Ayt Peepl Servaiv

Noawa, ih famili, ahn di animal dehn gaan eena di aak. Wen Jehoava mi kloaz di doa a di aak, ih staat tu rayn. Ih mi rayn soh moch dat di hoal ert geh kova wid waata ahn di aak staat tu float. Aala di bad peepl weh mi stay owtsaida di aak mi ded. Bot Noawa an ih famili mi sayf. Imajin how hapi dehn mi hapi dat dehn mi obay Jehoava.

Fi 40 dayz ahn 40 naits ih rayn haad, ahn den ih stap. Di waata staat tu goh dong ahn fainali di aak en op pahn tap a wahn mongtin. Soh Noawa an ih famili mi haftu stay eena di aak bikaaz dehn mi stil ga lata waata evriway.

Lee bit bai lee bit, di waata staat tu jrai op. Noawa an ih famili mi deh eena di aak fi moa dan wahn yaa. Den Jehoava mi tel dehn fi goh owta di aak an injai wahn kleen ert wehpaat no bad peepl deh. Dehn mi tankful dat Jehoava mi sayv dehn laif, soh dehn giv ahn wahn aafrin.

Jehoava mi hapi wid di aafrin weh dehn mi giv ahn. Hihn mi pramis dehn dat hihn wahn neva yooz wahn flod fi dischrai evriting pahn di ert agen. Az wahn sain a da pramis, hihn mek di fers raynboa apyaa eena di skai. Yoo eva si wahn raynboa?

Jehoava mi aalso tel Noawa an ih famili fi ga chiljren ahn ful op di ert.