bai dehnself ahn wen dehn deh wid ada peepl. (Prav. 31:28; 1 Peet. 3:7) Ih noh wahn beet ahn, shaym ahn, er seh er du eniting weh mek shee feel wertles. Ariel,a wahn brada fahn Argentina, seh: “Bikaaz a mi waif siknis, sohntaim shee wuda seh tingz weh hert mi. Wen dat hapm, Ah chrai fi memba dat weh ih seh da noh how ih reeli feel. Wen tingz geh bad, Ah chrai memba 1 Korintyanz 13:​5, ahn dat help mi fi taak wid ahn eena wahn rispekful way insteda wahn rof way.” (Prav. 19:11) Wahn waif weh rispek ih hozban wahn taak gud bowt ahn rong adaz. (Ifee. 5:33) Shee noh wahn insolt ahn, mak ahn, mek joak aafa ahn, er eniting laik dat. Shee noa dat if ih wuda du dehndeh kaina ting, ih wuda hert ih marij. (Prav. 14:1) Wahn sista da Italy marid tu wahn man weh wori wahn lat. Shee seh: “Sohntaim, Ah feel laik mi hozban wori tu moch. Eena di paas, sohntaim Ah yoostu seh tingz weh noh rispekful, an eevn if Ah neva seh it owt lowd, ih kuda mi seeʼt pahn mi fays. Bot wen Ah spen taim wid frenz weh taak bowt adaz eena wahn rispekful way, Ah fain it eeziya fi shoa moa rispek fi mi hozban.”

10. How yong peepl ku shoa rispek fi dehn payrents?

¹⁰ Unu yong peepl, unu fi obay di roolz weh unu payrents set fi unu. (Ifee. 6:​1-3) Aalwayz shoa rispek wen unu di taak tu unu payrents. (Eks. 21:17) Yu ku shoa dat yu rispek yu payrents wen yu gi dehn di help weh dehn need az dehn di geh oalda. Du yu bes fi tek kayr a dehn. Tink bowt María egzampl. Fi shee pa da neva wahn Witnis, ahn wen hihn mi geh sik, ih mi mek it haad fi María chreet ahn wid rispek wail shee mi-di tek kayr a ahn. Shee seh: “Ah pray noh jos fi rispek mi pa bot fi shoa it tu. Ah mi figa dat if Jehoava waahn Ah aana mi payrents, den hihn wahn gi mi di schrent fi du it. Az taim paas, Ah riyalaiz dat Ah mi haftu rispek ahn eevn if hihn noh chaynj.” Wen wi shoa rispek fi wi famili eevn doa dehn noh perfek, wi di shoa dat wi rispek Jehoava ahn di famili araynjment weh hihn mek.

SHOA RISPEK FI YU BRADAZ AHN SISTAZ

11. Wai ih ku bee haad fi chreet wi bradaz ahn sistaz wid rispek?

¹¹ Wai ih ku bee haad fi shoa rispek fi yu bradaz ahn sistaz? Wi bradaz ahn sistaz du dehn bes fi liv di way Jehoava waahn wi liv, bot sohntaim dehn mait chreet wi bad, joj wi rang, er anai wi. If wahn brada er sista “du sohnting fi hert [wi],” wi mait fain it haad fi rispek dehn. (Kol. 3:13) Weh ku help wi fi kantinyu shoa rispek?

12. Wai wi fi shoa rispek fi wi bradaz ahn sistaz? (2 Peeta 2:​9-12)

¹² Wai shoa rispek fi wi bradaz ahn sistaz? (Reed 2 Peeta 2:​9-12.) Eena Peeta sekant leta, ih seh dat sohn bradaz eena di fers-senchri kangrigayshan mi-di “taak bad bowt di eldaz.” How di faytful aynjelz weh mi-di luk aan mi riyak? “Bikaaz dehn rispek Jehoava,” dehn neva seh notn bad bowt di peepl weh mi-di taak bad bowt di eldaz. Imajin dat! Di perfek aynjelz mi mek shoar dehn neva seh nat wan bad ting bowt dehndeh prowd man. Insted, dehn mi lef it tu Jehoava fi joj dehn. (Roam. 14:​10-12; kompyaa Jood 9.) Weh wi ku laan fahn di aynjelz? Eevn doa dehndeh man mi deh gens di chroot, di aynjelz stil neva taak bad bowt dehn. Soh if wi ku kapi di aynjelz egzampl ahn shoa rispek fi peepl weh deh gens di chroot, yu noh tink wi shuda shoa eevn moa rispek fi wi bradaz ahn sistaz? Wi shuda “bee wilin fi shoa aana” tu dehn. (Roam. 12:10) Wen wi du dat, wi shoa dat wi rispek Jehoava.

13-14. Eena weh wayz wi ku shoa rispek fi wi bradaz ahn sistaz? Yooz di egzampl eena di paragraaf. (Koment pahn di picha dehn.)

¹³ How fi shoa rispek fi wi bradaz ahn sistaz. Unu eldaz, wen unu teech adaz, chrai unu bes fi du it eena wahn lovin way. (Fail. 8, 9) If yu need fi kongsl sohnbadi, du it eena wahn kain way ahn noh du it wen yu beks. Unu sistaz, unu ku du wahn lat fi help evribadi eena di kangrigayshan fi rispek wan anada wen unu noh taak bad bowt adaz er slanda enibadi. (Tai. 2:​3-5) Aala wi ku shoa rispek fi di eldaz wen wi werk lang wid dehn ahn shoa dat wi tankful fi di haad werk weh dehn du fi kandok di meetin dehn, tek di leed eena di preechin werk, ahn help enibadi weh “di goh di rang way.”—Gal. 6:1; 1 Tim. 5:17.

¹⁴ Wahn sista weh naym Rocío mi fain it haad fi rispek wahn elda weh mi giv ahn advais. Shee seh: “Ah mi geh beks bikaaz Ah mi feel laik ih neva taak tu mi eena wahn lovin way. Wen Ah mi deh hoam, Ah yoostu taak bad bowt ahn. Ah mi chrai noh fi shoa it, bot pahn di eensaid Ah mi feel laik ih neva kay bowt mi an Ah neva waahn lisn tu ih advais.” Weh mi help Rocío? Shee seh: “Wen Ah mi-di reed mi Baibl, Ah mi reed 1 Tesaloanyanz 5:​12, 13. Wen Ah riyalaiz Ah neva mi-di shoa rispek fi di brada, mi kanshans staat tu bada mi. Ah mi pray tu Jehoava ahn du risaach eena wi poblikayshan dehn fi fain points weh ku help mi fi karek mi atichood. Dat mi help mi fi andastan dat di brada da neva di prablem. Di prablem da-mi mai praid. Now Ah andastan dat if Ah noh hombl, ih wahn haad fi shoa rispek fi adaz. Ah stil need fi werk pan it, bot di moa Ah chrai fi shoa rispek, di moa Ah feel dat Jehoava apreeshiayt how haad Ah di chrai.”

SHOA RISPEK FI PEEPL OWTSAIDA DI KANGRIGAYSHAN

15. Wai wi mait fain it haad fi rispek peepl weh da noh Jehoava Witnisiz?

¹⁵ Wai ih ku bee haad fi shoa rispek fi peepl owtsaida di kangrigayshan? Wen wi goh preech, wi meet lata peepl weh noh kay bowt Gaad ner di Baibl. (Ifee. 4:18) Sohn peepl noh lisn tu di gud nyooz bikaaz a di way dehn groa op. Sohn peepl weh wi werk wid er weh wi goh da skool wid noh ga no manaz, ahn wi mait werk fi sohnbadi er ga wahn skool teecha weh neva satisfai wid weh wi du fi dehn. Wi mait fain dat wi looz wi rispek fi peepl laik dat lee bit bai lee bit antil wi stap chreet dehn di way how wi waahn peepl chreet wee.

16. Wai wi fi shoa rispek fi peepl weh noh di serv Jehoava yet? (1 Peeta 2:12; 3:15)

¹⁶ Wai shoa rispek fi peepl owtsaida di kangrigayshan? Memba dat Jehoava pay atenshan tu how wi chreet peepl weh noh di serv hihn yet. Di apasl Peeta mi rimain Kristyanz dat wen ada peepl si dehn di liv eena wahn gud way, dehn mait staat “aana Gaad.” Dat da wai hihn mi tel dehn fi aalwayz bee redi fi difen dehn fayt, bot fi mek shoar dehn “bee jentl ahn shoa deep rispek.” (Reed 1 Peeta 2:12; 3:15.) Weda wi di eksplayn weh wi bileev fronta wahn joj er fi enibadi els, wi fi aalwayz du it eena wahn rispekful way. Aftaraal, Jehoava di wach an ih di lisn tu weh wi seh ahn how wi seh it. Dat da gud reezn fi chreet peepl owtsaida di kangrigayshan wid rispek, noh chroo?

17. How wi ku shoa rispek fi peepl owtsaida di kangrigayshan?

¹⁷ How fi shoa rispek fi peepl owtsaida di kangrigayshan. Wen wi di preech, wi noh waahn mek di peepl weh wi preech tu feel laik wi di luk dong pahn dehn bikaaz wee noa moa bowt di Baibl dan dehn. Rada, wi waahn kansida dehn fi bee moa impoatant dan wee ahn chreet dehn laik dehn preshos tu Jehoava. (Hag. 2:7; Fil. 2:3) If sohnbadi insolt wi bikaaz a weh wi bileev, wi noh waahn ansa dehn bak di saym way. Fi egzampl, wi wuda neva tel dehn sohnting weh song smaat jos fi mek dehn geh beks er luk fool-fool. (1 Peet. 2:23) If yu doo seh sohnting weh yu shudn a mi seh, tel dehn sari rait away. How yu ku shoa rispek fi peepl da yu werk? Werk haad ahn chrai shoa wahn gud atichood tuwaadz di peepl weh yu werk wid ahn tu yu baas. (Tai. 2:​9, 10) Yu mait kyaahn pleez evribadi, noh mata how haad yu chrai. Bot if yu aanis, rispansabl, ahn haad-werkin, yu wahn definaytli pleez Jehoava.—Kol. 3:​22, 23.

18. Wai ih gud fi shoa rispek fi peepl?

¹⁸ Wi ga gud reezn fi ga rispek fi peepl ahn fi shoa it! Wi laan dat wen wi shoa rispek fi wi famili, wi di shoa rispek fi Jehoava. Wen wi shoa rispek fi wi bradaz ahn sistaz, wi di aana Jehoava. Ahn wen wi shoa rispek fi peepl owtsaida di kangrigayshan, ih wahn eeziya fi mek dehn staat prayz an aana wi grayt Gaad. Soh ih gud fi shoa rispek fi peepl eevn if dehn neva rispek wee bak. Wai? Bikaaz Jehoava wahn bles wi fi dat. Hihn pramis wi: “Ah wahn aana enibadi weh aana mee.”—1 Sam. 2:30.