Jaykob Geh di Inheritans

Aizak mi 40 yaaz oal wen ih mi geh marid tu Ribeka. Hihn mi lov shee wahn lat. Dehn en op di ga too lee bwai weh da-mi twinz.

Di oalda son mi naym Eesaa, ahn di yonga wan mi naym Jaykob. Eesaa yoostu lov deh owtsaid, an ih mi hont fi animalz tu. Bot Jaykob mi laik stay hoam.

Eena di paas, wen wahn pa ded, ih son dehn inherit ih lan ahn moni. Bot di oaldis son wuda geh moa dan di adaz. Eena Aizak famili, di inheritans wuda aalso inklood di wandaful tingz weh Jehoava mi pramis tu Aybraham. Eesaa neva kay moch bowt dehndeh pramis, bot Jaykob mi noa dat dehn mi veri impoatant.

Wahn day, Eesaa gaahn hont an ih kohn hoam taiyad ahn hongri. Ih mi smel di nais food weh Jaykob mi-di kuk an ih seh: ‘Ah hongri bad! Gi mi som a da soop weh yu di kuk!ʼ Jaykob seh: ‘Ah wahn gi yu som. Bot fers pramis mi dat Ah wahn geh yu inheritans.ʼ Eesaa tel ahn: ‘Ai noh kay bowt mi inheritans! Yoo ku tek it! Ai jos waahn eet.ʼ Yu tink Eesaa mi mek wahn gud disizhan? No, dat da-mi wahn bad disizhan. Hihn mi gi weh sohnting weh mi veri impoatant jos fi wahn bowl a soop.

Wen Aizak mi veri oal, da mi taim fi gi wahn blesin tu ih oaldis son. Bot Ribeka help Jaykob, hoo da-mi di yongis son, fi geh di blesin. Wen Eesaa mi fain owt, hihn mi geh beks bad an ih mi waahn kil ih twin breda. Aizak ahn Ribeka mi waahn protek Jaykob, soh dehn tel ahn: ‘Goh stay wid yu ma breda, Layban, til Eesaa kaam dong.ʼ Jaykob mi lisn tu ih payrents advais an ih ron weh soh dat ih breda noh kil ahn.